Yirmeya 41 - Mukanda wa Nzambi Dihungila Dikulukulu ne Dihungila Dihia-dihia 2003

¹ Hashishe, mu ngondo wa muanda mutekete Yishemaele, muana wa Netanya, muana wa Elishama, muena tshiota tshia mukelenge, kapitene ka masalayi a mukelenge, wakalua ne bantu dikumi kudi Gedaliya, muana wa Ahikama, ku Misepa. Hakadibo badia hohamue mu Misepa,

² Yishemaele, muana wa Netanya, ne bantu dikumi bakadi nʼandi bakajuka, bakataha Gedaliya, muana wa Ahikama, muana wa Shafana, ne muele wa nvita, bobo bakashiha muntu wakatekabo gouverneur kudi mukelenge wa Babulona.

³ Yishemaele wakashiha Bena Yuda bonso kabidi bakadi ne Gedaliya mu Misepa; wakashiha bena nvita ba Bena Kasada bakadiku.

⁴ Hakatshiabu ku nyima kua dituku diakashiheye Gedaliya, ne hakadi muntu kayi mumanye muanda eu,

⁵ bantu makumi muanda mukulu bakafuma ku Shekeme, ku Shilo ne ku Samalea, bikale ne miedi yabo mibeya ne bilamba biabo bihandika, baditahe ne mputa kabidi, bakalua ne milambu ya bia kudia ne ya musenga wa manananshi mu Dianza biabo bua kubifila mu nsubu wa Yehowa.

⁶ Yishemaele, muana wa Netanya, wakaluhuka mu Misepa bua kuya kubakidila, wenda mu nshila udila. Hakasangileye nʼabo, wakabambila ne, Luai bienu kudi Gedaliya, muana wa Ahikama.

⁷ Hakafikabo munkatshi mua musoko, Yishemaele, muana wa Netanya, ne bantu bakadi nʼandi bakabashiha, bakabela mu dina dia mai.

⁸ Kadi bantu dikumi bakadi munkatshi muabo bakambila Yishemaele ne, Kutushihi, bualu bua tuetu tudi ne bintu bisokoka mu madimi etu: blé, erge, manyi ne buitshi. Nunku yeye wakabalekela hatuhu, kakabashiha hohamue ne bana babo.

⁹ Dina adi diakadi Yishemaele welamu bitalu bia bantu bakashiheye, hehi ne tshitalu tshia Gedaliya, diakadi dina dinene dia mai diakumbulabo kudi Mukelenge Asa bua ditshina diandi dia Bâsha, mukelenge wa Isalele. Yishemaele, muana wa Netanya, wakadiûsha ne bitalu bia bantu bakashiheye.

¹⁰ Ku nyima Yishemaele wakakuata bantu bakashala mu Misepa, wakaya nʼabo, bana bakashi ba mukelenge mene ne bantu bonso bakashiyabo kudi Nebuzaladana, kapitene ka bansentedi ba masalayi, mu bianza bia Gedaliya, muana wa Ahikama. Yishemaele, muana wa Netanya, wakaya nʼabo mu buhika, wakabanga kusabuka musulu bua kuya kudi Bena Amona.

¹¹ Kadi hakunvua Yohanana, muana wa Kalea, ne tupitene tuonso tua bena nvita tuakadi nʼandi, lumu lua malu mabi akenza Yishemaele, muana wa Netanya,

¹² bakasangisha bantu babo bonso, bakaya kuluangana ne Yishemaele, muana wa Netanya, bakamuheta hehi ne dishiha dinene dia mu Gibeona.

¹³ Hakadi bantu bonso bakadi ne Yishemaele batangila Yohanana, muana wa Kalea, ne tupitene tuonso tua bena nvita tuakadi nʼandi, bantu bonso bakadi ne Yishemaele bakadi ne disanka.

¹⁴ Nunku bantu bonso bakadi Yishemaele mukuate ku Misepa uya nʼabo mu buhika bakalukila, bakahingana kudi Yohanana, muana wa Kalea.

¹⁵ Kadi Yishemaele ne bantu bandi muanda mukulu bakahanduka mu bianza bia Yohanana, muana wa Netanya, bakaya kudi Bena Amona.

¹⁶ Hashishe Yohanana, muana wa Kalea, ne tupitene tuonso tua bena nvita tuakadi nʼandi, bakangata bantu bakasungilabo munkatshi mua bantu bakadi Yishemaele, muana wa Netanya, uya nʼabo mu buhika hakumukeye ku Misepa, ku nyima kua dituku diakashiheye Gedaliya, muana wa Ahikama. Bakadi bena nvita, bakashi, bana ne bantu batungula, bakadi Yohanana uhingasha, mufume ku Gibeona.

¹⁷ Bakaya kabidi, bakashikama mu nsubu wa tshilala benyi wa Kimehama, udi hehi ne Beteleheme, basue kuya kubuela mu buloba bua Ejipitu

¹⁸ bualu bua Bena Kasada. Bakabatshina bualu bua Yishemaele, muana wa Netanya, wakashiha Gedaliya, muana wa Ahikama, wakatekabo gouverneur ha mutu ha buloba abu kudi mukelenge wa Babulona.