Yirmeya 36 - Mukanda wa Nzambi Dihungila Dikulukulu ne Dihungila Dihia-dihia 2003

Mukelenge Udi Wosha Mukanda wa Mikenji ya Nzambi

¹ Mu tshidimu tshinai tshia bukelenge bua Yehoyakima, muana wa Yoshiya, mukelenge wa Yuda, dî edi dia Yehowa diakalua kudi Yelemiya ne,

² Wangate mabeshi a mukanda muvungulula, ufundemu mei onso anakukuambila bua kuhisha nʼau Bena Isalele, Bena Yuda ne bisamba bionso bia bantu, ku dituku dinakudianjila kukuambila mu matuku a Yoshiya tô ne ku lelu eu.

³ Bumue Bena Yuda nebunvue bua makenga onso andi mpangidisha kubenzela, bua bobo balekele, muntu ne muntu kuenda mu ushila wandi mubi; bua meme mmanye mua kubabuikidila malu mabi abo ne bubi buabo.

⁴ Nunku Yelemiya wakabikila Baluka, muana wa Neliya; ne Baluka wakafunda mei onso a Yehowa akunvueye mukana mua Yelemiya mu mabeshi a mukanda muvungulula.

⁵ Yelemiya wakambila Baluka ne, Ndi mukandibue bua kubuela mu nsuhu wa Yehowa.

⁶ Nunku ya biebe, ubale mei onso a Yehowa awakafunda, akahatuka mukana muanyi mu matshu a bantu bonso badi mu nsubu wa Yehowa mu dituku didibo bajila bia kudia; wabale kabidi mu matshu a ba mu Yuda bonso badi bafuma mu misoko yabo.

⁷ Bumue, haluabo kutendekena Yehowa, nebalekele kuenda, muntu ne muntu, mu nshila wabo mubi; bualu bua tshifikʼa munda ne tshiji tshikole bia Yehowa bidiye uhisha nʼabi bantu aba bidi binene.

⁸ Baluka, muana wa Neliya, wakenza malu onso akamuambila Yelemiya muprofete, ubala mei a Yehowa akadi mu mukanda mu nsuhu wa Yehowa.

⁹ Mu tshidimu tshitanu tshia mu bukelenge bua Yehoyakima, muana wa Yoshiya, mukelenge wa Yuda, mu ngondo wa tshitema, bantu bonso ba mu Yelushalema ne bantu banso bakafuma ku misoko ya Yuda bua kubuela mu Yelushalema, bakela mukenji bua kujila bia kudia ku mpala kua Yehowa.

¹⁰ Mu diba adi Baluka wakabala mei a Yelemiya akadi mu mukanda mu matshu a bantu bonso mu nsubu wa Yehowa, mu nsubu wa Gemaleya, muana wa Shafana secrétaire, mu tshiendelu tshia kulu, hehi ne tshibuelelu tshia ku tshibi tshihia-tshihia tshia nsubu wa Yehowa.

¹¹ Hakunvua Mikaya, muana wa Gemaleya, muana wa Shafana, mei onso a Yehowa akadi mu mukanda,

¹² yeye wakahueka ku nsubu wa mukelenge, ubuela mu nsubu wa secrétaire. Monai, baminyampala bonso bakadi bashikamamu, menʼabo ne, Elishama secrétaire, ne Delaya, muana wa Shemaya, Elenatana, muana wa Akabo, Gemaleya, muana wa Shafana, Sedekiya, muana wa Hananya, ne baminyampala bakuabo bonso.

¹³ Nunku Mikaya wakabambila mei onso akunvueye hakabala Baluka mukanda mu matshu a bantu bonso.

¹⁴ Bua muanda eu baminyampala bonso bakatuma Yehuda, muana wa Netaniya, muana wa Shelemeya, muana wa Kushi, kudi Baluka, bamba ne, Angata mukanda uwakubala mu matshu a bantu mu tshianza tshiebe, ulue kutudi. Nunku Baluka, muana wa Neliya, wakangata mukanda mu bianza biandi, wakalua kudibo.

