Yobe 39 - Mukanda wa Nzambi Dihungila Dikulukulu ne Dihungila Dihia-dihia 2003

¹ Udi mumanye tshikondo tshidi mbushi idi yenda ha mutu ha mikuna mile ilela bana, anyi? Udi mua kutentekela bua kumona didinyenga dia kulela kua ngulungu, anyi?

² Udi mumanye mua kubala ngondo idiyi ikumbasha bua kulela, ne udi mumanye tshikondo tshidiyi ilela, anyi?

³ Idi inama hanshi, idi ilela bana bai, idi idiumushila didinyenga diai.

⁴ Bana bai badi bakola, badi baheta bukole mu mpata, badi banyema ne kabena bahingana kabidi.

⁵ Wakutuma nyama wa mpunda wa mu mpata bua kuyeye mu budishikaminyi buandi nganyi? Anyi wakusulula nkanu ya mpunda udi unyema lubilu nganyi?

⁶ Nyeye unakusungula tshihela bu nsubu wandi, ne buloba budi ne miu ya luehu bu muaba wandi wa kushikama.

⁷ Yeye udi useka diyoyo didi mu musoko, kena unvua mei makole a muenzeshi wa mudimu.

⁸ Udi wendakana ha mutu ha mikuna bu muaba wandi wa kudileye mashinde, ne udi ukebakeba midioko yonso mibishi.

⁹ Mbowa udi witabusha bua kukukuatshila mudimu, anyi? Yeye neitabushe bua kulala butuku hehi ne tshidilu tshiebe tshia nyama, anyi?

¹⁰ Udi mua kusuika mbowa ne mionshi bua yeye kuela mabula mu budimi, anyi? Yeye neitabushe bua kuenda ku nyima kuebe ukukokela lukasu lua kushiha nʼalu mabuwa a buloba a mu tshibanda, anyi?

¹¹ Wewe udi mua kumueyemena bualu bua bukole buandi budi bua bungi, ne udi mua kumushila mudimu webe wa mu budimi bua yeye kuwenza, anyi?

¹² Udi mua kumueyemena bua yeye kuhingana ne maminu ebe, ne bua kuasangisheye ha tshishihuidi, anyi?

¹³ Dihuahua dia nyunyu wa nfiondo didi dihahala ne disanka, kadi yeye udi ne mahuahua ne masala adi alesha bana bandi luse, anyi?

¹⁴ Bualu bua udi ushiya makela andi ha buloba, udi wâkuatshisha luya mu dinfuenkenya dia buloba,

¹⁵ udi uhua muoyo bualu buau ne, Bumue dikasa dia mualu didi mua kuashila; anyi nyama wa mu mpata udi mua kuadiata.

¹⁶ Yeye udi wenzela bana bandi bibi bitambe, bu badi kabayi bandi mene; mudimu wandi wa kutoya kua bana udi hatuhu, kadi yeye kena utata bua muanda eu.

¹⁷ Bualu bua Nzambi wakamuhuisha meji muoyo, ne kakamuha tshituha tshiandi tshia lungenyi.

¹⁸ Mu tshikondo tshidiye ujuka bua kunyema lubilu, yeye udi ulengulula kabalu ne muntu udi ubanda ha nyima haku bua kuenda.

¹⁹ Wewe wakuha kabalu bukole buaku, anyi? Wakukavuadika buoya budi bulembelela mu nshingu muaku, anyi?

²⁰ Wakukenzesha bua kutuhikaku bu mudi mukumbi utuhika, anyi? Kadi ne butumbi ne kuhembula kudi kukuatshisha bantu buowa.

²¹ Kadi katua mikono mu tshibanda ne kadi kasanka bua bukole buaku. Kadi kaya ku mpala bua kusangakanaku ne badi ne bielelu bia nvita.

²² Kadi kaseka buowa, kakena katshinyishibua; kakena kahingana ku nyima hua kuhanduka ku muele wa nvita.

²³ Musaka wa mikete udi uvuma, ututa hamʼbidi haku, difuma dibalakane ne kabenda bidi bikatuta kabidi.

²⁴ Mu luonji luaku ne tshiji kadi kamina buloba mu lubilu luaku; kakena kumana talalâ hunvuaku tshiona tshia mpungi.

²⁵ Misangu yonso idibo bela mpungi kadi kamba ne, Eyo, tuyai! Kadi kunyua muhuya wa nvita hatshidiku kule, kadi kunyua dî dikole dia tupitene ne mbila ya bena nvita.

²⁶ Nkumbikumbi udi alembelela mulu bua dikuatshisha dia meji ebe hololeye mahuahua andi matangishe ku luseke lua sude, anyi?

²⁷ Nyunyu wa mukanku udi ubanda mulu, udi wibaka disua diandi kulu bua mukenji webe, anyi?

²⁸ Udi mushikame ha dibue didi ha mukuna mule, udi wibakahu disua diandi, ku mutu kua lusongo lua dibue ne ku muaba mukole munkatshi mua mabue.

²⁹ Kule kuakua yeye udi utentekela ha buloba, ukebakeba tshintu tshia kubakuleye! mesu andi adi atangila bintu bidi kule.

³⁰ Bana bandi badi banua mashi; hadi bitalu bia bantu bishihibue, nyunyu ei idiku.