Yobe 36 - Mukanda wa Nzambi Dihungila Dikulukulu ne Dihungila Dihia-dihia 2003

Elihu Udi Utumbisha Nzambi bua Buneme Buandi

¹ Hashishe, Elihu wakamba mei andi kabidi ne,

² Anji kungindila tshituha bua meme mmanye mua kukulesha manga malu; bualu bua ndi ne mei makuabo a kuamba bua kuhingisha nʼau Nzambi.

³ Nengambe lungenyi luanyi lunakuangata ku miaba ya kule, nennuleshe ne, Mufuki wanyi udi ne buakane.

⁴ Bulelela, mei anyi kaena a mashimi, muntu udi ne lungenyi tshishiki udi wimana ku mpala kuebe.

⁵ Mona, Nzambi udi ne bukole buhite ne kena uhetula muntu, udi ne bukole buhite bua kujingulula malu.

⁶ Kena Usungila mioyo ya bantu babi, ne udi uha badi mu dikenga malu makane a bobo kuangata.

⁷ Kena umusha mesu andi kudi bantu bakane; kadi udi ubashikika hohamue ne bakelenge mu nkuasa ya bukelenge tshiendelele, ne badi batumbishibue.

⁸ Bikalabo bedibue mu nkanu, bikalabo bakuatshibue mu mionshi ya makenga;

⁹ yeye udi ubalesha bienzedi biabo ne malu mabi abo; udi ubalesha ne, Badi badibandisha.

¹⁰ Udi ujikula matshu abo bua bamanye mua kunvua diyisha, udi ubelela mukenji bua bobo balekele malu mabi bua kuhingana kudiye.

¹¹ Biunvuabo dî diandi ne biamukuatshilabo mudimu, badi hashikisha matuku abo munkatshi mua diakalengele, ne bidimu biabo munkatshi mua masanka.

¹² Kadi bikalabo kabayi bunvua dî diandi, nebashihibue ku muele wa nvita, nebafue kabayi banze kuheta lungenyi.

¹³ Badi babenga Nzambi mu mitshima yabo badi baditekelamu tshiji; kabena badila dikuatshisha diandi habakengesheye.

¹⁴ Badi bafua mu bunsongalume buabo, ne mioyo yabo idi ijimina munkatshi mua benji ba malu a bundu.

¹⁵ Udi ubandisha bakengi ku dikenga diabo, ne udi ujikula matshu abo ku tshinyangu.

¹⁶ E, wakasua kukukoka bua kukumusha mu makenga, bua kulua nʼebe mu muaba munene udi kauyi mubumbakane; ne bintu bidibo bateka ha mesa hebe bidi ne manyi tente.

¹⁷ Kadi wewe udi mule tente ne kulumbuluisha kua bantu babi; kulumbulula ne dikosa dia nsambu bidi bikukuata.

¹⁸ Kuitabushi bua tshiji tshiebe tshikuteye bua wewe kuhetula Nzambi; kuitabushi bua bunene bua buhikudi bukusesuishe mu nshila muakane.

¹⁹ Muadi webe neumanye mua kukumbana bua wewe kukengi, anyi? Bienzedi bionso bia bukole buebe bidi mua kuenza nunku, anyi?

²⁰ Kujingi biebe ne, Butuku buile, humushabo bantu ku miaba yabo.

²¹ Udimuke bua wewe kukudimunyi mutshima webe ku bualu bubi, bualu bua wewe wakusungula bubi ebu ku mpala kua makenga.

²² Monai, Nzambi udi wenza bienzedi bihite bunene mu bukole buandi; nganyi udi muyishi bu yeye?

²³ Wakamusunguila nshila idiye ne bua kuendela nganyi? Udi mumanye mua kumuambila ne, Wewe wakuenza bienzedi bidi kabiyi biakane nganyi?

²⁴ Uvuluke bua wewe kutumbisha mudimu wandi udi bantu batumbisha mu misambu yabo.

²⁵ Bantu bonso bakaumona; bantu badi bautangidila kule.

²⁶ Mona, Nzambi udi munene, ne katuena bamumanye nansha; bungi bua bidimu biandi kabuena mua kumanyibua.

²⁷ Bualu bua udi ukoka mamata a mai mulu; adi enguluka, andamuka mula mufume ku dibungi,

²⁸ udi matutu alokesha; nvula wa bungi udi umatshila bantu.

²⁹ Muntu kai udi mua kujingulula ditangalaka dia matutu, ne mikungulu idi ihatuka mu ntenta wandi?

³⁰ Mona, yeye udi udinyungulula ne nuele ya nvula, udi ubuikila ndondo wa mai manene.

³¹ Ku dikuatshisha dia bintu ebi yeye udi ulumbuluisha bantu; udi ubaha bia kudia bivulangana.

³² Udi ubuikila bianza biandi bibidi ne miele ya nvula, udi uyelela mikenji bua yoyo ikume muaba udiye musue.

³³ Tshiona tshia mukungulu wa nvula tshidi tshiambila bantu lumu luandi; tshidi tshiambila bimuna mene ne, Yeye udi ha buihi.