Yirmeya 40 - Mukanda wa Nzambi Dihungila Dikulukulu ne Dihungila Dihia-dihia 2003

Yelemiya ne Difuka Dikese Badi Bashala ne Gedaliya

¹ Dî dia Yehowa diakalua kudi Yelemiya ku nyima kua diba diakadi Nebuzaladana, kapitene ka bansentedi ba masalayi, umulekele ku Lama, wakadi mumusangane musuika ne nkanu munkatshi mua ba mu Yelushalema ne ba mu Yuda bakakuatabo, ne bakadibo baya nʼabo mu buhika ku Babulona.

² Kapitene ka bansentedi kakakuata Yelemiya, kakamuambila ne, Yehowa Nzambi webe wakahisha bena musoko eu ne mulau eu.

³ Yehowa wakushikisha dî diandi, wakuenza bu muakambeye; bualu bua nuakenzela Yehowa bibi, kanuakatumikila dî diandi; nunku malu a onso akunukuata.

⁴ Mona, lelu eu ndi nkusulula nkanu ei idi ku bianza biebi. Biwamona ne, Mbimpe bua kuya nʼanyi ku Babulona, lua nʼanyi, ne meme nenkuenzele bimpe. Kadi biwamona ne, Kulua nʼanyi ku Babulona kakuena kuimpe, wanji kushala; tangila, buloba buonso budi ku mpala kuebe; udi mua kuya ku muaba wonso udi umueneka ku mesu kuebe bu muaba muimpe ne mukumbane.

⁵ Biwashala, uhingane kudi Gedaliya, muana wa Ahikama, muana wa Shafana, wakutekabo gouverneur wa misoko ya mu Yuda kudi mukelenge wa Babulona; ushikame nʼandi munkatshi mua bantu; anyi uye biebe kuonso kukuabo kudi kuimpe ku mesu kuebe. Nunku kapitene ka bansentedi kakamuha bia kudia ne matabisha, kakamulekela.

⁶ Hashishe, Yelemiya wakaya kudi Gedaliya, muana wa Ahikama, ku Misepa; wakashikama nʼandi munkatshi mua bantu bakadi bashala mu buloba.

⁷ Hakunvua tupitene tuonso tua masalayi akadi mu mpata ne bena nvita batu kabidi ne, Mukelenge wa Babulona wakuteka Gedaliya muana wa Ahikama, gouverneur mu buloba, wakufila balume ne bakashi ne bana, bobo mene bakadi bahele ne bakadi kabayi baye mu buhika mu Babulona mu bianza biandi,

⁸ bakalua kudi Gedaliya mu Misepa. Menʼabo akadi Yishemaele, muana wa Netanya, Yohanana ne Yonatana, bana balume ba Kalea, Selaya, muana wa Tanehumeta, bana balume ba Efai, Muena Netofa, ne Yezanya, muana wa Muena Mâka, bobo mene ne bantu babo.

⁹ Gedaliya, muana wa Ahikama, muana wa Shafana, wakaditshiha kudibo ne kudi bantu balume babo ne, Kanutshinyi kukuatshila Bena Kasada mudimu. Shikamai mu buloba, nukuatshile mukelenge wa Babulona mudimu, nenuikale ne diakalengele.

¹⁰ Mona, meme hanyi nenshikame mu Misepa, bua kunuakuila ku mpala kua Bena Kasada badi balua kutumona; kadi nuenu nusangishe tumuma tua nvinyo ne mamuma makuabo ne manyi, nubiteke mu mpanza yenu, nushikame mu misoko inuakuangata.

¹¹ Muomumue, hakunvua Bena Yuda bakadi mu Moaba ne munkatshi mua Bena Amona ne mu Edome ne bakadi mu makelenge makuabo onso ne, Mukelenge wa Babulona wakashiya bantu bakuabo mu Yuda ne wakateka Gedaliya, muana wa Ahikama, muana wa Shafana, ku mutu kuabo,

¹² Bena Yuda aba bonso bakumuka mu miaba yonso yakabatumabo, bakahingana, bakalua ku buloba bua Yuda, kudi Gedaliya mu Misepa, bakasangisha nvinyo ne mamuma bia bungi.

Yishemaele Udi Welela Gedaliya Tshifufu

¹³ Yohanana, muana wa Kalea, ne tupitene tuonso tua bena nvita bakadi mu mpata bakalua kudi Gedaliya mu Misepa,

¹⁴ bakamuambila ne, Udi mumanye ne, Bâlisa, mukelenge wa Bena Amona, wakutuma Yishemaele, muana wa Netanya, bua kukushiha, anyi? Kadi Gedaliya, muana wa Ahikama, kakitabusha di diabo.

¹⁵ Nunku Yohanana, muana wa Kalea, wakambila Gedaliya ku Misepa mu musokoko ne, Ndi nkusengelela ne, Witabushe bua meme nye kushiha Yishemaele, muana wa Netanya, muntu kabumanyi. Bualu kai yeye udi ukeba kukushiha, bua Bena Yuda badi badisangisha kudi batangadishibue, ne bua ba mu Yuda badi bashala bafue?

¹⁶ Kadi Gedaliya, muana wa Ahikama, wakambila Yohanana, muana wa Kalea, ne, Kuenji bualu ebu nansha, bualu bua udi ushiminyina Yishemaele.