Yezekiyele 42 - Mukanda wa Nzambi Dihungila Dikulukulu ne Dihungila Dihia-dihia 2003

¹ Hashishe yeye wakalua nʼanyi mu tshiendelu tshia munda tshiakadi ku luseke lua nôde, wakalua nʼanyi ku nsubu wakadi mululamangane ne muaba au wa coudées makumi abidi ne wakadi buludiludi ne nsubu mukuabo wa ku luseke lua nôde.

² Bule bua nsubu eu wakadi ne nsubu isatu mitentakasha buakadi coudées lukama, butshiama buandi buakadi coudées makumi atanu.

³ Buludiludi ne muaba wawa wa coudées makumi abidi wakadi mu tshiendelu tshia munda mua ntempelo, ne buludiludi ne nshila mulongolola ne mabue hanshi ne munyunguluke tshiendelu tshia ha mbelu, tshitadikilu tshia nsubu muisatu wa mulu tshiakadi tshitangilangana ne tshia nsubu wakadi buludiludi nʼandi

⁴ Ku mpala kua nsubu ei kuakadi nshila, butshiama buandi coudées dikumi, bule buandi coudées lukama; ne mishiku ya mbelu ya nsubu yakatangila ku nshila eu.

⁵ Nsubu ya ha mutu yakahita ya muinshi kukeha mu butshiama, bualu bua bitadikilu bia ku mpala kuai biakakehesha butshiama buai ne dikeha dihite dia nsubu ya hankatshi ne ya muinshi.

⁶ Bualu bua bakasa nsubu ei mu milongo isatu, mulongo mukuabo mutentakasha ha mutu ha munga, ne kayakadi ne makunshi bu muakadi nsubu ya mu tshiendelu tshia ha mbelu; nunku nsubu ya ha mutu yakatamba ya muinshi ne ya hankatshi kukeba mu butshiama.

⁷ Lumbu lua ha mbelu, luakadi tshimanu ku nsubu wakadi buludiludi ne tshiendelu tshia ha mbelu, luakadi ne bule bua coudées makumi atanu;

⁸ bualu bua nsubu wakadi buludiludi ne tshiendelu tshia ha mbelu wakadi anu coudées makumi atanu mu bule; kadi nsubu wakadi buludiludi ne ntempelo wakadi coudées lukama mu bule buandi.

⁹ Muinshi mua nsubu ai muakadi tshibuelelu tshiai ku luseke lua esete, hakasua muntu kubuelamu ufuma ku tshiendelu tshia ha mbelu.

¹⁰ Ku luseke lua sude, ku mpala kua muaba wa coudées makumi abidi ne buludiludi ne nsubu mukuabo, kuakadi mulongo mukuabo wa nsubu.

¹¹ Nshila wakadi ku mpala kuau, ne nsubu yau yakadi bu nsubu ya ku luseke lua nôde, yakadi ne bule buobumue ne butshiama buobumue; yakadi ne miaba ya kuhatukamu ne malu makuabo malongolola muomumue,

¹² ne bibuelelu biai biakadi bifuanangana nʼabi, kadi biakatangila ku luseke lua Sude. Tshibuelelu tshiakadi kundekelu kua nshila, ku mpala kua lumbu lua ha mbelu, hakasua muntu kubuelamu ufuma ku luseke lua esete.

¹³ Yeye wakangambila ne, Nsubu ya ku luseke lua node ne nsubu ya ku luseke lua sude idi mitangile ku muaba wa coudées makumi abidi idi nsubu ya tshijila, idi miaba idi bakuidi badi basemena ha buihi ne Yehowa ne bua kudila bintu bihite tshijila, idibo ne bua kutekamu bintu bihite tshijila, milambu ya bia kudia, milambu ya kubuikila nʼai mibi ne milambu ya disambuka dia mikenji; bualu bua muaba eu udi wa tshijila.

¹⁴ Habuela bakuidi mu muaba wa tshijila wa mu ntempelo, kababatukimu bua kubuela mu tshiendelu tshia ha mbelu diambedi kabayi banze kutekamu bilulu biakadibo baluata hakadibo benza mudimu wabo, bua bidi bia tshijila; badi ne bua kuluata bilulu bikuabo, hashishe badi bamanye mua kubuela mu luseke lua ntempelo ludi bantu bakuabo bamanye mua kubuela.

¹⁵ Hakashikisheye kuidikisha nsubu ya munda mua ngumbu yakadi minyunguluke ntempelo, wakalua nʼanyi mu nshila wakadi muye mu tshibuelelu tshidi tshitangila ku luseke lua esete, wakidikisha ntempelo mujima nseke yandi yonso.

¹⁶ Wakadianjila kuidikisha luseke lua ku esete ne luidi, luakadi coudées nkama itanu bu tshidikishilu tshia luidi.

¹⁷ Wakidikisha luseke lua node, luakadi nkama itanu bu tshidikishilu tshia luidi.

¹⁸ Wakidikisha luseke lua sude, luakadi coudées nkama itanu bu tshidikishilu tshia luidi.

¹⁹ Wakatshunguluka ne wakaya ku luseke lua wesete, wakaluidikisha, luakadi coudées nkama itanu ku tshidikishilu tshia luidi.

²⁰ Wakidikisha ntempelo ku nseke yandi inai, wakadi ne lumbu lunyunguluke ku nseke yonso, bule bualu coudées nkama itanu ne butshiama bualu coudées nkama itanu, bua luhandulule malu a tshijila ku malu makuabo a hatuhu.