Yobe 25 - Mukanda wa Nzambi Dihungila Dikulukulu ne Dihungila Dihia-dihia 2003

Biledada udi Uhidia ne, Kakuena Muntu Udi mua Kubinga ku Mpala kua Nzambi

¹ Hashishe, Biledada, Muena Shuhi, wakakudimuna Yobo ne,

² Bukokeshi ne ditshina bidi kudiye, udi uvuisha ditalala mu miaba yandi ya mu diulu.

³ Misumba ya bena nvita bandi idi mua kubadibua, anyi? Munya wandi kawena utemena bonso, anyi?

⁴ Nunku muntu wa ha buloba udi mua kubingishibua ku mesu kua Nzambi munyi? Udi muledibue kudi mukashi udi mua kuikala ne mutshima mutoke munyi?

⁵ Ngondo mene mene kena ne dinkenka, mitoto kayena mulengele ku mesu kuandi.

⁶ Monai mudi muntu mutambe kukeheshibua, udi bu tshikusu, ne mudi muana wa muntu mukeheshibue, udi bu musanda!