Yezekiyele 44 - Mukanda wa Nzambi Dihungila Dikulukulu ne Dihungila Dihia-dihia 2003

¹ Hashishe yeye wakalukila nʼanyi mu nshila wa ku tshibuelelu tshia ha bule tshia tshitendelelu, tshibuelelu tshidi tshitangila ku luseke lua esete, ne tshiakadi tshinshila.

² Yehowa wakangambila ne, Tshihi tshia ku tshibuelelu etshi tshishale tshinshila, kabatshiunzuludi, ne muntu kabuedimu; bualu bua Yehowa, Nzambi wa Isalele, wakabuelamu, nunku tshishale tshinshila.

³ Mukokekeshi nkayandi udi mua kushikamamu bua kudia bidia ku mpala kua Yehowa; yeye abuele mu nshila wa mu mbalanda wa tshibuelelu, ne ahatukile mu nshila eu muomumue.

⁴ Hashishe yeye wakalua nʼanyi mu nshila wa ku tshibuelelu tshia ku luseke lua nôde tô ne ku mpala kua ntempelo; nakatangila, ekumona! Butumbi bua Yehowa buakusha tshitendelelu tshia Yehowa tente, ne nakatua mpala wanyi hanshi.

⁵ Yehowa wakangambila ne, Muana wa muntu, dimuka, mona ne mesu ebe, unvua ne matshu ebe, malu onso andi nkuambila bua bilele bia kulonda mu ntempelo wa Yehowa ne hua mikenji yandi yonso; mona bimpe bibuelelu bia ku tshitendelelu ne miaba ya kuhatukila.

⁶ Ambila bantombokedi ba mu tshisamba tshia Bena Isalele ne, Mukelenge Yehowa udi wamba ne, Nuenu Bena Isalele, kanuikadi ne malu enu a tshinyangu kabidi,

⁷ bualu bua nuakulua ne bantu ba mu bisamba bia bende mu tshitendelelu tshianyi, badi kabayi batengula mu mutshima ne kabayi batengula mu mubidi, bua kunyengabo nsubu wanyi, hanuafila bia kudia bianyi, manyi ne mashi mene! Nuakushiha tshihungidi tshianyi, hanuakutentekasha bubi ebu ha mutu ha malu mabi enu onso a tshinyangu.

⁸ Kanuakulama bintu bianyi bia tshijila bimpe, kadi nuakateka balami ba hatuhu bua kulama tshitendelelu tshianyi.

⁹ Bua muanda eu Yehowa udi wamba ne, Muntu wa mu tshisamba tshia bende, udi kayi mutengula mu mutshima anyi mubidi, wa mu bantu aba bonso ba mu bisamba bia bende badi munkatshi mua Bena Isalele, kabuedi mu tshitendelelu tshianyi.

¹⁰ Kadi Bena Lewi bakumuka kundi, bakaya kule, hakahambuka Bena Isalele aba bakandekela bua kulondabo mpingu yabo, badituadile dihila diabo bua mibi yabo.

¹¹ Nebikale bakuatshi ba mudimu mu tshitendelelu tshianyi, bikale ne mudimu wa kulama bibuelelu bia ku ntempelo, bakuate mudimu wabo munda mua ntempelo, bashihele bantu milambu yabo ya kuosha ne milambu mikuabo, bimane ku mpala kuabo bua kubakuatshila mudimu.

¹² Bualu bua bakakuatshila bantu mudimu ku mpala kua mpingu yabo, ne bakahia tshilenduishi kudi Bena Isalele bua kubashindisha mu malu mabi, nunku Mukelenge Yehowa udi wamba ne, Nakubisha tshianza tshianyi bua kuditshiha bua bualu buaho ne, Badi ne bualu bua kudituadila dihila dia malu mabi abo.

¹³ Kabasemenyi ha buihi nʼanyi bua kunkuatshila mudimu bu bakuidi banyi, ne kabafiki hehi ne tshintu tshimue tshia munkatshi mua bintu bianyi bia tshijila, tshia bintu bianyi bihite tshijila mene; kadi badituadile bujitu bua bundu buabo ne bua malu mabi abo akuenzabo.

¹⁴ Kadi nembasungule bu balami ha ntempelo wanyi, bua kukuatabo mudimu udimu ne bua kuenzabo malu onso adibo benzamu.

