Yobe 17 - Mukanda wa Nzambi Dihungila Dikulukulu ne Dihungila Dihia-dihia 2003

¹ Muoyo wanyi wakubutuka, matuku anyi adi ahuwa; lukita ludi lungalamina.

² Bulelela, banseki badi ha buihi nʼanyi, ne disu dianyi ditu diamona ditatshisha diabo.

³ Mpindiu ungeyeke tshieya, wikale mueyeki wa tshieya bua bualu buetu nʼebe, nganyi watutakasha nʼanyi bianza bua kuhunga tshihungidi?

⁴ Bualu bua wewe wakubuikila mitshima yabo bua kabikadi ne lungenyi, nunku wewe kuena witabusha bua bobo bahite bukole.

⁵ Muntu udi unyoka balunda bandi bua tshituha tshia bintu, mesu a bana bandi mene neahange.

⁶ Yeye wakunvuisha bu lusumuinu lua bantu kuelabo, ndi bu muntu udibo batuila lute ku mesu.

⁷ Mesu anyi akulua bitayitayi bualu bua kanyinganyinga, ne bituha bianyi bionso bia mubidi bidi bu mundidimbi.

⁸ Bantu bakane badi bakema bua muanda eu, muntu udi kayi ne tshilumbu udi ujuka bua kukanda bantu babi.

⁹ Kadi muntu muakane neananukile kuenda mu nshila wandi, ne udi ne bianza bitoke neadiundediunde mu bukole buandi.

¹⁰ Kadi buonso buenu hinganai kabidi ku mei enu a diambedi! Tshiena nsangana muena meji munkatshi muenu.

¹¹ Matuku anyi akumana kuhita; malu anakuhangidisha mu mutshima akulua tshianana, meji mene a mu mutshima wanyi.

¹² Badi bandamuna butuku bua kuikalabu munya, badi bamba ne, Munya udi hehi, hamba butuku kuila.

¹³ Binatekemena ne, Muaba wa Bafue newikale nsubu wanyi, binalongolola bulalu buanyi mu midima,

¹⁴ bingambila Dijimba dia Bafue ne, Wewe udi tatu wanyi; bingambila tshikusu ne, Wewe mmamu wanyi ne muanʼetu wa bakashi;

¹⁵ ditekemena dianyi didi kudi kunyi? Muntu kai neamone ditekemena dianyi?

¹⁶ Neuhueke nʼanyi tô ne ku bibi bia ku Muaba wa Bafue, anyi? Netuhueke nʼabi mu buloba hohamue, anyi?