Yirmeya 48 - Mukanda wa Nzambi Dihungila Dikulukulu ne Dihungila Dihia-dihia 2003

Di dia Yehowa bualu bua Bena Moaba

¹ Bualu bua Moaba. Yehowa wa misumba, Nzambi wa Isalele, udi wamba ne, Mulau wikale kudi Nebo! Bualu bua udi munyanguke; Kîyata-ayima udi mukuatshike bundu, udi munyengibue; muaba udibo bakolesha ne bielelu bia nvita udi mukuatshike bundu, bakûtamba bukole.

² Butumbi bua Moaba kabuenaku kabidi; mu Heshebona bakumuelela tshifufu ne, Tuye kubabutula, bua kabikadi ne muaba wabo munkatshi mua bisamba bikuabo! Wewe kabidi, Mademena, nebakulekeshe dî, bualu bua muele wa nvita neukuihate.

³ Unvuai! Tshiona tshia muadi tshidi tshifuma ku Holonayima, ntshia kubutuka ne kuhaula kunene!

⁴ Moaba wakahaudibua; bana bandi bakese haku asa muadi.

⁵ Badi babanda mukuna wa Luhita, benda badila; hahuekabo mu nshila udi uyila tô ne ku Holonayima; bakunvua mbila ya bena kubutuka ne,

⁶ Nyemai bienu! Nusungile mioyo yenu! Nuikale bu mutshi wa tshianana mu tshihela.

⁷ Bualu bua wakueyemena bienzedi bia bianza biebe ne luhetu luebe, nebakukuate wewe kabidi; nebaye ne Kemoshe mu buhika, ne bakuidi bandi ne baminyampala bandi.

⁸ Mushihianganyi nealue mu misoko yonso, kakuena musoko umue wahanduka. Tshibanda netshifue, ne mpata wa ha mutu ha mikuna neabutudibue; bu muakuamba Yehowa.

⁹ Nuhe Moaba mahuahua, bua yeye ahahale, anyeme. Misoko yandi neyilue bikulu, kayiyi ne bantu ba kushikamamu.

¹⁰ Mulau wikale kudi wajingakana mu mudimu wa Yehowa, mulau wikale kudi wakanda muele wandi wa nvita ne, Kaumatshishi mashi hanshi!

¹¹ Moaba wakushikama talalâ, kayi ne ntatu, ku buana buandi tô ne mpindiu, wakushikama bu maluvu mu bisekeseke, kabena bamuhongolola ku mulondo ku mulondo, kabena banze kuya nʼandi mu buhika, nunku nse yandi yakushala kudiye, ne muenyi wandi kawakuanda muka.

¹² Nunku Yehowa udi wamba ne, Monai, mu matuku alualua nentume basendeki kudiye, nebamusendeke, nebahongolole bintu bidi mu milondo yandi, nebashihe milondo yandi bihese.

¹³ Moaba neakuatshike bundu bualu bua Kemoshe, bu muakakuatshika Bena Isalele bundu bualu bua Betele, tshieyemenu tshiabo.

¹⁴ Nudi mua kuamba munyi ne, Tudi bantu bakole, tudi bena bukitu mu nvita?

¹⁵ Moaba wakubutudibua, misoko yandi yakulua mu kadilu, bansongalume bandi bahite buakane badi bahona mu lufu kudi babashihi. Edi ndî dia Mukelenge udibo babikila ne, Yehowa wa misumba.

¹⁶ Kubutuka kua Moaba kudi kuamba kufika, dikenga diandi didi dilua lukasa.

¹⁷ Nuenu, bantu bonso badi bamunyunguluka, ne buonso buenu badi bamanye dina diandi, nuambe bienu ne, Monai mudi dikombo dikole dia bukelenge ditshibuke, dikombo diandi dilengele be!

¹⁸ Wewe, muana mukashi udi mushikame mu Dibona, tuluka mu nkuasa webe wa butumbi, ushikame mu buloba buminyine, bualu bua muhaudi wa Moaba wakulua kukuluisha wakushimbula misoko yebe idi ne ngumbu.

¹⁹ Wewe muana mukashi udi mushikame mu Aloê, imana kukala kua nshila, utentekeleku; konka muntu mulume udi unyema biandi ne muntu mukashi udi uhanduka ne, Bualu kai buakulua?

²⁰ Bakufuisha Moaba bundu, bakumutamba bukole, umuashile muadi, umudidile! Ambai dî edi ku muelelu wa musulu wa Ânona ne, Bakuhaula Moaba.

²¹ Nunku mulau wakukuata misoko idi mu mpata: Holona ne Yaza ne Mefâta

²² ne Dibona ne Nebo ne Bete-dibelatayima

²³ ne Kîyata-ayima ne Bete-gamula ne Bete-meona

²⁴ ne Keliyota ne Bosela ne misoko yonso ya mu buloba bua Moaba, idi hehi ne idi kule.

²⁵ Yehowa udi wamba ne, Bakuhempa lusengu lua Moaba, diboko diandi diakutshibuka.

²⁶ Numukuatshishe maluvu bualu bua wakudilesha ku mesu kua Yehowa; ba mu Moaba nebabunguluke mu bilushi biabo, nebasekibue.

