Yobe 22 - Mukanda wa Nzambi Dihungila Dikulukulu ne Dihungila Dihia-dihia 2003

Elifaza Udi Ubanda Yobo bua Bubi Butambe Bunene

¹ Hashishe, Elifaza, Muena Temana, wakakudimuna Yobo ne,

² Muntu udi mua kukuatshisha Nzambi ne tshintu, anyi? Nansha; muntu udi ne meji udi udikuatshisha yeye nkayandi.

³ Biwikala muakane bualu ebu budi bukuatshisha Wa Bukole Buonso, anyi? Biwenda ne mutshima mutoke, bualu ebu budi bumuhetesha tshintu, anyi?

⁴ Yeye udi ukukengesha bualu bua wewe udi umutshina, ne udi ulumbulula nʼebe, anyi?

⁵ Bubi buebe kabuena bunene, anyi? Kakuena kunfudilu kua malu mabi ebe.

⁶ Bualu bua wewe udi witabusha bieya kudi bana benu hatuhu; udi uvula bilulu bia badi butaka.

⁷ Kuena unuisha badi bahungila mai, ne udi uhala udi ne nzala bia kudia.

⁸ Kadi muena diboko dikole wa kaheta buloba, ne muena butumbi wakadi ushikamamu.

⁹ Wewe wakuhingisha bakashi ba mu lufuila kuabo ne bianza bituhu, maboko adi atuala bana ba nshiya akutshibuka.

¹⁰ Nunku mateyi adi akunyunguluka, ne buowa budi bukukuata lubilu.

¹¹ Midima idi ikukuata, ne kuena mua kumona, ne mai mahite bungi adi akubuikila.

¹² Nzambi kena mulu mu diulu, anyi? Tangila mitoto idi mitambe kuikala mulu mule!

¹³ Kadi wewe udi wamba ne, Nzambi udi mumanye tshinyi? Hadiye utangila mu midima mikole, yeye udi mua kulumbulula bilumbu, anyi?

¹⁴ Matutu mafike adi amubuikila bua yeye kamonyi; udi wenzela anu ha mutu ha matutu a mu diulu.

¹⁵ Wewe udi musue kunanukila kuenda mu nshila wa kale, wakadi bantu babi bendela, anyi?

¹⁶ Bobo bakumushibua ha buloba diba diabo kadiyi dianze kufika, bishimikidi biabo biakashimbuka ne biakahumuka bu musulu wa mai.

¹⁷ Bakambila Nzambi ne, Umuka kutudi; bakakonka ne, Wa Bukole Buonso udi mua kutuenzela tshinyi?

¹⁸ Kadi yeye mene wakûsha nsubu yabo tente ne bintu bimpe. Kadi meji a bantu babi adi kule nʼanyi!

¹⁹ Bantu bakane badi bamona malu â ne badi basanka, badi kabayi ne tshilumbu badi baseka bantu babi,

²⁰ bamba ne, Bushuwa, hakadi nʼetu lukuna bakubutuka, kahia kakushidisha bintu biabo bia bungi.

²¹ Unvuangane biebe ne Nzambi, wikale ne ditalala; nunku diakalengele nedilue kûdi.

²² Itabusha diyisha dia mukana muandi, buesha mei andi mu mutshima webe,

²³ Biwahingana kudi Wa Bukole Buonso, biadihuekesha, biûmusha malu adi kayi makane mu ntenta webe,

²⁴ biwela tshiamu tshia or ha buloba, biwela or wa ku Ofî munkatshi mua mabue a mu tusulu,

²⁵ Wa Bukole Buonso neikale tshiamu tshiebe tshia or ne tshiamu tshia argent tshia mushinga mukole kûdi.

²⁶ Mu diba adi neusanke mu Wa Bukole Buonso, neubishe mpala webe kudi Nzambi.

²⁷ Neumutendelele ne yeye neakunvuile, nushikishe mitshihu yebe.

²⁸ Neuhangidishe bualu, nebujalame bua bualu buebe; munya neutemene mu nshila yebe.

²⁹ Bualu bua Nzambi udi uhuekesha badi badibandisha, udi ubandisha udi ne mesu andi minama.

³⁰ Neabandishe muntu mene udi kayi mubingishibue, e, neanuhandishe bua butoke bua bianza biebe.