Yezekiyele 7 - Mukanda wa Nzambi Dihungila Dikulukulu ne Dihungila Dihia-dihia 2003

Kunshikidilu kua Malu Kuakufika

¹ Dî dia Yehowa diakalua kundi kabidi ne,

² Wewe, muana wa muntu, amba ne, Mukelenge Yehowa udi wambila ba mu buloba bua Isalele ne, Nshikidilu wafiki, nshikidilu wafiki ku matengu anai onso a buloba!

³ Mpindiu nshikidilu wakufika kunudi; nentume tshiji tshianyi bua tshinukengeshe, nennulumbuluishe bu mudi bienzedi bienu; nennuhingashile difutu bua malu enu onso manyanguke.

⁴ Disu dianyi kadiena dinutangila ne dinanga ne tshiena nnufuila luse; kadi nennuhingashile difutu dia bienzedi bienu bibi, ne nenteke malu enu a bundu hamʼbidi henu; nenumanye ne, Ndi Yehowa.

⁵ Mukelenge Yehowa udi wamba ne, Mulau ha mutu ha mulau! Monai, udi ulua!

⁶ Nshikidilu wafiki, nshikidilu wafiki, udi unutabalela; monai, udi ulua!

⁷ Mulau wenu wakufika kunudi, nuenu ba ha buloba! Tshikondo tshiakufika, difuku didi ha buihi, dituku dia tshintompantompa, kandia mbila ya disanka ha mutu ha mikuna.

⁸ Tshituha tshihi nennuhongoluele tshiji tshianyi tshikole, nemmane difikʼa munda dianyi kunudi; nennulumbuluishe bu mudi bienzedi bienu, nennuhingashile difutu bua malu enu onso a bundu.

⁹ Disu dianyi kadiena dinutangila ne dinanga, tshiena nnufuila luse; nennutumine dikenga bu mudi bienzedi bienu, nenteke malu enu a bundu hamʼbidi henu; nenumanye ne, Meme Mukelenge ntu ngakuma bantu.

¹⁰ Monai, dituku edi didiku! Monai, didi dilua! Kunshikidilu kudi kulua ha buihi. Mulangala webe wa bubi wakuela ntonga, dihetu diakusampila,

¹¹ diyoyo diakudiunda tô ne hakuluadi mulangala wa bubi; kadi kakuena bualu bumue budi bufume kudibo, nansha ku tshintompantompa tshiabo anyi ku diyoyo diabo; kakuena bukokeshi bukole munkatshi muabo.

¹² Tshikondo tshiakufika, dituku didi disemena ha buihi! Musumbi wa bintu kasanki biandi, muhanyi wa bintu kâshi madilu, bua tshiji tshikole tshidi tshihona hamʼbidi ha tshisumbu tshiabo tshionso.

¹³ Bualu bua muhanyi kena wangata kabidi bintu biakuhaneye, nansha bikala bintu biakuhaneye bitshidi ne muoyo; bualu bua tshiji tshianyi tshikole tshidi tshikuata tshisumbu tshionso tshia bantu katshiena tshikudimuka; kakuena muntu wadikolesha mu bubi wahandisha muoyo wandi.

¹⁴ Bakuela mpungi, bakulongolola malu onso; kadi kakuena muntu udi uya ku nvita; bualu bua tshiji tshianyi tshikole tshidi tshihona hamʼbidi ha tshisumbu tshiabo tshionso.

¹⁵ Muele wa nvita udi ha mbelu, tshihuhu ne tshiole bidi munda mua nsubu; udi mu mpata neafue ku muele wa nvita, udi mu musoko neafue ku tshiole ne ku tshihuhu.

¹⁶ Biahanduka bakuabo ba munkatshi mua bantu batshidi bashala ne muoyo, nebikale ha mitu ha mikuna bu nyunyu ya nkutshi ya mu bibanda idila, buonso buabo badila bua bubi buabo.

¹⁷ Bianza biabo nebilembelele bua butekete buabi, binu biabo nebitekete-teketê bu mai.

¹⁸ Nebadiluatshishe ne bilulu bikayabala ne buowa nebubakuate; bundu nebukuate buonso buabo ku mesu, nebatuke mabala ha nutu habo bonso.

¹⁹ Nebimashe bintu biabo bia argent mu misesu, ne tshiamu tshiabo tshia or netshikale kudibo bu tshintu tshidi ne manyanu. Biamu biabo bia argent ne bia or kabiena bimanye mua kubahandisha mu dituku dia tshiji tshikole tshia Yehowa; kabiena bisankisha mitshima yabo, kabiena biukutshisha mafu abo, bualu bua biakadi tshilenduishi tshiakabahonesha mu bubi.

²⁰ Bakaditumbisha bua bulengele bua bintu ebi, ne bakafula nʼabi mpingu ya malu abo a bundu ne a tshinyangu; nunku nakubivuisha bu tshintu tshidi ne bukoya.

²¹ Nembike mu bianza bia bantu ba bende bu bintu bidibo banyenga ku bukole, ne kudi bantu babi ba ba buloba bu bintu bidibo bahaula; ne bobo nebabinyange.

²² Nenkudimune mpala wanyi bua tshibatangidi, ne bobo nebanyange muaba wanyi wa mushinga mukole; banyengi nebabuelemu, nebaunyange.

²³ Fula lukanu; bualu bua buloba ebu budi bûle tente ne kumatshisha kua mashi, ne musoko udi mule tente ne malu mabi makole.

²⁴ Bua muanda eu nenvuishemu bisamba Dia bantu bahite bakuabo bubi, ne bobo nebanyenge nsubu ya bena musoko; nenjimishe bukole buakadi ba mu buloba ebu badisue nʼabu, ne miaba yabo ya tshijila neyibihibue.

²⁵ Kanyinganyinga kalualua; bobo nebakebe ditalala, ne diodio kadiena dikalaku,

²⁶ Kubutuka nekulonde ha nyima ha kubutuka kukuabo, ne lumu nelulonde ha nyima ha lumu lukuabo; nebakebe tshikena kumona kudi muprofete, kadi diyisha dia mikenji kudi muakuidi nedishike, ne bakulu kabena bikala ne bukole bua kulesha bakuabo meji.

²⁷ Mukelenge neabuele mu madilu, muenyampala neadiluatshishe ne bivualu bia kukuatshika kua buowa, ne bianza bia bena buloba nebizakale. Nembenzele anu bu mudi bienzedi biabo, nembalumbuluishe bu mudi midimu yabo; nebamanye ne, Ndi Yehowa.