Yobe 35 - Mukanda wa Nzambi Dihungila Dikulukulu ne Dihungila Dihia-dihia 2003

¹ Elihu wakakudimuna Yobo kabidi ne,

² Udi welangana meji ne ebu mbualu buakane, anyi? Udi wamba ne, Udi muakane ku mpala kua Nzambi, anyi,

³ hawamba ne. Bualu ebu budi bukuatshisha kudi kunyi? Anyi hawamba ne, Ndi mpeta mushinga kai mutambe wa hanakuenza bualu bubi?

⁴ Nengitabe kûdi, ne kudi balunda bebe diatshimue nʼebe.

⁵ Tangila mu diulu, mona biebe; tangila matutu adi makuhite bule!

⁶ Biwikala muenze bibi, udi umuenzela yeye bualu kai? Bikala malu mabi ebe makumbane, udi umuenzela yeye tshinyi?

⁷ Biwikala muakane, udi umulesha tshintu kai? Anyi yeye udi wangata tshinyi ku tshianza tshiebe?

⁸ Bubi buebe budi mua kukengesha muntu bu wewe, ne buakane buebe budi bumanye mua kukuatshisha muana wa muntu.

⁹ Bualu bua makengesha mavule adi alua kudibo, bakuabo badi badila; badi badila bua kuheta dikuatshisha kudi bakuabo bua kuhanduka mu bianza bia muena tshimbambila.

¹⁰ Kadi kakuena umue udi wamba ne, Nzambi Mufuki wanyi udi kudi kunyi? Nyeye udi utuha misambu ya kuimba butuku,

¹¹ udi utuyisha lungenyi luhite lua nyama ya ha buloba, udi utuvuisha bena meji bahite nyunyu ya mulu.

¹² Hashishe, badi badila, kadi yeye kena witaba, bualu bua dihetu dia mu mitshima ya bantu babi.

¹³ Bulelela, Nzambi kena unvua muadi wa hatuhu, Wa Bukole Buonso kena uteleja matshu andi kudiu.

¹⁴ Nunku neatambe kuhidia kunyua hawamba ne, Tshiena mmumona; bualu buebe budi ku mpala kuandi, umuindile!

¹⁵ Ne mpindiu bualu bua tshiji tshiandi katshiena tshianze kukengesha bantu babi, ne bualu bua yeye kena muanze kubala buhote bua muntu,

¹⁶ Yobo udi ubulula mukana muandi hatuhu, udi ukumbasha mei bu mudiye kayi ne lungenyi.