Yobe 3 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Udi Udila ne, nakaledibua bua Tshinyi?

¹ Hashishe, Yobo wakabulula mukana muandi, wakela dituku dia kuledibua kuandi mulau.

² Yobo wakabanga kuamba dî ne,

³ Dituku diakandelabo dijimine, ne butuku buakamba ne, Muana mulume udi muimitshibue, bujimine.

⁴ Dituku adi dikale mîdima; Nzambi wa mu diulu kadikebi; munya kauditemenyi.

⁵ Mîdima ne mufidi mufike fitutû bidiangate. Difutu dishikamehu; bintu bionso bidi bifikisha difuku adi biditshinyishe.

⁶ Bua bufuku abu, mîdima mikole ibukuate; kabuikadi ne disanka munkatshi mua matuku a tshidimu; kabubadibu munkatshi mua ngondo.

⁷ E, bufuku abu buikale hatuhu; dî dia disanka kadibuedimu.

⁸ Badi bamanye mua kuela matuku mulau bele butuku abu mulau, mbadi ne bukole mene bua kualula nyoka munene.

⁹ Mitoto yakadi ikenka dilolo ikuate mîdima; didiku adi dindile munya, kadi kadiuhetshi; kadimonyi hatshiatshia.

¹⁰ Bualu bua kadiakinshila bibi bia difu dia mamu wanyi, kadiakasokoka kanyinganyinga ku mesu kuanyi.

¹¹ Bualu kai tshiakaha diba diakandelabo? Bualu kai tshiakahuela muoyo diba dinakaluhuka munda mua mamu wanyi?

¹² Bualu kai tatu wanyi wakitabusha bua banteke ha bibelu biandi? Bualu kai mabele akadiku bua meme kuâmua?

¹³ Nunku nakadi kulala hanshi diba adi, nakadi kuikala holâ; nakadi kulala tulu; nunku nakadi kuikisha

¹⁴ hohamue ne bakelenge ne bena meji ba ha buloba, bakadiashila majambu ku mishiki ya mabue;

¹⁵ anyi hohamue ne bakokeshi bakadi ne biamu bia or, bakûsha nsubu yabo tente ne tshiamu tshia argent.

¹⁶ Nakadi kuikala bu muana wa kabishi musokoka, bu bana badi kabayi banze kutangila munya.

¹⁷ Ku muaba au bantu babi badi halekela kutatshisha banga bantu, badi bahungila badi bikishaku.

¹⁸ Ku muaba au bena lukanu badi bashikama talalâ, kabena bunvua dî dia mubenzeshi wa mudimu.

¹⁹ Bahuekele ne baneme badiku, muhika udi ne budishikaminyi kudi mukelenge wandi.

²⁰ Bualu kai yeye udi uha muntu udi mu dikenga munya, ne udi uha muntu udi ne kanyinganyinga mu mutshima wandi muoyo?

²¹ Badi bajinga lufu, ne kaluena tulua kudibo, badi bumbula mu buloba bua kulukeba ne dikeba dihite dia biuma bisokoka bukole.

²² Bobo badi basanka bikole, badi basanka, hasanganabo lukita.

²³ Bua tshinyi Nzambi udi uhesha muntu udi ne nshila wandi musokoka munya, ne udiye munyunguluke ne luhangu?

²⁴ Kuhumuna kuanyi kudi kulua ku mpala kua bia kudia bianyi, ne kutua kuanyi kua mikemu kukole kudi kuhumuka bu mai.

²⁵ Bualu bua tshindi utshina tshidi tshinkuata; ne tshiakunkuatshisha buowa tshidi tshilua kundi.

²⁶ Tshiena ne ditalala, tshiena mua kushikama holâ; tshiena ne dikisha; kadi dikenga didi dinkuata.