¹⁵ Bakamuambila ne, Shikama biebe mpindiu, ubale mu matshu etu. Nunku Baluka wakaubala mu matshu abo.

¹⁶ Hakunvuabo mei onso, bakatangilangana ne buowa, bakambila Baluka ne, Bulelela, netumanyishe mukelenge mei â onso.

¹⁷ Bakakonka Baluka ne, Utuambile dî edi, wewe wakufunda mei â akuluhuka mukana muandi munyi?

¹⁸ Baluka wakabahingashila dî ne, Yeye wakangambila mei â onso mukana muandi, ne meme nakâfunda mu mukanda ne mai a mukanda.

¹⁹ Hashishe, baminyampala bakambila Baluka ne, Ya biebe usokome, wewe ne Yelemiya kabidi, kanumanyishi muntu muaba unudi.

²⁰ Hakashikishabo kuteka mukanda mu nsubu wa Elishama secrétaire, bakaya kudi mukelenge mu tshiendelu tshia nsubu wandi; bakamba mei au onso mu matshu a mukelenge.

²¹ Mukelenge wakatuma Yehudi bua kuangateye mukanda; yeye wakawangata mu nsubu wa Elishama secrétaire. Yehudi wakaubala mu matshu a mukelenge ne mu matshu a baminyampala bonso bakadi ha buihi ne mukelenge bua kamukuatshisha.

²² Mukelenge wakadi ushikama mu nsubu muandi mu tshikondo tshia mashika mu ngondo wa tshitema; kahia kakadi katema muiku ku mpala kuandi.

²³ Hakabala Yehudi mabeshi asatu anyi anai, mukelenge wakâkosa ne kele, wakaela mu kahia kakadi muiku tô ne hakahia mukanda mujima mu kahia kakadi muiku.

²⁴ Kadi bantu aba kabakatshina, kabakahanda bilulu biabo, nansha mukelenge nansha mukuabo wa bantu banai bonso bakunvua mei a onso.

²⁵ Bualu bukuabo, Elenatana ne Delaya ne Gemaleya hakamana kusengelela mukelenge ne, Kuoshi mukanda nansha; kadi yeye kakabunvuila.

²⁶ Mukelenge wakela mukenji kudi Yelamele, muana wa mukelenge, ne kudi Selaya, muana wa Azaliele, ne kudi Shelemiya, muana wa Abedele, bua kukuatabo Baluka mufundi ne Yelemiya muprofete, kadi Yehowa wakabasokoka.

²⁷ Mu diba adi hakamana mukelenge kuosha mukanda ne mei akafunda Baluka akaluhuka mukana mua Yelemiya, dî dia Yehowa diakalua kudi Yelemiya ne,

²⁸ Wangate mukanda mukuabo, ufundemu mei onso akadi mu mukanda wa diambedi wakuoshabo kudi Yehoyakima, mukelenge wa Yuda, mu kahia.

²⁹ Bua Yehoyakima, mukelenge wa Yuda, wambe biebe ne, Yehowa udi wamba ne, Wakuosha mukanda eu wamba biebe ne, Bualu kai wakufundamu mei a ne, Mukelenge wa Babulona nealue bushuwa, neabutule buloba ebu, neashihemu bantu ne nyama kabidi?

³⁰ Nunku Yehowa udi wamba bua Yehoyakima, mukelenge wa Yuda, ne, Yeye kena wikala ne muana wa kushikama mu nkuasa wa bukelenge wa Davidi, ne nebimashe tshitalu tshiandi mu munya ne mu mashika a butuku.

³¹ Nemmukengeshe ne bana bandi ne bena mudimu bandi, bua malu mabi abo; nembatumine ne bantu ba mu Yelushalema ne bantu ba mu Yuda, makenga onso anakubambila, kadi kabakangunvuila.

³² Hashishe, Yelemiya wakangata mukanda mukuabo, wakaha Baluka, muana wa Neliya, wakafundamu mei akaluhuka mukana mua Yelemiya, mei onso akadi mu mukanda wakoshabo mu kahia kudi Yehoyakima, mukelenge wa Yuda. Baluka wakasangishamu mei makuabo a bungi mafuanangane ne a diambedi.