Yobe 32 - Mukanda wa Nzambi Dihungila Dikulukulu ne Dihungila Dihia-dihia 2003

Elihu Udi Ujadika ne, Ndi mua Kuitaba Yobo

¹ Nunku bantu aba basatu bakalekela kukudimuna Yobo mei, bualu bua yeye wakadi muakane ku mesu kuandi.

² Hashishe tshiji tshia Elihu, muana wa Balakela, Muena Buzi, wa diku dia Lama, tshiakatema. Tshiakatemena Yobo, bualu bua yeye wakadingisha, kakabingisha Nzambi.

³ Tshiji tshiandi tshiakatemena balunda bandi basatu kabidi, bualu bua bobo kabakamona mei a kukudimuna nʼau Yobo, kadi bakaosha Yobo.

⁴ Elihu wakadi muindile Yobo ne mei a kumuambila, bualu bua bantu aba bakadi ne bidimu bihite biandi bungi.

⁵ Hashishe, hakatangila Elihu ne kakuakadi ditaba kudi Yobo mukana mua bantu aba basatu, tshiji tshiandi tshiakatema kudibo.

⁶ Elihu, muana wa Balakela, Muena Buzi, wakabanga kuakula ne, Meme ndi anu nsongalume, ne nuenu nudi banunu, bua muanda eu nakadikanda, nakatshina kunulesha munakadi ngela meji.

⁷ Nakamba munda munda ne, Wa matuku a bungi udi ne bua kuakula, ne bena bidimu bivule badi ne bua kuyisha bantu meji.

⁸ Kadi nyuma udi munda mua muntu, ne muhuya wa munda mua Wa Bukole Buonso udi ubaha lungenyi.

⁹ Kembantu badi ne bidimu bia bungi mbadi ne meji, kembanunu mbadi bajingulula kulumbulula kuakane.

¹⁰ Nunku ndi ngamba ne, Unvuai dî dianyi; nennuleshe lungenyi lundi nʼalu, meme mene.

¹¹ Monai, nakindila bua kunvua mei enu, nakateleja matshu bua kunvua meji enu, tô ne hanuakadi nukebakeba mei a kumukudimuna nʼau.

¹² E, nakateleja matshu anyi kunudi, ne monai, kakuakadi muntu umue wakatuisha Yobo, kakuakadi umue wenu wakandamuna mei andi.

¹³ Nudimuke bua nuenu kanuambi bienu ne, Tuakusangana meji munda muandi; Nzambi udi mua kumutamba bukole, muntu kena mua kuenza nunku.

¹⁴ Bualu bua yeye kena muanze kulongolola mei andi bua kuntuisha nʼau; tshiena mmukudimuna dî ne mei anuakuamba.

¹⁵ Badi ne ditshina, kabena bamuandamuna dî kabidi; kabena ne dî dia kuamba.

¹⁶ Nengindile bualu bua bobo kabena bakula, bualu bua badi bimana talalâ, ne kabena bamuandamuna dî kabidi, anyi?

¹⁷ Meme kabidi nengandamune tshituha tshianyi tshia mei, meme kabidi nengambe lungenyi lundi nʼalu.

¹⁸ Bualu bua ndi mule tente ne mei; nyuma udi munda muanyi udi ungenzesha.

¹⁹ Monai, munda muanyi mudi bu maluvu adi kayi ne mushiku wa kuhatukila; mudi bu milondo ya biseba mihia-mihia idi ne maluvu munda muai ne idi yamba kuhandika.

²⁰ Nengambe dî dianyi bua meme mmanye mua kuhuyakana bimpe; nembuele mukana muanyi bua kumukudimuna dî dianyi.

²¹ Ndi nnusengelela ne, Meme tshikadi ne kansungusungu kudi muntu yonso nansha; tshitumbishi muntu ne mei a lubombo.

²² Bualu bua tshiena mumanye mua kubomba muntu ne mei a lubombo; bingenza nunku, Mufuki wanyi neangumushe lukasa.