Yirmeya 27 - Mukanda wa Nzambi Dihungila Dikulukulu ne Dihungila Dihia-dihia 2003

Tshimanyinu tshia Mitshi ya Bikokedi

¹ Ku tshibangidilu tshia bukokeshi bua Sedekiya, muana wa Yoshiya, mukelenge wa Yuda, dî dia Yehowa diakalua kudi Yelemiya, diamba ne,

² Yehowa udi ukuambila ne, Udienzele tshikokedi tshia mionshi ne mitshi ne utshiteke mu nshingu muebe;

³ ubitume kudi mukelenge wa Edome, kudi mukelenge wa Moaba, kudi mukelenge wa Bena Amona, kudi mukelenge wa Tulo ne kudi mukelenge wa Sidona, mu bianza bia miloho yabo yakulua ku Yelushalema kudi Sedekiya, mukelenge wa Yuda.

⁴ Welele miloho mukenji bua kuambilayi bakelenge bai ne, Yehowa wa misumba, Nzambi wa Isalele, udi wamba ne, Nuambile banfumu benu ne,

⁵ Nakufuka buloba ebu ne bantu ne nyama bidi hanshi ha buloba, ku bukole buanyi ne ku diboko dianyi diolola; ndi mbidia muntu yonso bu mundi musue.

⁶ Katataka nakufila makelenge â onso mu bianza bia Nebukadenesâ, mukelenge wa Babulona, muntu wanyi; nakumuha nyama yonso ya mu mpata kabidi bua kumukuatshilayi mudimu.

⁷ Ba mu bisamba bionso nebamukuatshile mudimu ne muanʼandi mulume, muana wa muanʼandi mulume, tô ne hakumbana tshikondo tshia buloba buandi bua kufuabu; hashishe ba mu bisamba bia bungi ne bakelenge banene nebamuvuishe biandi muhika wabo.

⁸ Yehowa udi wamba ne, Mu dituku adi, nenkengeshe ba mu tshisamba ne ba mu bukelenge badi kabayi bakuatshila Nebukadenesâ eu, mukelenge wa Babulona, mudimu, ne badi kabayi bitabusha bua kubueshabo nshingu yabo muinshi mua mutshi wa tshikokedi wa mukelenge wa Babulona; nenkengeshe ba mu tshisamba atshi ne muele wa nvita ne tshiole ne tshihuhu, tô ne hanababutula ku tshianza tshiandi.

⁹ Kadi nuenu, kanunvu mei a baprofete benu, anyi a bena lubuku benu, anyi a badi banuambila bilota biabo, anyi a bena muhongo benu anyi a bena lubuku lua muzangu badi banuambila ne, Kanuena nukuatshila mukelenge wa Babulona mudimu.

¹⁰ Bualu bua badi banuambila mei a mashimi bua kunûmusha mu buloba buenu bua kunutuma kule, ne bua meme nnuihatemu, ne bua nuenu mijimine.

¹¹ Yehowa udi wamba ne, Kadi tshisamba tshiabuesha nshingu watshi muinshi mua mutshi wa tshikokedi wa mukelenge wa Babulona ne tshiamukuatshila mudimu, nengitabushe bua ba mu tshisamba atshi bashale mu buloba buabo mene; nebabudime, nebashikamemu.

¹² Nakambila Sedekiya, mukelenge wa Yuda, mei â onso, nakamuambila ne, Nubueshe nshingu yenu muinshi mua mutshi wa tshikokedi wa mukelenge wa Babulona, numukuatshile ne bantu bandi mudimu bua nuikale ne muoyo.

¹³ Bua tshinyi wewe ne bantu bebe nudi basue kufua ku muele wa nvita ne ku tshiole ne ku tshihuhu, bu muakuamba Yehowa bualu bua ba mu tshisamba badi kabayi bakuatshila mukelenge wa Babulona mudimu?

¹⁴ Kanuitabushi mei a baprofete badi banuambila ne, Kanuena nukuatshila mukelenge wa Babulona mudimu; bualu bua badi banuambila mei a mashimi.

¹⁵ Bualu bua Yehowa udi wamba ne, Tshiakubatuma, kadi bobo badi bamba mei a mashimi mu dina dianyi, bua meme nnuihate, ne bua nuenu nujimine, nuenu mene ne baprofete aba badi banuambila mei â.

¹⁶ Nakambila bakuidi ne bantu aba bonso kabidi ne, Yehowa udi wamba ne, Kanuitabushi mei a baprofete benu badi banuambila ne, Tangilai, tshituha tshihi nebalue ne mpanza yakadi mu nsubu wa Yehowa diambedi, nebahime nʼai ku Babulona; bua badi banuambila mei a mashimi.

¹⁷ Kanubunvuidi; nukuatshile mukelenge wa Babulona mudimu, bua nuikale ne muoyo. Musoko eu udi ne bualu bua kulua bikulu bua tshinyi?

¹⁸ Bikalabo baprofete, ne bikala dî dia Yehowa munda muabo, basengelele biabo Yehowa wa misumba mpindiu bua mpanza itshidi ishala mu nsubu wa Yehowa ne mu nsubu wa mukelenge wa Yuda ne mu Yelushalema, bua kayiyi ku Babulona.

¹⁹ Bualu bua Yehowa wa misumba udi wamba dî diandi bua makunshi a tshiamu tshia mitaku, bua tshiowelu tshia mai ne bitekelu biatshi, ne bua mpanza itshidi ishala mu musoko eu,

²⁰ biobi biakadi Nebukadenesâ, mukelenge wa Babulona, kayi muye nʼabi hakayeye ne Yekoniya, muana wa Yehoyakima, mukelenge wa Yuda, mu buhika, diatshimue ne bena butumbi bonso ba mu Yuda ne ba mu Yelushalema, mumuke nʼabo ku Yelushalema, muye nʼabo ku Babulona.

²¹ Bushuwa, Yehowa wa misumba, Nzambi wa Isalele, udi wamba dî edi bua mpanza yonso itshidi ishala mu nsubu wa Yehowa ne mu nsubu wa mukelenge wa Yuda ne mu Yelushalema.

²² Yehowa udi wamba ne, Nebaye nʼai ku Babulona, neyikaleku tô ne ku dituku dindi nyivuluka; mu diba adi nendue nʼai, nenyihingashe mu muaba eu.