Yezekiyele 46 - Mukanda wa Nzambi Dihungila Dikulukulu ne Dihungila Dihia-dihia 2003

¹ Mukelenge Yehowa udi wamba ne, Tshibi tshia ku tshiendelu tshia munda tshidi tshitangila ku luseke lua esete tshishale tshinshila matuku asambombo adi bantu bakuata mudimu; kadi batshiunzulule Dituku dia Lumingu, batshiunzulule kabidi dituku diabala ngondo.

² Mukokeshi abuelemu hafumeye mu nshila udi uya mu mbalanda wa ku tshibuelelu tshia ha mbelu, imane hehi ne makunshi a tshibuelelu; bakuidi balongolole mulambu wandi wa kuosha ne milambu yandi ya kuvuisha nʼai ditalala, ne yeye atendelele ku mbelu kua tshibuelelu etshi, hashishe aluhuke biandi; kadi kabinshidi tshibi anu habuela diba.

³ Bantu ba mu buloba ebu batendelele ku mpala kua Yehowa hehi ne tshibi tshia ku tshibuelelu etshi mu matuku a Lumingu ne mu matuku abala ngondo.

⁴ Mulambu wa kuoshela Yehowa udi mukokeshi ufila kudiye Dituku dia Lumingu wikale bana ba mikoko basambombo badi kabayi ne tshilema ne tshimpanga tshimue tshidi katshiyi ne tshilema.

⁵ Mulambu wa bia kudia wikale tshihiminu tshia épha tshimue bua kufila ne tshimpanga, ne mulambu wa bia kudia wa kufila ne bana ba mikoko wikale bu mudiye mumanye mua kufila, ne tshihiminu tshia manyi tshia hin tshifidibue ne épha ne épha.

⁶ Mu dituku diabala ngondo mulambu eu wikale muana wa balume wa ngombe udi kayi ne tshilema, ne bana ba mikoko basambombo ne tshimpanga bidi kabiyi ne tshilema.

⁷ Alongolole mulambu wa bia kudia, tshihiminu tshia épha bua kutshifila ne ngombe, tshihiminu tshia épha bua kutshifila ne tshimpanga, ne bungi budiye mumanye mua kufila ne bana ba mikoko, ne tshihiminu tshia manyi tshia hin tshifidibue ne épha ne épha.

⁸ Habuela mukokeshi mu tshibuelelu atshi, abuele mu nshila udi uya mu mbalanda wa tshibuelelu, ne ahatukilemu muomumue.

⁹ Kadi halua bantu ba mu buloba ebu ku mpala kua Yehowa mu bikondo biakusunguleye bua masanka a bidia, muntu wabuela bua kutendelela Yehowa ayile mu nshila wa ku tshibuelelu tshia ku luseke lua nôde, aluhukile mu nshila udi uya mu tshibuelelu tshia ku luseke lua sude; kadi wabuela mu nshila wa ku tshibuelelu tshia ku luseke lua sude aluhukile mu nshila udi uya mu tshibuelelu tshia ku luseke lua nôde; kahinganyi mu nshila wa ku tshibuelelu kuakubueleleye, kadi aluhukile mu nshila udi mululame ku mpala kuandi.

¹⁰ Habuela bantu kabidi, mukokeshi ikale munkatshi muabo, abuele nʼabo diatshimue; haluhukabo, buonso buabo baluhuke diatshimue.

¹¹ Mu matuku a masanka a kudia bidia ne mu bikondo bisungula bia bidia abi mulambu wa bia kudia wikale tshihiminu tshia épha bua kutshina ne ngombe, tshihiminu tshia épha bua kutshifila ne tshimpanga, ne bungi budiye mua kufila ne bana ba mikoko, ne tshihiminu tshia hin tshia manyi tshifidibue ne épha ne épha.

