Yirmeya 37 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bela Yelemiya mu Lukanu

¹ Sedekiya, muana wa Yoshiya, wakasungulabo mukelenge mu buloba bua Yuda kudi Nebukadenesâ, mukelenge wa Babulona, wakadi ukokesha bantu bu mukelenge mu muaba wa Yekoniya, muana wa Yehoyakima.

² Kadi kabakunvua mei a Yehowa akambeye mukana mua muprofete wandi Yelemiya, nansha yeye nansha bena mudimu bandi nansha bantu ba mu buloba abu.

³ Mukelenge Sedekiya wakatuma Yehukala, muana wa Shelemeya, ne Sefanya muakuidi, muana wa Mâseya, kudi Yelemiya muprofete, bamba ne, Utulombele Yehowa, Nzambi wetu.

⁴ Yelemiya wakatshidi utambakana munkatshi mua bantu, bualu bua kabakanji kumubuesha mu lukanu.

⁵ Masalayi a Palô akamana kumuka mu Ejipitu; hakunvuabo Bena Kasada bakadi batshintshimika musoko wa Yelushalema lumu luau, bakumuka ku Yelushalema.

⁶ Mu diba adi dî dia Yehowa dia kalua kudi muprofete Yelemiya ne,

⁷ Yehowa, Nzambi wa Isalele, udi wamba ne, Wambile mukelenge wa Yuda, wakukutuma kundi bua kungebesha lungenyi, dî edi ne, Tangila masalayi a Palô adi Umuka kuabo bua kulua kunukuatshisha, neâhingane mu Ejipitu ku buloba buau.

⁸ Bena Kasada nebalue kabidi bua kuluanganabo ne bena musoko eu, nebabatambe bukole, nebawoshe ne kahia.

⁹ Yehowa udi wamba ne, Kanudidingi, nuamba ne, Bulelela Bena Kasada nebatshimuke, bualu bua kabena batshimuka nansha.

¹⁰ Nansha binuatamba masalayi onso a Bena Kasada adi aluangana nʼenu bukole, biashala bantu badi batahika mputa muntu ne muntu mu ntenta wandi, bakadi kubika ne bi kadi kuosha musoko eu ne kahia.

¹¹ Mu diba adi hakalekelabo kutshintshimika Yelushalema kudi masalayi a Bena Kasada, bualu bua akatshina masalayi a Palô,

¹² Yelemiya wakaluhuka mu Yelushalema bua kuyeye ku buloba bua Benyamina bua kuangataku luandi luseke lua buhianyi munkatshi mua bantu bakadimu.

¹³ Hakafikeye ku mbelu kua tshibi tshia Benyamina, kahita ka bansentedi kakadiku, dina diandi Iliya, muana wa Shelemeya, muana wa Hananya. Kakakuata Yelemiya muprofete, kakamba ne, Wewe udi mulekela bua kuya ku luseke lua Bena Kasada.

¹⁴ Kadi Yelemiya wakamuhingashila dî ne, Au mmei a mashimi; tshiena nnulekela bua Kuya ku luseke lua Bena Kasada. Kadi kahita kakakamunvuila. Nunku Iliya wakakuata Yelemiya, wakaya nʼandi kudi baminyampala.

¹⁵ Baminyampala aba bakadi ne Yelemiya tshiji, bakâmukuma, bakamubuesha mu nsubu wa lukanu wakadi mu nsubu wa Yonatana secrétaire; bualu bua bakasungula nsubu au bu nsubu wa lukanu.

¹⁶ Hakabuela Yelemiya mu nsubu wa lukanu wakadi ne tshina munda ne tusubu tuakadimu, Yelemiya wakashalamu matuku a bungi.

¹⁷ Hashishe mukelenge Sedekiya wakatuma bantu ne bakamubikila kudiye. Mukelenge wakamukonka mu busokoko hakadibo mu nsubu wandi ne, Dî dia Yehowa didiku, anyi? Yelemiya wakamba ne, Didiku. Wakamba kabidi ne, Nebakufile mu bialua bia mukelenge wa Babulona.

¹⁸ Yelemiya wakakonka mukelenge Sedekiya kabidi ne, Nakukuenzela bualu bubi kai, nakuenzela bena mudimu bebe anyi bantu aba bubi kai, bua nuakumbuesha mu nsubu wa lukanu?

¹⁹ Baprofete benu bakanuambila diadi ne, Mukelenge wa Babulona kena ulua kuluangana nʼenu, kena uluangana ne ba mu buloba ebu, badi hanyi?

²⁰ Nunku, mukelenge wanyi, ndi nkutendekena bua kungunvuila; ndi nkusengelela bua kulomba kuanyi kufike kûdi, bua wewe kumpingashi mu nsubu wa Yonatana secrétaire, bua tshifuidimu.

²¹ Hashishe, mukelenge Sedekiya wakela mukenji wandi ne bakabuesha Yelemiya mu tshiendelu tshia balami ba nsubu wa lukanu; bakamuha mutanda wa bidia bia ku musesu wa balambi ba bidia ku dituku ka dituku tô ne hakashika bidia bionso bia mu musoko. Nunku Yelemiya wakashala mu tshiendelu tshia balami ba nsubu wa lukanu.