Yobe 13 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Udi Udividila bua Butoke bua Mutshima Wandi

¹ Monai, mesu anyi akumona malu â onso, matshu anyi akûnvua ne akuajingulula.

² Malu anudi bamanye meme ndi muamanye kabidi; lungenyi luanyi kaluena lushadila ku luenu.

³ Kadi ndi musue kuakula ne Wa Bukole Buonso, ndi musue kuyikilangana ne Nzambi bualu buanyi.

⁴ Kadi nuenu nudi bafuki ba malu a mashimi, buonso buenu nudi bondahi ba hatuhu.

⁵ Nakadi kusua bua nuenu kuhuwa talalâ, ne bua kuhuwa kuenu kuikale bu lungenyi luenu.

⁶ Nunku, unvuai mei andi nnubela nʼau, telejai matshu ku disengelela dia ku mishiku yanyi.

⁷ Nudi basue kuakuila Nzambi ne mei adi kâyi makane, anyi? Nudi basue kuamba mei a mashimi bua bualu buandi, anyi?

⁸ Nudi basue kumunemeka ne kundesha meme kansungusungu, anyi? Nudi basue kuakuila Nzambi, anyi?

⁹ Bidi bimpe bua yeye anukebekebe, anyi? Nenumanye mua kumudinga bu mudi muntu udinga mukuabo, anyi?

¹⁰ Yeye neanubele bikole, binuikala ne kansungusungu mu musokoko.

¹¹ Butumbi buandi kabuena bunutshinyisha, anyi? Buowa bua bualu buandi kabuena bunukuata, anyi?

¹² Nsumuinu yenu idi anu nsumuinu ya butue, mei anudi nudividila nʼau adi anu bu ngabu ya dima.

¹³ Nuanji kutulesha, nundekele bua meme ngakule bianyi; bualu budi busue kunkuata bunkuate.

¹⁴ Kakuena bualu; nensume munyinyi wanyi ku menu anyi, nenteke muoyo wanyi mu tshianza tshianyi.

¹⁵ Monai, yeye neanshihe; tshiena ne ditekemena; kadi nennanukile kudijidila ku mesu kuandi bua bienzedi bianyi.

¹⁶ Kadi bualu ebu nebuikale luhandu luanyi ne, Muntu udi ubenga Nzambi kena ne bukitu bua kulua ku mpala kuandi.

¹⁷ Unvuai dî dianyi bimpe, mei andi ngamba abuele mu matshu enu.

¹⁸ Tangilai mpindiu ne, Nakuteka tshilumbu tshianyi ku mpala kuandi; ndi mumanye ne, Nembingishibue.

¹⁹ Nganyi udi mua kuelangana nʼanyi mpata? Nunku nakadi kuhuwa talalâ ne kuhuola muoyo.

²⁰ Kuandi kungenzela malu abidi, nunku tshiena nsokoma ku mesu kuebe;

²¹ umushe tshianza tshiebe namʼbidi hanyi; tshikuatshiki buowa bua bualu buebe.

²² Hashishe, umbikile, ne meme nengitabe kudi, anyi meme ngambe dî dianyi, ne wewe witabe kundi.

²³ Mibi yanyi ne malu mabi anyi bidi bungi munyi? Ummanyishe ditomboka dianyi ne bualu bubi buanyi.

²⁴ Bualu kai wewe udi usokoka mpala webe kundi, ne udi umbala bu muena lukuna webe?

²⁵ Udi musue kuzakasha dibeshi didi luhehele lumane kunyungisha, anyi? Newihate bisonsa biume, anyi?

²⁶ Bualu bua wewe udi ufunda malu makole bua kumbanda nʼau, ne udi umpingishila makenga bua malu mabi anakadi nʼau ku bunsongalume buanyi.

²⁷ Udi ubuesha makasa anyi mu tshikunyi, udi utentekela nshila yanyi yonso; udi ufunda mukalu ku makasa anyi;

²⁸ kadi meme ndi bu tshintu tshibole tshidi tshinyanguke, bu tshilulu tshidi tubayibayi tumane kudia.