¹⁵ Mukelenge Yehowa udi wamba ne, Kadi bakuidi ba munkatshi mua Bena Lewi, bana ba Sadoka, bakadi balama tshitendelelu tshianyi hakahambuka Bena Isalele bua kumuka kundi, bobo bine basemene ha buihi hanyi bua kunkuatshilabo mudimu; bimane ku mpala kuanyi bua kufila manyi ne mashi kundi.

¹⁶ Babuele mu tshitendelelu tshianyi, balue ku mesa anyi bua kunkuatshila mudimu, ne bobo balame malu anyi.

¹⁷ Habuelabo mu bibuelelu bia ku tshiendelu tshia munda, baluate bivualu bia lin; kabikadi ne tshintu tshia miosa ya mikoko hamʼbidi habo hatshidibo bakuata mudimu munda mua luhangu lua ku tshiendelu tshia munda, anyi mu tshitendelelu mene.

¹⁸ Bikale ne bitambala bia lin bisuike ku mitu kuabo, baluate mihanu ya lin mu bimono biabo; kabaluatshi tshintu tshidi mua kubahatuisha tshisululu.

¹⁹ Hahatukabo bua kubuela mu tshiendelu tshia ha bule, bua kusangakena ne bantu bakuabo, bavule bivualu bidibo baluata bakuatabo mudimu mu ntempelo, babiteke mu nsubu yaya ya tshijila; baluate bivualu bikuabo, bua kabavuishi bantu bakuabo bu ba tshijila ku bivualu biabo.

²⁰ Kabakungudi mitu yabo ne dihaya ne kabitabushi bua nsuki yabo ilue mile; kadi bakose nsuki yabo ne tushola.

²¹ Kabanu nvinyo kudi umue wa bakuidi, habueleye mu tshiendelu tshia munda mua ntempelo.

²² Muakuidi kabaki mukashi wa mu lufuila wa hatuhu bu mukashi wandi, anyi mukashi mumusha kudi bayandi, kadi abake mushikankunde utshidi kamama wa munkatshi mua hana ba mu tshisamba tshia Bena Isalele, anyi mukashi wa mu lufuila wa munga muakuidi.

²³ Bayishe bantu banyi ditahuluka didi hankatshi ha bintu bia tshijila ne bintu bia hatuhu, habaleshe mua kujingulula malu adi atahulula bintu bidi bibiha ku bintu bidi kabiyi bibiha.

²⁴ Halua tshilumbu ku mpala kuabo, batshiunvue bua kutshilumbulula, batshikose bu mudi mikenji yanyi yamba; balonde mikenji yanyi ne batumikile mei anyi hua bikondo bianyi bia bidia bia disanka binakusungula; banemeke matuku anyi a Lumingu.

²⁵ Kabafiki mu muaba udi muntu mufue bua kudinyanga; kadi bua tatu, anyi bua mamu, anyi bua muanʼandi wa balume, anyi bua muanʼandi wa bakashi, anyi bua muanʼabo wa balume, anyi bua muanʼabo wa bakashi wa difu dimue udi kayi ne mulume, badi bamanye mua kudinyanga.

²⁶ Hamulengeshabo ku nyima, bamubadile matuku muanda mutekete.

²⁷ Mukelenge Yehowa udi wamba ne, Mu dituku didiye ubuela mu tshitendelelu, mu tshiendelu tshia munda mua luhangu, bua kukuata mudimu wa mu tshitendelelu, afile mulambu wandi wa kubuikila nʼau bubi.

²⁸ Kabikadi ne buhianyi, bualu bua meme ndi buhianyi buabo; kanubahi luhetu mu Isalele, bualu bua meme ndi luhetu luabo.

²⁹ Badie mulambu wa bia kudia, mulambu wa kubuikila nʼau bubi ne mulambu wa kumusha nʼau dihila; tshintu tshionso tshidibo bajidila kudi Nzambi mu buloba bua Isalele tshikale tshiabo.

³⁰ Bidi bihita buakane munkatshi mua bintu binudi nuhuola diambedi, ne maha a munkatshi mua bintu bionso binudi nufila kudi Nzambi, bikale bintu bia bakuidi. Nuheshe bakuidi bukula buhite buimpe bua mampa anudi milamba, bua disanka dikale mu nsubu muenu.

³¹ Bakuidi kabadi tshintu tshidifuila anyi tshituanya, kudi nyunyu anyi kudi nyama.