Yobe 12 - Mukanda wa Nzambi Dihungila Dikulukulu ne Dihungila Dihia-dihia 2003

Yobo Udi Witabusha Bukole bua Nzambi ne Meji Andi

¹ Hashishe, Yobo wakakudimuna Sofâ ne,

² Kakuena mpata mu bualu ebu ne, Nuenu nudi bukua bantu, ne meji neafue nʼenu diatshimue!

³ Kadi meme ndi ne lungenyi bu munudi nʼalu; lungenyi luanyi kaluena lushadila ku luenu; bulelela, muntu kai udi kayi mumanye malu anudi nuamba?

⁴ Nakulua bu muntu udibo basekaseka kudi muena mutumba nʼandi, meme mene nguakubikila Nzambi, ne yeye wakitaba kundi. Muntu muakane, muntu muakane tshishiki, wakulua tshintu tshia bantu kuseka!

⁵ Muntu udi kayi ne ntatu udi uhetula muntu udi ututa dikasa dibi; dihetu diandi didi dialamina badi ne makasa amba kuselemuka.

⁶ Ntenta ya banyengi ba bintu idi anu ne diakalengele, ne badi bakuatshisha Nzambi tshiji badi bashikama talalâ, nansha yonso mulue ne nzambi wandi mu tshianza tshiandi.

⁷ Kadi ukonke nyama mene, ne yoyi neyikuyishe; ukonke nyunyu ya mulu ne yoyi neyikuambile;

⁸ anyi akule ne buloba, ne buobu nebukuyishe; ne minyinyi ya mu mai manene neyikuambile dî.

⁹ Muntu kai udi kayi mumanye bintu ebi bionso ne, Tshianza tshia Yehowa tshiakenza bualu ebu,

¹⁰ ne mu tshianza tshiandi mudi muoyo wa bintu bionso bidi ne muoyo ne muhuya wa bukua bantu bonso?

¹¹ Ditshu kadiena diteta mei, bu mudi ludimi lulabula bia kudia bialu, anyi?

¹² Meji adi kudi bantu bakoke, ne dijingulula dia malu didi kudi badi ne matuku a bungi.

¹³ Kudi Nzambi kudi meji ne bukole; yeye udi ne lungenyi ne dijingulula dia malu.

¹⁴ Yeye udi usasula ne kabena ba manye mua kuibaka kabidi; udi winshidila muntu mu nsubu wa lukanu ne kakuena disoso dia yeye kuhatukila.

¹⁵ Monai, yeye udi ukanda mai a mbila, ne mai adi akama; udi watuma kabidi, ne adi abumbula buloba.

¹⁶ Kudi yeye kudi bukole ne meji makane; muhambuki ne muhambuishi badi mu bianza biandi.

¹⁷ Yeye udi utuma bena meji mu buhika butaka, udi uvuisha balumbuluishi bu bahote.

¹⁸ Udi usulula nkanu idi banfumu basuika nʼai bakuabo, udi ubasuika mikaba mu bifuka.

¹⁹ Udi utuma bakuidi mu buhika butaka, udi ubutula bantu badi ne bukole.

²⁰ Udi ukanda mei a ku mishiku ya badibo beyemena, udi unyenga bakulumpe lungenyi.

²¹ Udi ulengulula bakokeshi, udi usulula mukaba wa bantu bakole.

²² Udi usokolola malu adi masokoma mu mîdima, udi uhatula mufitu mufike fitutû bua kumuenekau mu munya.

²³ Udi uvuisha bisamba bia bantu binene, ne udi ubishiha; udi ulehesha mikalu ya bisamba bia bantu, ne udi ubituma mu buhika.

²⁴ Udi unyenga lungenyi lua bakelenge ba bantu ba ha buloba, udi ubendesha mu tshihela mudi kamuyi nshila.

²⁵ Badi benda babubuta mu mîdima kabayi ne muinda, udi ubendesha bu bakuatshila ba maluvu.