Yona 3 - Mukanda wa Nzambi Dihungila Dikulukulu ne Dihungila Dihia-dihia 2003

Bena Ninewe Badi Bakudimuna Mitshima Yabo

¹ Dî dia Yehowa diakalua kudi Yona tshiakabidi ne,

² Bika, ya biebe ku Ninewe, musoko au munene, ubambile mei andi nkuambila.

³ Nunku Yona wakabika, wakaya ku Ninewe, bu muakamba Yehowa. Ninewe wakadi musoko muhite bunene, wakadi luendu lua matuku asatu bua kûnyunguluka.

⁴ Yona mumane kuenda luendu lua dituku dimue munda mua musoko, wakabanga kuela dî ne, Hahita matuku makumi anai, nebabutule Ninewe.

⁵ Bena Ninewe bakitabusha mei a Nzambi; bakajila bia kudia, bakaluata bivualu bikayabala, kubangila kudi baneme tô ne kudi bahuekele.

⁶ Hakafika lumu elu ku matshu a mukelenge wa mu Ninewe, yeye wakajuka mu nkuasa wandi wa bukelenge, wakavula tshivualu tshiandi tshia bunfumu, wakaluata bivualu bikayabala, wakashikama mu butue.

⁷ Wakela mukenji ne wakelesha dî mu nseke yonso ya Ninewe, wamba bu muakamba mukenji wa mukelenge ne bantu bandi banene ne, Kabalabudi tshintu kudi muntu anyi kudi nyama, kudi ngombe anyi kudi mikoko; kabidi tshia kudia, kabinu mai.

⁸ Biluate bivualu bikayabala, bantu ne bimuna bidile bikole kudi Nzambi; muntu ne muntu umuke mu nshila wandi mubi, alekele kuenza malu makole adi bianza biandi biamba kuenza.

⁹ Nganyi udi mumanye ne, Yehowa neakudimune mutshima wandi ne nealekele tshiji tshiandi tshikole, bua tuetu katufu?

¹⁰ Nzambi wakamona bienzedi biabo, bu muakalekelabo nshila wabo mubi; ne Nzambi wakakudimuna mutshima wandi bua muanda mukole wakambeye diambedi ne, Nembenzele; yeye kakawenza nansha.