Yobe 40 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa wakakudimuna Yobo dî ne,

² Muntu udi udiula mei andi neasue kubambakasha mei ne Wa Bukole Buonso, anyi? Muntu udi utetangana mei ne Nzambi, itabe makonka andi.

³ Hashishe, Yobo wakandamuna Yehowa dî ne,

⁴ Mona, ndi muntu muhuekele; nenkukudimune wewe dî kai? Ndi nteka tshianza tshianyi ku mishiku yanyi.

⁵ Nakuamba dî dianyi musangu umue, tshiena ukudimuna dî kabidi; e, nakuamba di misangu ibidi, kadi tshiena ngamba mei makuabo.

Bileshilu bia Bukole bua Nzambi

⁶ Hashishe, Yehowa wakitaba kudi Yobo ne dî dihatuke mu nvunde ne,

⁷ Suika mukaba webe mu tshimono bu muntu mulume; nenkukonke malu makuabo, ne wewe ummanyishe malu â.

⁸ Wewe udi musue kuvuisha kulumbuluisha kuanyi kuakane ne, Kudi tshianana, anyi? Udi musue kunuisha meme bua wewe umanye mua kubingishibua, anyi?

⁹ Wewe udi ne diboko bu dia Nzambi, anyi? Udi mua kuela dî diebe bu mukungulu wa nvula bu mudiye wenza, anyi?

¹⁰ Udilengeshe ne bulengele ne bunene, udiluatshishe ne butumbi ne buneme.

¹¹ Lesha tshiji tshiebe tshikole; tangila muntu yonso udi mudisue ne umuhuekeshe.

¹² Tangila muntu yonso udi mudisue, umuhuekeshe hanshi; diata bantu babi mu makasa mu miaba yonso idibo bimana.

¹³ Ubajike hohamue mu dinfuenkenya dia buloba, jingila mpala yabo mu miaba misokome.

¹⁴ Hashishe, nenkutumbishe kahidi ne, Diboko diebe dia tshianza tshia balume didi dimanye mua kunsungila.

¹⁵ Tangila biebe nguvu, unakafuka nʼebe diatshimue. Yeye udi udia mashinde bu mudi ngombe wenza.

¹⁶ Bukole buandi budi mu bidimba biandi, ngulu yandi idi mu mifungu ya mu difu diandi.

¹⁷ Yeye udi ukonya mukila wandi, ûkolesha bu ditamba dia ku mutshi wa cèdre. Mifungu ya ku bibelu biandi idi misuikakasha.

¹⁸ Mifuba yandi idi bu mishiba ya tshiamu tshia mitaku, mikolo yandi idi bu milonda ya tshiamu tshifike.

¹⁹ Yeye udi wa ku mpala munkatshi mua bintu biakenza Nzambi; anu yeye wakamufuka ngudi umuha muele wandi wa nvita.

²⁰ Bulelela, mikuna idi imuvuishila bia kudia biandi, mu miaba idi nyama yonso ya mu tshisuku inaya.

²¹ Yeye udi ulala muinshi mua mitshi ya ku muelelu wa musulu, mu tshisokomenu tshia mu malenga ne mu bintampi.

²² Mitshi ya ku muelelu wa mai idi mubuikila ne dileshi diai; malenga a ku kasulu adi amunyunguluka.

²³ Mona, biahasalala musulu bikole, kena uzakala; yeye udi ushala holâ, nansha biula musulu bu wa Yadene ne mai tô ne hafikau mukana muandi.

²⁴ Mukuabo udi mua kumukuata hadiye untangila ku mesu, anyi? Mukuabo udi mua kutubula diulu diandi ne lukanu, anyi?