Yirmeya 10 - Mukanda wa Nzambi Dihungila Dikulukulu ne Dihungila Dihia-dihia 2003

Nzambi ya Tshianana ne Nzambi wa Bushuwa

¹ Nuenu, Bena Isalele, unvuai dî dia Yehowa didiye unuambila.

² Yehowa udi wamba ne, Kanulondi nshila wa bisamba bia bantu, kanuikadi ne buowa bua bimanyinu bia mu diulu; bualu bua bisamba ebi bidi ne buowa bualu buabi,

³ bualu bua bilele bia kutendelela kua bantu aba bidi hatuhu. Bidi bu mutshi udi muntu utaha muitu, udi mudimu wa muena tshisui udiye wenza ne bianza biandi.

⁴ Udi ûlengesha ne argent ne or; badi baushimika ne misumadi ne marteau bua kautuki.

⁵ Mpingu yaya idi bu dikunshi diakusongabo, kayena yakula. Idi ne bualu bua muntu kuyituala, bualu bua kayena mua kuenda. Kanuyitshinyi bualu bua kayena mua kuenza bibi, kayena ne bukole bua kuenza bimpe.

⁶ Kakuena mukuabo bu wewe, Yehowa; wewe udi munene, dina diebe didi dinene mu bukole buadi.

⁷ Muntu kai udiku udi kayi ne bualu bua kukunemeka, wewe Mukelenge wa bisamba bia bantu? Bua bukelenge budi buebe; bualu bua munkatshi mua bena meji bonso ba mu bisamba bia bantu, ne munkatshi mua bakelenge babo bonso, kamuena umue bu wewe.

⁸ Kadi bantu kabena ne meji, badi anu ne buhote; diyisha dia mpingu didi hatuhu; idi anu tshituha tshia mutshi!

⁹ Tshidi tshilamika ne tshiamu tshia argent tshiakafumabo nʼatshi ku Tâshishi, ne tshiamu tshia or tshia ku Ufaza, mmudimu wa nsenda ne mutudi wa or; badi ne bilulu bifike ne bikunzubile; buonso buabi mmudimu wa bena lungenyi.

¹⁰ Kadi Yehowa udi Nzambi wa bushuwa; yeye udi Nzambi wa muoyo ne Mukelenge wa tshiendelele. Buloba budi buzakala hikaleye ne tshiji, ne ba mu bisamba bia bantu kabena mua kuimana ku mpala kua tshiji tshiandi.

¹¹ Bualu bua nuenu kubambila budi nunku ne, Nzambi idi kayiyi mifuke diulu ne buloba neyijimine ha buloba ne muinshi mua diulu.

¹² Nzambi nyeye wakafuka buloba ku bukole buandi, wakajadika bia ha buloba ku lungenyi luandi, wakavungula diulu ku meji andi.

¹³ Hambeye dî diandi, tshiona tshia mai a muenshi tshidi mu diulu, ne udi ubandisha dibungi ku matengu a buloba; udi wenzela nvula miele ya nvula, udi uhatula mpehele mu bibutshilu biandi.

¹⁴ Muntu yonso wakuandamuka bu muhote udi kayi ne meji; mutudi wa or yonso wakufuishibua bundu ku mpingu yakusongeye; bualu bua mpingu yakufulabo idi ya mashimi, kakuena muhuya munda muai.

¹⁵ Idi bintu bia hatuhu bua kudinga nʼabi bakuabo; mu tshikondo tshia kuyiteta neyijimine.

¹⁶ Yehowa, luseke lua buhianyi bua Yakoba kena nunku nansha; bualu bua yeye udi mufuki wa bintu bionso; Bena Isalele badi tshisamba tshia buhianyi buandi; Yehowa wa misumba ndina diandi.

Yelemiya Udi Udila bua Dikenga dia Bena Yuda

¹⁷ Angula dibuki diebe hanshi ha buloba, wewe musoko udibo batshintshimika.

¹⁸ Bualu bua Yehowa udi wamba ne, Monai, mu tshikondo etshi nengihate bantu mu buloba, nembatatshishe bikole tô ne hammanyabo.

¹⁹ Mulau udi unkuata bua dikenga dianyi! Mputa wanyi udi usama bikole, kadi nakamba ne, Bulelela, edi ndikenga dianyi dindi ne bua kutuala.

²⁰ Ntenta wanyi udi mushimbuke, mionshi yanyi yonso yakukoseka. Bana banyi bonso bakûmuka kundi, kabenaku kabidi; kakuena mukuabo wa kunvunguluila ntenta wanyi kabidi, anyi wa kundongoluela bilulu bianyi bikudika.

²¹ Bualu bua balami bonso bakuandamuka bahote, kabakulomba lungenyi kudi Yehowa; nunku kabakuheta diakalengele, ne bisumbu bionso bia bimuna biabo biakutangadika.

²² Unvuai! Lumu luakufika, ne tshintompatompa tshifume ku buloba bua ku node tshidiku! Mbua kuyuisha misoko ya mu Yuda bikulu, bishikaminu bia nyama ya mibuabua.

²³ Yehowa, ndi mumanye ne nshila wa muntu kena munda muandi; muntu kena ne bukole munda muandi bua kuendesha nʼabu biendedi biandi bimpe.

²⁴ Yehowa, umbele, kadi umbele mu kulumbulula kuakane; kunkengeshi mu tshiji tshiebe, bua wewe kunvuishi muntu wa hatuhu.

²⁵ Hongolola tshiji tshiebe ha mutu ha bisamba bidi kabiyi bikumanye, ne ha mutu ha bantu badi kabayi babikila dina diebe; bualu bua biakabutula bana ba Yakoba; bulelela, biakubabutula, biakubamana, biakuhaula tshishikaminu tshiabo.