Yowanane 10 - Mukanda wa Nzambi Dihungila Dikulukulu ne Dihungila Dihia-dihia 2003

Yesu udi mulami muimpe

¹ Bulelela, bulelela, udi nuambila ne, Udi kai ubuelela ku mbelu wa luhangu lua mikoko, udi ubandila kukuabo, yeye udi muibi ne munyengi:

² kadi wabuelela ku mbelu udi mulami wa mikoko.

³ Mulami wa ku mbelu udi umunzuluila; mikoko idi yunvua dî diandi; udi Ubikila mikoko yandi ku mena ai, udi uhatuka wilombola.

⁴ Hashikisheye kumusha yandi yonso, udi uya ku mpala kuai, mikoko idi imulonda, bualu bua idi mimanye dî diandi.

⁵ Kadi kayena ilonda muntu wa bende, neimunyeme, bualu bua kayena mimanye dî dia bantu ba bende.

⁶ Yesu wakabelela lusumuinu elu; kadi kabakajingulula malu akabambileye.

⁷ Yesu wakabambila kabidi ne, Bulelela, bulelela, ndi nuambila ne, Meme ndi mushiku wa mbelu wa mikoko.

⁸ Bonso bakalua ku mpala kuanyi badi bibi ne banyengi; kadi mikoko kayakunvua dî diabo.

⁹ Meme ndi mushiku wa mbelu; wabuela kundi, neasungidibue, neabuele, neahatuke, neahete mashinde.

¹⁰ Muibi udi uluila anu bua kuiba ne bua kushiha ne bua kubutula; meme nakuluila bua bantu bahete muoyo, bauhete muvule.

¹¹ Ndi mulami muimpe wa mikoko; mulami muimpe udi ufuila mikoko.

¹² Muena mudimu wa difutu, kai mulami wa mikoko mene, kai muena mikoko, hamoneye nkashama ulua, udi ushîa mikoko, udi unyema, nkashama udi wikuata, udi witangadisha;

¹³ yeye udi unyema bualu bua yeye udi muena mudimu wa difutu, mikoko kayena bu bualu kudiye.

¹⁴ Ndi mulami muimpe wa mikoko; ndi mumanye yanyi, yanyi idi minmanye,

¹⁵ bu mudi Tatu munmanye, meme kabidi ndi mumanye Tatu: ndi nfuila mikoko.

¹⁶ Ndi ne mikoko mikuabo idi kayi ya mu luhangu elu; bundi nʼabu mbua kulua nʼai, neyunvue dî dianyi; neilue tshisumbu tshimue, ne mulami umue.

¹⁷ Ebu mbualu budi Tatu wanyi mutuile, ndi nteka muoyo wanyi hanshi bua meme kûangata kabidi.

¹⁸ Kakuena mukuabo udi ûnyenga, ndi nditekelau hanshi nkayanyi. Ndi ne bukole bua kuteka hanshi, ndi ne bukole bua kûangata kabidi. Nakuangata mukenshi eu kudi Tatu wanyi.

¹⁹ Ditahuluka diakalua kabidi munkatshi mua Bena Yuda bua mei â.

²⁰ Ba bungi bakamba ne, Udi ne demon munda, udi muhale; nudi nunvuila dî diandi tshinyi?

²¹ Bakuabo bakamba ne, Â kêna mei a muntu mukuatshike ne demon. Demon udi mumanye mua kutabasha mesu a bafofo, anyi?

Yesu udi udiamba ne, Ndi bu Nzambi

²² Disanka dia dijidila dia ntempelo diakadi ku Yelushalema;

²³ yakadi ngondo ya mashika; Yesu wakadi wendakana mu ntempelo mu mbalanda wakadi muidika ne, Wa Solomo.

²⁴ Bena Yuda bakamunguila, bakamukonka ne, Wewe neutushie ne mioyo yetu kulu-kulu musangu bûle munyi? Biwikala Kilisto, utuambile hatoke.

²⁵ Yesu wakabakudimuna ne, Nakunuambila, kadi kanuena nuitabusha; malu antshidi ngenza mu dina dia Tatu wanyi adi angamba.

²⁶ Kadi nuenu kanuena nuitabusha, bualu bua kanuena ba mu mikoko yanyi.

²⁷ Mikoko yanyi idi yunvua dî dianyi, ndi muimanye, idi indonda;

²⁸ ndi nyiha muoyo wa tshiendelele; kayena ifua tshiendelele, kakuena mukuabo udi winyenga mu tshianza tshianyi.

²⁹ Tatu wakuimpa udi mutambe bonso bukole, kakuena wainyenga mu tshianza tshia Tatu.

³⁰ Meme ne Tatu tudi bamue.

³¹ Bena Yuda bakamema mabue kabidi bua kumuela.

³² Yesu wakabandamuna ne, Nakunulesha malu mimpe a bungi a Tatu anakuenza, nudi nungelela mabue bua muanda kai unakuenza?

³³ Bena Yuda bakamukudimuna ne, Katuena tukuelela mabue bua muanda muimpe uwakuenza, anu bua bihendu biudi uhenda nʼabi Nzambi, ne bua wewe muntu udi udivuisha Nzambi.

³⁴ Yesu wakabakonka ne, Kabena bafunde mu mikenshi yenu ne, Nakuamba ne, Nuenu nudi banzambi, anyi?

³⁵ Bikaleye mubabikile ne banzambi, aba bakatuminabo dî dia Nzambi (ne dî dia mu Mukanda wa Nzambi kadiena mua kumushibua),

³⁶ bua yeye wakajidilabo kudi Nzambi ne wakatumeye ha buloba, munyi nudi nuamba ne, Udi uhenda Nzambi, bua nakuamba ne, Ndi Muana wa Nzambi?

³⁷ Bingikala tshî ngenza malu a Tatu wanyi, kanuitabushi dî dianyi.

³⁸ Kadi bingikala ngenza malu au, nasha numbenga meme, nuitabushe malu au; bua nuenu kumanya ne kujingulula ne, Tatu udi munda muanyi, ne meme ndi munda mua Tatu.

³⁹ Bakakeba kabidi mua kumukuata, kadi yeye wakumuka mu bianza biabo.

Yesu udi uya kuakamubatizabo

⁴⁰ Wakaya kabidi dishia dia Yadene ku muaba wakadi Yone ubatiza bantu diambedi, wakashikamaku.

⁴¹ Ba bungi bakatua kudiye; bakamba ne, Bulelela, Yone kakenza tshimanyinu, kadi malu onso akamba Yone bua muntu eu akadi malelela.

⁴² Ba bungi bakamuitabushaku.