Yezekiyele 47 - Mukanda wa Nzambi Dihungila Dikulukulu ne Dihungila Dihia-dihia 2003

Mai Adi Ahatuka mu Ntempelo Adi Asangasha Bantu

¹ Wakahingana nʼanyi tô ne ku tshibi tshia ku ntempelo, ekumona! Mai akahatukila muinshi mua mushiku wa mbelu wa ntempelo ne akaya mu nshila wa ku esete (bualu bua mpala wa nsubu wakadi mutangile ku luseke lua esete); ne mai akahueka mu nshila wa ku luseke lua nsubu luakadi lutangila ku sude, ku luseke lua tshioshelu lua ku sude.

² Hashishe wakaluhuka nʼanyi mu nshila wa ku tshibuelelu tshia ku luseke lua ku nôde, wakandombola mu nshila wakadi munyunguluke lumbu lua ntempelo ha mbelu tô ne ku tshibuelelu tshiakadi tshitangila ku luseke lua esete; monai, mai akadi ahatuka ku luseke lua tshibuelelu lua ku sude.

³ Hakaya muntu ku luseke lua ku esete ne luidi mu tshianza tshiandi, wakidikisha coudées tshinunu, wakampitshisha mu mai, ne mai akafika mu tuhombo tuanyi.

⁴ Wakidikisha tshinunu tshikuabo, wakampitshisha mu mai, mai akafika mu binu bianyi. Wakidikisha tshinunu tshisatu, wakampitshisha mu mai, mai akafika mu tshifuka tshianyi.

⁵ Ku nyima wakidikisha tshinunu tshinai, ne akadi musulu unakadi tshiyi mumanye mua kusabuka ku makasa; bualu bua mai akamana kubanda, mai a dilembue a kuowela, musulu wakadi muntu kayi mumanye mua kusabuka ku makasa.

⁶ Yeye wakangambila ne, Muana wa muntu, wakumona muanda eu, anyi? Yeye wakandombola, wakampingasha ku muelelu wa musulu.

⁷ Hanakahinganaku, nakamona muelelu wa musulu muikale ne mitshi ya bungi dishiya dia muamua ne dia munemu.

⁸ Hashishe yeye wakangambila ne, Mai â adi ahueka ku luseke lua ku esete, neahueke tô ne mu Alabâ, neahueke ku Dishiba dia Luehu; habuela mai â mu Dishiba dia Luehu, mai a luehu nealue mai mimpe.

⁹ Hashishe mu miaba yonso idi musulu ubuela, bintu bidi ne muoyo bia mishindu yonso ne bidi bivulangana nebikalemu; minyinyi ya mu mai ya bungi neyikalemu; bualu bua musulu eu udi ufikaku, bua mu miaba yonso idiu ufika mai a luehu neakudimuke mai mimpe kabidi, ne bintu bionso nebikale ne muoyo kuonso kuyaya musulu.

¹⁰ Bilembi bia minyinyi ya mu mai nebimane kukala kua musulu, ku Enegedi tô ne ku Ene-gelayima, nebelemu tuhamba tuabo; minyinyi idimu neyikale ya mishindu ya bungi, neyikumbane ya bungi, bu mudi minyinyi ya mu Mai Manene.

¹¹ Kadi miaba yau idi bitahikidi ne lunteke kayena ilua mimpe; nebayishiye nunku bua bantu bangateku luehu.

¹² Ku mielelu ya musulu, dishiya dia muamua ne dia munemu, mitshi ya mishindu yonso idi ikuama mamuma a kudia neyidiunde, idi ne mabeshi adi kayi afubidila, ne idi ne mamuma adi kâyi atundumbila; kadi neyikuame mamuma mahia-mahia ku ngondo ku ngondo, bualu bua mai adi ayimiamina adi afuma ku tshitendelelu tshia Nzambi; mamuma ai neikale bia kudia, ne mabeshi ai neikale luondahu.

Mikalu ya Buloba ne Diabanyangana Diabu

¹³ Mukelenge Yehowa udi wamba ne, Ei idi mikalu ya buloba bunuabanyangana munkatshi mua bisamba dikumi ne bibidi bia Bena Isalele. Yosefe ikale ne bituha bibidi;

¹⁴ kadi bunudi nʼabu mbua kuabanyangana buhianyi muomumue, muntu umue angate bu mudi muanʼabo wangata. Bualu bua nakaditshiha bua kubuhesha batatu benu; nunku buloba ebu nebuikale kunudi bu buhianyi buenu.

¹⁵ Mikalu ya buloba ikale nunku: Ku luseke lua nôde, ku Mai Manene, mu nshila wa ku Helelona, ku tshibuelelu tshia ku Hamata tô ne ku Sedada,

¹⁶ Hamata, Belota ne Sibelayima, udi ku mukalu wa hankatshi ha Damaseke ne Hamata, ne Hasâ-enona udi ku mukalu wa Haulana.

¹⁷ Nunku mukalu wende ku Mai Manene tô ne ku Hasâ-enona, ku butshika bua Damaseke, ne ku luseke lua ku nôde kuikale tshibuelelu tshia ku Hamata. Eu mmukalu wa ku luseke lua nôde.

¹⁸ Mukalu wa ku luseke lua esete, ubanga ku mukalu wa hankatshi ha Haulana ne Damaseke, ne wa hankatshi ha Gilada ne buloba bua Isalele, wikale musulu wa Yadene; uwidikishe ku butshika bua buloba bua ku luseke lua nôde tô ne ku mai manene a ku luseke lua esete. Eu mmukalu wa buloba ku luseke lua esete.

¹⁹ Mukalu wa ku luseke lua sude uyile ku Tamâ tô ne ku mai a Melibota-kadeshe ne ku kasulu ka Ejipitu tô ne ku Mai Manene. Eu mmukalu wa ku luseke lua sude.

²⁰ Mukalu wa ku luseke lua wesete wikale Mai Manene, ubanga ku butshika bua ku luseke lua sude wenda tô ne ku muaba udi mutangilangane ne tshibuelelu tshia ku Hamata. Eu mmukalu wa ku luseke lua wesete.

²¹ Nunku nuabanyangane buloba munkatshi muenu bu mudi bisamba bia Bena Isalele.

²² Nubutahulule ku kuela kua nshobo bua buikale buhianyi buenu, ne bua bantu ba bende badi bashikame munkatshi muenu ne badi balela bana munkatshi muenu. Bobo bikale kunudi bu bana baledibue mu meku a Bena Isalele; bikale ne buhianyi hohamue nʼenu munkatshi mua bisamba bia Bena Isalele.

²³ Mukelenge Yehowa udi wamba ne, Mu tshisamba tshionso mudi muntu wa bende mushikame, mu muaba au nudi ne bua kumuha buhianyi buandi.