Yobe 11 - Mukanda wa Nzambi Dihungila Dikulukulu ne Dihungila Dihia-dihia 2003

Sofâ Udi Ubanda Yobo bua Bubi

¹ Hashishe, Sofâ, Muena Namata, wakakudimuna Yobo ne,

² Katuena ne bua kuitaba kudi muena mei a bungi, anyi? Nebabingishe muntu udi utamba kuakula, anyi?

³ Kufunafuna kuebe kudi kumanya mua kuhuwisha bantu, anyi? Hawaseka Nzambi, kakuena muntu udi ukufuisha bundu, anyi?

⁴ Bua wewe udi wamba ne, Diyisha dianyi didi diakane, ne ndi ne mutshima mutoke ku mesu kuebe.

⁵ Kadi nakadi kusua bua Nzambi ambe dî diandi, ne abutule mukana muandi bua kukutuisha,

⁶ ne bua yeye akuleshe malu masokoka a mu meji andi! Bualu bua yeye udi ne lungenyi lule, umanye biebe ne, Nzambi kena ukumbasha dikenga diebe bu mudi bubi buebe.

⁷ Wewe udi mumanye mua kumona ndekelu wa ndondo wa malu a Nzambi, anyi? Neumanye mua kufika ku nshikidilu wa meji a Wa Bukole Buonso, anyi?

⁸ Adi ahita diulu bule, udi mua kuenza tshinyi? Adi atamba Muaba wa Bafue ku ndondo; udi mua kumanya tshinyi?

⁹ Adi atamba buloba bule ku tshidikishilu tshiau, adi atamba mai manene bunene buau.

¹⁰ Biahileye mu nshila, biakuateye muntu mu lukanu, biamubikileye ku tshilumbuluidi, wamuhumbisha nganyi?

¹¹ Bualu bua yeye udi mumanye bantu badi ne mashimi; udi umona malu mabi nansha bikaleye kayi wela meji a malu â.

¹² Kadi muntu udi kayi ne meji neahete lungenyi, anu biamanya muana wa nyama wa mpunda wa mu mpata mua kuledibua bu muntu.

¹³ Biwafila mutshima webe kudi Nzambi, wolola bianza biebe kudiye.

¹⁴ Bikala bualu bubi mu tshianza tshiebe, ubûmushe kule; kuitabushi bua malu mabi ikale mu ntenta webe.

¹⁵ Hashishe, neumanye mua kubandisha mpala webe kayi ne tshilema bulelela, wewe neutantamane ne kuena utshina.

¹⁶ Bualu bua tshihua muoyo netshikukuate bua dikenga diebe, neudivuluke anu bu mai mamane kuhueka.

¹⁷ Muoyo webe neubike ne dinkenka dihite dia munda munya; nansha bikalaku mîdima, yoyi neyilue bu dinda.

¹⁸ Newikale ne tshieyemenu, bualu bua ditekemena didiku; neutentekele miaba yonso diambedi, hashishe, newikishe talalâ.

¹⁹ Neumanye mua kulala hanshi, kakuyi muntu wa kukutshinyisha; e, ba bungi nebakebe diakalengele kûdi.

²⁰ Kadi mesu a bantu babi nealue bitayitayi; tshinyemenu tshiabo netshijimme ku mpala kuabo, ne ditekemena diabo nedikale anu kuhuola kua muoyo.