¹² Halongolola mukokeshi mulambu wa kufila bua disanka dia mu mutshima wandi, hafileye nansha mulambu wa kuosha nansha mulambu wa kuvuisha hau ditalala bu mulambu wa kusangileye nʼau Yehowa, bamunzuluile tshibi tshia ku tshibuelelu tshia ku luseke lua esete, afile mulambu wandi wa kuosha anyi milambu yandi ya kuvuisha nʼai ditalala bu mudiye wenza Dituku dia Lumingu; hashishe aluhuke biandi, binshile tshibi ku nyima kuandi.

¹³ Wewe longolola muana wa mukoko wa tshidimu tshimue udi kayi ne tshilema bua kumufila kudi Yehowa bu mulambu wa buatshia-buatshia; ku dinda ne ku dinda waulongolola.

¹⁴ Ku dinda ne ku dinda longolola mulambu wa bia kudia, tshituha tshisambombo tshia épha umue, tshituha tshisatu tshia hin wa manyi bua kusangisha nʼau bukula; eu mmulambu wa bia kudia udibo ne bua kufila kudi Yehowa ku dituku ku dituku bu mukenji wandi wa tshiendelele.

¹⁵ Balongolole nunku muana wa mukoko ne mulambu wa bia kudia ne manyi, ku dinda ku dinda, bua kubifila bu mulambu wa kuosha buatshia-buatshia.

¹⁶ Mukelenge Yehowa udi wamba ne, Biafila mukokeshi tshintu kudi umue wa hana bandi ba balume, ebu mbuhianyi buandi, nebuikale bua bana bandi ba balume; budi luhetu luabo ludibo bangata bu buhianyi.

¹⁷ Kadi biafileye tshintu tshia mu bintu bia buhianyi buandi kudi umue wa bahika bandi, tshishale kudi muntu eu tô ne ku tshidimu tshiaheteye budishikaminyi buandi; mu tshidimu atshi tshintu atshi tshihingane kudi mukokeshi; kadi buhianyi budi muanʼandi wa balume uhiana bushale kudiye.

¹⁸ Bualu bukuabo kabidi, mukokeshi kanyengi tshituha tshia buhianyi bua bantu bakuabo bua kubihata mu buloba buabo; angate tshituha tshia luhetu luandi mene bua kuhesha bana bandi balume buhianyi buabo, bua bantu banyi kabatangadiki eku ne eku bualu bua bakabumusha mu buloba buabo.

¹⁹ Hashishe yeye wakahitshila nʼanyi mu mushiku wa mbelu udi hehi ne tshibuelelu, wakabuela nʼanyi mu nsubu nujidile bakuidi yakadi mitangile ku luseke lua nôde; nakatangila muaba mukuabo kundekelu kuai ku luseke lua wesete.

²⁰ Yeye wakangambila ne, Eu mmuaba udi bakuidi ne bua kulambila mulambu wa disambuka dia mikenji ne mulambu wa kubuikila nʼau mabi, ne wa kuoshela mulambu wa bia kudia mu nfulu; bua kabahatuki nʼabi ku tshiendelu tshia ha mbelu bua kuvuisha bantu ba hatuhu bu ba tshijila.

²¹ Hashishe yeye wakaluhuka nʼanyi, wakabuela hanyi mu tshiendelu tshia ha bule, wakampitshisha hehi ne matumba atshi anai; ne nakamona mu ditumba ne mu ditumba dia tshiendelu etshi ne lubanza luakadiku.

²² Mu matumba anai a tshiendelu tshia ha mbelu muakadi mbanza yaya minyungulula ne bimanu; buonso buai inai yakadi bunene bumue, coudées makumi anai mu bule ne coudées makumi asatu mu butshiama.

²³ Mulongo wa matafuadi wakadi munyunguluke lubanza ne lubanza, ne bakenza meku muinshi muau mu nseke yonso,

²⁴ Yeye wakangambila ne, Abi mbilambilu bidi benji ba mudimu ba mu ntempelo ne bualu bua kulambila bantu milambu yabo.