Yobe 26 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Udi Wamba bua Bukokeshi Tshishiki bua Nzambi

¹ Hashishe, Yobo wakakudimuna Biledada ne,

² Mona muwakukuatshisha wakadi kayi ne bukole, ne muwakusungila dihoko diakadi kadiyi ne bukole!

³ Mona muwakulesha meji kudi wakadi kayi ne meji, ne muwakumumanyisha lungenyi luakane ne mei mavule!

⁴ Wakuambila nganyi mei ebe, ne nyuma wa nganyi wakufumina kudi?

⁵ Bakishi ba bafue badi bazakala muinshi mua mai ne mua bintu bidimu.

⁶ Muaba wa Bafue udi hatoke tô ku mpala kua Nzambi, ne Abadona kena ne tshibuikilu.

⁷ Wakavungulula luseke lua nôde ha muaba mutuhu, wakafuka buloba kabuyi bukudika ku tshintu.

⁸ Udi uteka mai mu matutu andi manene; ditutu kadiena dihandika bua bujitu buau.

⁹ Udi ubuikila nkuasa wandi wa butumbi, udi ubalula ditutu diandi ha nkuasa.

¹⁰ Wakafunda tshijengu ha mutu ha mai, bu mukalu hankatshi ha munya ne mîdima.

¹¹ Makunshi a diulu adi azakala, adi atua mikemu bua kubela kuandi.

¹² Ku bukole buandi yeye udi utalasha mai manene; ku lungenyi luandi udi ukuma Lahaba, udi umusompola.

¹³ Ku muhuya wandi diulu didi dilengeshibua; tshianza tshiandi tshiakusompola nyoka munene udi wenda lubilu.

¹⁴ Monai, malu â adi anu kukala kua bienzedi biandi; monai mutudi tunvua anu dinunganyi dikese kudiye! Kadi mukungulu wa bukole buandi—nganyi udi mua kûjingulula?