Yobe 33 - Mukanda wa Nzambi Dihungila Dikulukulu ne Dihungila Dihia-dihia 2003

Elihu Udi Ubela Yobo

¹ Kadi Yobo, ndi nkusengelela ne, Unvua mei anyi; teleja matshu ebe ku mei anyi onso.

² Mona biebe, nakubuela mukana muanyi; ludimi lua mukana muanyi luakuamba dî.

³ Mei anyi neikale bu buakane bua mutshima wanyi, mishiku yanyi neyambe malu adiyi mi manye kayiyi ne lubombo.

⁴ Nyuma wa Nzambi wakunfuka, muhuya wa Wa Bukole Buonso wakumpa muoyo.

⁵ Biwamanya mua kuenza nunku, kudimuna dî dianyi; longolola mei ebe ku mualu wa nvita ku mpala kuanyi, imanaku!

⁶ Mona, ndi ku mesu kua Nzambi bu mûdi wewe; ndi mufuanyikisha ku dima muomumue nʼebe.

⁷ Mona, buowa bua bualu buanyi kabuena mua kuntshinyisha nansha; kukuenzesha kuanyi kakuena kukunemeshila bujitu.

⁸ Bulelela, wewe wakuamba dî dinakunvua mu matshu anyi, nakunvua tshiona tshia mei a ne,

⁹ Ndi ne mutshima mutoke, tshiena ne bualu bubi; ndi muakane, tshiena ne dihila bua malu mabi.

¹⁰ Mona, yeye udi ukeba malu a kunkanda nʼau, udi umbala bu muena lukuna wandi.

¹¹ Udi ubuesha makasa anyi mu muomba, udi utentekela nshila yanyi yonso.

¹² Kadi mu muanda eu wewe kuena wamba dî dilelela; nenkukudimune dî; bualu bua Nzambi udi muhite bantu bunene.

¹³ Bualu kai wewe udi musue kufuilangana nʼandi, umubanda ne, Kena usokoluela bantu bienzedi biandi?

¹⁴ Bualu bua Nzambi udi wamba dî diandi mu tshiambidi tshimue, misangu mikuabo mu biambidi bibidi, kadi muntu kena udiunvua.

¹⁵ Mu tshilota mene, mu tshikena kumona tshia butuku, hakuatshike bantu tulu tukole, halalabo tulu ha malalu;

¹⁶ mu diba adi yeye udi ujikula matshu a bantu, udi ubayisha mu busokoko,

¹⁷ bua yeye umushe muntu ku bienzedi bibi, ne bua yeye akande muntu ku dihetu;

¹⁸ bua yeye akande muoyo wandi musûke bua kauhonyi mu Dijimba dia Bafue, bua kusungila muoyo wandi bua kaufu ku muele wa nvita.

¹⁹ Yeye udi ukengeshibua bua bamulengeshe ne disama ha bulalu buandi, ne difuilangana dia mifuba yandi didiku tshiendelele.

²⁰ Bua muanda eu bidia bidi bitonda muoyo wandi, ne bia kudia bimpe bidi bitonda mutshima wandi.

²¹ Munyinyi wa hamʼbidi handi udi mukuatshike tshinyanu tô ne hajiminau ku mesu kua bantu; mifuba yandi yakadi kayiyi imueneka idi imueneka.

²² Nunku musûke wandi udi usemena ha buihi ne Dijimba dia Bafue, ne muoyo wandi udi usemena ha buihi ne bashihi.

²³ Bikala muanjelo ha buihi nʼandi, muakuidi wandi mene, umue munkatshi mua tshinunu tshia banjelo bakuabo, bua yeye kulesha muntu buakane budiye ne bua kuenza,

²⁴ hashishe, yeye udi umulesha luse, udi wamba ne, Umusungile bua kahueki biandi mu Dijimba dia Bafue, bualu bua nakusangana tshia kumuhikula nʼatshi.

²⁵ Munyinyi wa hamʼbidi handi neuhite wa muana bulengele, udi uhingana ku matuku a bunsongalume buandi.

²⁶ Udi utendelela Nzambi, yeye udi uluangana nʼandi bimpe, nunku udi umona mpala wa Nzambi ne disanka; yeye udi uhingishila muntu buakane buakadiye nʼabu.

²⁷ Udi wimba ku mpala kua bantu, wamba ne, Nakuenza bibi, nakukonyangasha malu akadi malulame diambedi, Nzambi kakanfutshisha dikenga diakanangane ne bubi buanyi.

²⁸ Wakuhikula musûke wanyi bua kauhueki mu Dijimba dia Bafue, muoyo wanyi neumone munya.

²⁹ Monai, Nzambi udi wenzela muntu malu â onso, udi umuenzela malu â misangu ibidi, e, misangu isatu mene;

³⁰ bua kuhingisha muoyo wandi kauhonyi mu Dijimba dia Bafue, bua yeye atanduke ne munya wa muoyo.

³¹ Teleja bimpe, Yobo, ungunvuile; huwa talalâ, nengakule bianyi.

³² Biwikala ne dî dikuabo dia kuamba, udinkudimune; ambaku, bualu bua ndi musue kukubingisha.

³³ Biwikala kuyi ne dî, ungunvuile; anji kuhuwa, nenkuyishe meji.