Yowanane 14 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi usamba bayidi bandi. Yeye neahingane bua kubangata

¹ Mitshima yenu kaizakadi; nuitabushe Nzambi, nungitabushe meme kabidi.

² Mu nsubu wa Tatu wanyi mudi miaba ya bungi ya kuikala; bu bualu ebu kabui bulelela, nakadi kunuambila; nenye kunulongoluela muaba.

³ Binaya ne binanulongoluela muaba, nempingane kabidi, nenuangate kundi meme muine, bua kundi ngikala, nuenu nenuikaleku kabidi.

⁴ Nudi bamanye nshila wa kundi nya.

⁵ Toma wakamukonka ne, Mukelenge, katuena bamanye kuwaya, tudi bamanye nshila kudi kunyi?

⁶ Yesu wakamuambila ne, Meme udi bianyi nshila ne bulelela ne muoyo; kakuena muntu udi ulua kudi Tatu, kai muanze kulua kundi diambedi.

⁷ Bu nuenu banmanye meme, nuakadi kumanya Tatu wanyi kabidi; nudi bamumanye katataka ne tshiendelele, nuakumumona.

⁸ Filipo wakamuambila ne, Mukelenge, utuleshe Tatu, ebu mbualu butudi basue.

⁹ Yesu wakamukonka ne, Filipo, nakadi nʼenu musangu bulo nunku, wewe kuena nummanye, anyi? Wakuntangila meme wakatangila Tatu; abu munyi mûdi wamba ne, Utuleshe Tatu?

¹⁰ Kuena witabusha ne, Meme ndi munda mua Tatu, Tatu udi munda muanyi, anyi? Tshiena ndiambila mei andi nuambila; Tatu udi muikale munda muanyi utu wenza malu andi.

¹¹ Nungitabushe ne, Meme ndi munda mua Tatu, Tatu udi munda muanyi; binuikala kanui nuenza nunku, nungitabushile bua malu mene antshidi ngenza.

¹² Bulelela, bulelela, ndi nuambila ne, Wangitabusha nenze biandi kabidi malu antshidi ngenza; nenze biandi malu adi mahite andi ngenza, bualu bua meme ndi nya kudi Tatu.

¹³ Nengenze malu onso anualomba mu dina dianyi, bua Tatu atumbishibue bua Muana.

¹⁴ Binualomba bualu buonso mu dina dianyi, nembuenze.

¹⁵ Binuansua, nenuenze mikenshi yanyi.

Yesu udi ubalaya Nyuma Muimpe

¹⁶ Nendombe Tatu, yeye neanuhe Musambi mukuabo, ikale nʼenu tshiendelele,

¹⁷ Nyuma wa bulelela mene udi ba ha buloba kabai bamanye mua kuangata, bua bobo kabena bamumona, kabena bamumanye; nuenu nudi bamumanye bua yeye utu wikala nʼenu, neikale munda muenu.

¹⁸ Tshiena nushîa bana ba nshîe, nempingane kunudi.

¹⁹ Tshituha tshihi ba ha buloba kabena bantangila kabidi; kadi nuenu nudi nuntangila; bualu bua meme ndi ne muoyo, muenu kabidi nenuikale ne muoyo.

²⁰ Mu ditutu adi nenumanye ne, Meme ndi munda mua Tatu wanyi, nuenu nudi munda muanyi, meme ndi munda muenu.

²¹ Udi ne mikenshi yanyi, udi uyenza, ngudi munsue; Tatu wanyi neasue wansua, meme nemusue kabidi, nendimueneshe kudiye.

²² Yudasa (ka Isakaliote nasha) wakamukonka ne, Mukelenge, bualu kai buakulua buwadimuenesha kutudi, kui udimuenesha kudi ba ha buloba?

²³ Yesu wakamukudimuna ne, Biansua muntu, nenze dî dianyi; Tatu wanyi neamusue, tuetu netulue kudiye, netuikale ngandi.

²⁴ Udi kai munsue kena wenza mei anyi; dî dinudi nunvua kandianyi, ndia Tatu wakantuma.

²⁵ Nakunuambila malu â hantshidi nʼenu.

²⁶ Kadi Musambi, Nyuma Muimpe mene, watumabo kudi Tatu mu dina dianyi, yeye neanuyishe malu onso, neanuvuluishe mei onso anakunuambila.

Yesu udi ubaha ditalala

²⁷ Ndi nushila ditalala, ndi nuha ditalala dianyi; tshiena nuhadi bu mudi ba ha buloba banuhadi. Mitshima yenu kaizakadi, kaitshinyi.

²⁸ Nuakunyua dî dinakunuambila ne, Ndi nya, nempingane kunudi. Bu nuenu bansue, nuakadi, kusanka, bualu bua meme ndi nya kudi Tatu, bua Tatu udi muntambe meme.

²⁹ Nakunuambila bualu ebu diambedi kabui buanze kulua bua nuenu nuitabushe, haluabu.

³⁰ Tshiena nuambila malu makuabo a bungi, bualu bua mukokeshi wa buloba ulualua, yeye kena nʼanyi bualu munda muanyi;

³¹ kadi bua ba ha buloba bamanye ne, Ndi musue Tatu, ne bu muakampa Tatu mukenshi, nunku mundi ngenza. Bikai, tuye.