Yobe 4 - Mukanda wa Nzambi Dihungila Dikulukulu ne Dihungila Dihia-dihia 2003

Elifaza Udi Ubela Yobo

¹ Hashishe, Elifaza, Muena Temana, wakakudimuna Yobo ne,

² Biakeba muntu kukuambila dî mpindiu, neukuate tshiji, anyi? Kadi muntu kai udi mua kudikanda bua kakudi?

³ Tangila, wewe wakuyisha bantu ba bungi, wakukolesha bianza biakadi bitekete.

⁴ Mei ebe akubisha muntu wakadi wamba kudishinda, wakukolesha binu biakadi bitekete.

⁵ Kadi mpindiu bualu ebu budi bukukuata, mutshima webe udi unema bujitu; budi bukulenga, buowa budi bukukuata.

⁶ Kutshina kuebe kua Nzambi kakuena tshieyemenu tshiebe, anyi? Buakane bua bienzedi biebe kabuena ditekemena diebe, anyi?

⁷ Ndi nkusengelela ne, Uvuluke, utuambile ne, Muntu kai wakafua kayi ne tshilumbu? Bakabutula bantu bakane kudi kunyi?

⁸ Bu munakamana kutangila, badi bihila malu mabi, ne badi bakuna ntatu, nebahuole malu â muomumue.

⁹ Badi bafua ku muhuya udi uhatuka mukana mua Nzambi, bua bukole bua tshiji tshiandi badi babutudibua.

¹⁰ Muadi wa nyama wa ntambue ne dî dia nyama wa ntambue udi ne luonji biakuhuwa; ne menu a bana ba nyama ya ntambue onso akutshibuka.

¹¹ Nyama wa ntambue mukulukashi udi ufua bualu bua kena ukuata tshia kudieye, ne bana ba mukashi wa nyama wa ntambue badi batangadika.

¹² Dî diakafika kundi mu busokoko, nakunvua anu manunganyi adi.

¹³ Mu meji a ku bikena kumona bufuku, hadi tulu tukole tukuata bantu,

¹⁴ buowa buakankuata ne muzakalu, biakanyungisha mifuba yanyi yonso.

¹⁵ Muhuya wakahita ha mpala hanyi, miosa ya hamʼbidi hanyi yakavuayila.

¹⁶ Tshintu atshi tshiakimana, kadi meme tshiakamanya mua kumona tshinfuanyi tshiatshi; tshinfuanyi tshiakadi ku mesu kuanyi. Nakunvua dî ditekete diamba ne,

¹⁷ Muntu wa ha buloba udi mua kuikala muakane ku mesu kua Nzambi, anyi? Muntu udi mua kuikala ne mutshima mutoke ku mesu kua Mufuki wandi, anyi?

¹⁸ Tangila, kena mua kueyemena ba mu diulu badi bamukuatshila mudimu, ne udi ubanda banjelo bandi ne, Badi ne mahanga.

¹⁹ Nunku neatambe kumona mahanga kudi badi ne mibidi ya ha buloba, badi ne bishimikidi biabo mu dinfuenkenya, hadi baboteshibua bu tshibayibayi!

²⁰ Ku dinda tô ne ku dilolo badi babatshibula bituha bituha, hadi bafua tshiendelele ne kakuena muntu udi umona lufu luabo.

²¹ Bikala muonshi wa ntenta wabo mutuka munda muabo, kabena bafua, kabayi banze kuheta meji, anyi?