Yirmeya 24 - Mukanda wa Nzambi Dihungila Dikulukulu ne Dihungila Dihia-dihia 2003

Bibondo Bibidi bia Mamuma a Nfigi

¹ Yehowa wakahesha bihondo bibidi bia mamuma a nfigi biteka ku mbelu kua ntempelo wa Yehowa, hakadi Nebukadenesâ, mukelenge wa Babulona, mumane kuya ne Yekoniya, muana wa Yehoyakima, mukelenge wa Yuda, ne baminyampala ba mu Yuda ne bena mabaya ne batudi ba biamu, mumuke nʼabo ku Yelushalema, mulue nʼabo ku Babulona.

² Tshibondo tshimue tshiakadi ne mamuma a nfigi mimpe, bu mamuma a nfigi akulua diambedi; tshibondo tshikuabo tshiakadi ne mamuma a nfigi mahite bubi, akadibo kabayi mua kudia.

³ Yehowa wakankonka ne, Yelemiya, udi umona tshinyi? Nakamukudimuna ne, Nfigi; mamuma mimpe mmimpe be; mamuma mabi mmabi be adibo kabayi mua kudia.

⁴ Hashishe dî dia Yehowa diakalua kundi ne,

⁵ Yehowa, Nzambi wa Isalele, udi wamba ne, Bu mundi ntangila mamuma â a nfigi mimpe, nunku nentangile bahika ba ku Yuda, banakûmusha ku muaba eu bua kubatuma ku buloba bua Bena Kasada, bua kubenzela bimpe.

⁶ Nenteke mesu anyi kudibo bua kubenzela bimpe, nendue nʼabo mu buloba ebu kabidi. Nembase kabidi, tshiena mbasasula kabidi; nenukune, tshiena mbatula kabidi.

⁷ Nembahe mitshima ya kummanya ne, Meme ndi Yehowa; bobo nebikale bantu banyi, ne meme nengikale Nzambi wabo; bualu bua nebahingane kundi ne mitshima yabo mijima.

⁸ Bu mundi mpidia mamuma mabi a nfigi adibo kabayi mua kudia bualu bua adi atamba bubi, Yehowa udi wamba ne, Muomumue nempidie Sedekiya, mukelenge wa Yuda, ne baminyampala bandi, Bena Yelushalema badi bashala mu buloba ebu ne bantu aba badi bashikame mu buloba bua Ejipitu.

⁹ Nembafile bua kuikalabo bintu bia kukuatshisha bakuabo buowa munkatshi mua makelenge onso a ha buloba, bua kudivuishilabo tshihendu ne lusumuinu lubi, bu tshintu tshidibo baseka ne bela mulau, mu miaba yonso indualua kubihata.

¹⁰ Nentume muele wa nvita ne tshiole ne tshihuhu munkatshi muabo tô ne hanababutula mu buloba bunakabaha ne batatu babo.