Yirmeya 34 - Mukanda wa Nzambi Dihungila Dikulukulu ne Dihungila Dihia-dihia 2003

Yelemiya Udi Udimusha Sedekiya

¹ Dî dia Yehowa diakalua kudi Yelemiya hakadi Nebukadenesâ, mukelenge wa Babulona, ne masalayi andi onso ne makelenge onso a hanshi ha buloba bakadi muinshi mua bukokeshi buandi ne ba mu bisamba bionso, baluangana ne Yelushalema ne misoko yau yonso:

² Yehowa, Nzambi wa Isalele, udi wamba ne, Ya wambile Sedekiya, mukelenge wa Yuda, ne, Yehowa udi wamba ne, Monai, nenfile musoko eu mu bianza bia mukelenge wa Babulona, ne yeye neawoshe ne kahia.

³ Ne wewe mene kuena uhanduka mu tshianza tshiandi, kadi nebakukuate bushuwa, nebakufile ku tshianza tshiandi; neumonangane ne mukelenge wa Babulona ku mesu mene, ne yeye neayikile nʼebe mpala ne mpala mene; neuye ku Babulona.

⁴ Kadi unvue dî dia Yehowa, wewe Sedekiya, mukelenge wa Yuda! Yehowa udi wamba dî edi bua bualu buebe ne, Wewe kuena ufua ku muele wa nvita;

⁵ neufue mu ditalala ne nebakuimbile musenga wa manananshi, bu muakoshilabo bankambua bebe ne bakelenge bakadi ku mpala kuebe; nebakuashile muadi, bamba ne, Aka, mukelenge! Bua meme nakuamba dî.

⁶ Nunku Yelemiya muprofete wakambila Sedekiya, mukelenge wa Yuda, mei â onso mu Yelushalema,

⁷ hakadi masalayi a mukelenge wa Babulona aluangana ne Bena Yelushalema ne misoko yonso ya mu Yuda yakadi ishala, Lakisha ne Azeka; bua anu misoko ei ya Bena Yuda yakushala munkatshi mua misoko yakadi ne ngumbu.

Bena Yuda Kabakatumikila Tshihungidi Tshiabo ne Sedekiya bualu bua Budishikaminyi bua Bena Ebelu

⁸ Dî dia Yehowa diakalua kudi Yelemiya, hakashikisha mukelenge Sedekiya kuhunga tshihungidi ne bantu bonso bakadi mu Yelushalema bua kubambileye mukenji wa budishikaminyi ne,

⁹ Muntu yonso alekele muhika wandi mulume ne muhika wandi mukashi badi Bena Ebelu, baye hatuhu; bua kakuikadi Muena Yuda wabuesha muanʼabo mu buhika.

¹⁰ Baminyampala bonso ne bantu bonso bakatumikila mukenji eu, bakadi bahunga tshihungidi etshi tshia kulekela bahika babo, ne balume ne bakashi, baye hatuhu, bua kababakuatshi mu buhika kabidi; bakatumikila mukenji eu diambedi, bakabalekela ne, Baye.

¹¹ Kadi ku nyima bakakudimuna muanda eu, bakahingasha bahika aba bakadibo bahikula, ne balume ne bakashi, bakababuesha mu buhika tshiakabidi.

¹² Nunku dî dia Yehowa diakalua kudi Yelemiya ne,

¹³ Yehowa, Nzambi wa Isalele, udi wamba ne, Nakahunga tshihungidi ne batatu benu mu dituku dinakabaluhula mu buloba bua Ejipitu, mu nsubu wa buhika mene ne,

¹⁴ Hakumbana bidimu muanda mutekete, bunudi habu mbua kulekela, muntu ne muntu, muanʼenu wa Bena Ebelu wakudihana kunudi, ne wakunukuatshila mudimu bidimu bisambombo; nudi ne bualu bua kumulekela ne umuke kunudi hatuhu. Kadi batatu benu kabakangunvuila, kabakateleja matshu abo kundi.

¹⁵ Nuenu nuakukudimuka mpindiu, nuakuenza bualu ebu buakadi buakane ku mesu kuanyi, hanuakumanyishangana dî dia budishikaminyi, muntu ne muntu ne muena mutumba nʼandi, ne hanuakuhunga mei bua muanda eu mu nsubu udibo bambikidila.

¹⁶ Kadi nuakukudimuka ne nuakuhetula dina dianyi, nuakudihingashila, muntu ne muntu, bahika banuakadi balekele, balume ne bakashi, ne nuakubabuesha mu buhika tshiakabidi bua kuikalabo bahika benu, balume ne bakashi.

¹⁷ Nunku Yehowa udi wamba ne, Kanuakutumikila dî dianyi bua kumanyishangana dî dia budishikaminyi, muntu yonso kudi muanʼabo, ne muntu yonso kudi muena mutumba nʼandi. Monai, ndi nnumanyisha dî dia budishikaminyi, bua nuenu kufua ku muele wa nvita, ku tshihuhu ne ku tshiole; nennuvuishe bu tshintu tshidi tshikuatshisha makelenge onso ha buloba buowa.

¹⁸ Ndi ngamba bua bantu bakushiha tshihungidi tshianyi, badi kabayi benze bu muakambabo mu tshihungidi atshi tshiakahungabo ku mpala kuanyi, hakahandabo muana wa ngombe nseke ibidi ne hakahitshilabo munkatshi mua nseke ei;

¹⁹ baminyampala ba Bena Yuda ne ba Yelushalema mene, bantu babo batungula, bakuidi ne bantu bonso ba mu buloba ebu bakahitshila munkatshi mua nseke ibidi ya muana wa ngombe.

²⁰ Mbobo bandi ngamba ne, Nembafile mu bianza bia badi nʼabo lukuna, ne mu bianza bia badi bakeba mioyo yabo. Bitalu biabo nebikale bia kudia bia nyunyu ya mulu ne bia nyama ya ha buloba.

²¹ Nenfile Sedekiya, mukelenge wa Yuda, ne baminyampala bandi mu bianza bia bena lukuna babo, ne mu bianza bia badi bakeba mioyo yabo ne mu bianza bia masalayi a mukelenge wa Babulona akumuka kunudi tshituha.

²² Yehowa udi wamba ne, Monai, ndi ngela mukenji, nengahingashe ku musoko eu, nealuangane ne benʼau, neabatambe bukole, neawoshe ne kahia; ne nenvuishe misoko ya mu Yuda bu bikulu, kayiyi ne bantu.