Yobe 14 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Udi Wela Meji a Bukese bua Matuku a Muoyo wa Muntu

¹ Muntu udi muledibue kudi mukashi udi ne matuku makese a muoyo wandi ne udi mûle tente ne ntatu.

² Udi umena bu tshilongo ne udi ufubidila, udi uhita lubilu bu mundidimbi ne kena ushalaku.

³ Udi ubulula mesu ebe kudi muntu wa nunku, udi umbikila ku mpala kuebe bua kulumbulula nʼebe, anyi?

⁴ Udi mua kuhatula tshintu tshia kane ku tshintu tshidi katshiyi tshiakane nganyi? Kakuena muntu.

⁵ Bikala matuku a muntu mamane kuhangidisha, bikala bungi bua ngondo yandi mu bianza biebe; biwikala mujadike mikalu yandi bua yeye kayisambuki,

⁶ anji kumusha mesu ebe kudiye bua yeye amanye mua kuikisha biandi, tô ne hamanyeye mua kusanka kundekelu kua dituku diandi, bu mudi muena mudimu wa difutu usanka.

⁷ Bualu bua badi bamanye mua kutekemena mutshi ne, Biakatulabo kuinshi, neusangile kabidi, ne ntonga yau kayena ilekela kusangila.

⁸ Biafubidila muji wau mu buloba, biafua tshikuku tshiau mu buloba,

⁹ hashishe, hunvuau mai, newele bilongo, neusampile ntonga bu mutshi utshidi mutekete.

¹⁰ Kadi muntu udi ufua ne bukole buandi budi bujimina; e, muntu udi uhuola muoyo wandi, hashishe, udi kudi kunyi?

¹¹ Bu mudi mai a mu dishiha akama, ne bu mudi musulu ûma ne ukamuka,

¹² nunku muntu udi ulala hanshi kena ubika kabidi; tô ne hajimina diulu kabena batabala, kabena ba bahisha ku tulu tuabo.

¹³ Nakadi kusua bua wewe unsokoke mu Muaba wa Bafue, bua wewe unsokoke to ne bumuka tshiji tshiebe, bua wewe unsunguile tshikondo tshijalame ne bua wewe unvuluke!

¹⁴ Biafua muntu, neikale ne muoyo kabidi, anyi? Nakadi kuindila matuku onso a tshikondo tshianyi tshia kuluangana nvita, tô ne hakadi kulua tshikondo tshia kundekela.

¹⁵ Wewe wakadi ku mbikila ne meme nakadi kuitaba kûdi, wewe wakadi kunjinga, meme mudimu wa bianza biebe.

¹⁶ Kadi katataka wewe udi ubala bungi bua biendedi bianyi; kuena utentekela bualu bubi buanyi, anyi?

¹⁷ Dihanga dianyi didi disuikibua mu mpaya, ne wewe udi ubuwa bubi buanyi.

¹⁸ Kadi biuhuka mukuna mule, udi ujimina hatuhu; ne dibue didi diumuka mu muaba wadi.

¹⁹ Mai adi aheula mabue; kuhasalala kua mai kudi kumusha dinfuenkenya dia buloba; wewe udi ujimisha ditekemena dia bantu muomumue.

²⁰ Wewe udi umutamba bukole misangu yonso ne yeye udi ujimina; wewe udi ukudimuna mpala wandi ne udi umuihata.

²¹ Bana bandi badi baheta butumbi, kadi yeye kena mumanye bualu ebu; badi bahuekeshibua, kadi yeye kena ubamona.

²² Kadi mubidi wandi udi unvua dikenga anu bua bualu buandi nkayandi, ne mutshima wandi udi unyingalala anu bua bualu buandi mene.