²⁷ Kuena museke Isalele, anyi? Bakumusangana munkatshi mua bibi, anyi? Bua misangu yonso hawatela dina diandi, wewe udi ukuha mutu webe.

²⁸ Nuenu badi bashikame mu Moaba, numuke mu misoko, nushikame munkatshi mua mena a mu mabue; nuikaleku bu nyunyu wa nkutshi udi wibaka disua diandi ku kala kua lubû.

²⁹ Tuakunvua lumu lua dihetu dia Moaba ne udi ne dihetu dinene, tuakunvua kabidi bua kudilesha kuandi, dihetu diandi ne kudisua kuandi, ne bu mudiye unanga tshiadi tshiandi.

³⁰ Yehowa udi wamba ne, Ndi mumanye tshiji tshiandi ne tshidi hatuhu; kudiamba kuandi kakuena kuenze bualu.

³¹ Nunku nendidile Moaba; nengashile bonso ba mu Moaba muadi, nengashile ba mu Kile-helese madilu.

³² Wewe, muonshi wa tumuma tua nvinyo wa mu Sibema, nenkuashile muadi muhite unakuashila Yazê! Matamba ebe akahita ha mutu ha mai manene, akafika tô ne ku Yazê; muhaudi wakudiela ha mamuma ebe a mu tshikondo tshia luya ne ha tumuma tuebe tua nvinyo

³³ Disanka ne tuseku bidi biumushibua mu madimi akadi ne diminu mu buloba bua Moaba; nakukandisha nvinyo bua kayihatuki mu bikaminu, kakuena mukami udi udiata tumuma tua nvinyo ne kuela kua mbila, mbila kayena mbila ya disanka.

³⁴ Heshebona ne Eleale badi badila, tô ne ku Yahaza badi bunvuisha bantu di diabo, ku Soâ tô ne ku Holonayima ne ku Egelata-sheleshiya; bualu bua mai a mu Nimelima kabidi neakame.

³⁵ Yehowa udi wamba ne, Nendekeshe kabidi mundi wa mu Moaba udi ubanda ku tshioshelu tshidi ha mutu ha mukuna, udi ufilahu mulambu wa musenga wa manananshi kudi nzambi yandi.

³⁶ Nunku mutshima wanyi udi ujinga bua Moaba ne muadi bu muadi wa lushiba, mutshima wanyi udi ujinga bua Kile-helese ne muadi bu muadi wa lushiba kabidi. Nunku biuma bia bungi biakadisangishilabo biakujimina.

³⁷ Ha mutu ha muntu yonso hakutuka dibala, ne bakubeya muevu wa muntu yonso; ha bianza bia muntu yonso hadi mputa yakuditaheye, mu tshifuka tshia muntu yonso mudi bilulu bikayabala.

³⁸ Yehowa udi wamba ne, Ha mutu ha nsubu yonso ya mu Moaba ne mu misesu yonso muadi udi kuonso; bualu bua nakutshibula Moaba bu dilonga dia tshianana.

³⁹ Monai mudi Moaba mushimbuke! Monai mudibo badila muadi! Monai mudi Moaba muele nyima wandi bualu bua bundu buakumukuata! Nunku Moaba nealue bu tshintu tshidibo baseka, tshidi tshikuatshisha bonso badi bamunyunguluke buowa.

⁴⁰ Bualu bua Yehowa udi wamba ne, Monai, muena lukuna neahahale mulu bu nyunyu wa mukanku, neolole mahuahua andi bua kuluisha Bena Moaba.

⁴¹ Nebahite misoko yandi bukole, nebanyenge misoko idi ne ngumbu ya mabue; mitshima ya bena bukitu ba mu Moaba neyikale bu mutshima wa mukashi udi ne didinyenga dia ha kuleleye.

⁴² Ba mu Moaba nebashihibue bua kabikadi bu tshisamba tshia bantu, bualu bua bakutamba kudibandisha kudi Yehowa.

⁴³ Yehowa udi wamba ne, Buowa, dijimba ne buteyi bidi biamba kukukuata, wewe udi mushikame mu Moaba.

⁴⁴ Yehowa udi wamba ne, Udi unyema buowa neahone mu dijimba, wahanduka mu dijimba neakuatshike mu buteyi; bualu bua nentumine ba mu Moaba malu â mu tshidimu tshia kubala malu mabi abo.

⁴⁵ Bakadi banyema badi bimana, kabayi ne bukole kabidi, mu mundidimbi wa Heshebona. Bualu bua kadilu kakuluhuka mu Heshebona, ludimi lua kadilu luakuluhuka mu musoko wa Sihona, luakuosha mpala wa Moaba, ne lubombo lua mutu lua bena diyoyo.

⁴⁶ Mulau wikale kûdi, Moaba! Batendeledi ba Kemoshe badi bafue. Bakuya ne bana benu balume mu buhika, bakuya ne bana benu bakashi mu buloba bua bende.

⁴⁷ Yehowa udi wamba ne, Kadi kunshikidilu kua matuku makuabo nempingashe diakalengele dia Moaba kudiye. Eku nkulumbuluisha kua ba mu Moaba.