Yezekiyele 40 - Mukanda wa Nzambi Dihungila Dikulukulu ne Dihungila Dihia-dihia 2003

Tshikena Kumona tshia Ntempelo

¹ Mu tshidimu tshia makumi abidi ne tshitanu tshia buhika buetu, ku tshibangidilu tshia tshidimu, mu dituku dia dikumi dia ngondo, tshiakadi tshidimu tshia dikumi ne tshinai tshia ku nyima kua tshidimu tshiakashihabo musoko, mu dituku adi mene tshianza tshia Yehowa tshiakadi hamʼbidi hanyi, ne yeye wakalua nʼanyi kuinaku.

² Mu bikena kumona bia Nzambi yeye wakalua nʼanyi mu buloba bua Isalele, wakanshikika ha mutu ha mukuna mule mule, kuakadi nsubu muidikishe hanshi bu musoko ku luseke lua sude.

³ Yeye wakalua nʼanyi mu muaba au, ekumona! Muntu wakadiku wakadi ne tshinfuanyi bu tshia tshiamu tshia mitaku, muikale ne muonshi wa lin mu tshianza tshiandi, ne luidi lua kuidikisha nʼalu; wakimana biandi mu tshibuelelu.

⁴ Muntu eu wakangambila ne, Muana wa muntu, mona ne mesu ebe, unvua ne matshu ebe, teka mutshima webe ku malu andualua kukulesha; bualu bua bakulua nʼebe kunoko bua meme kukulesha malu â; ambila Bena Isalele malu onso audi umona.

⁵ Nakamona lumbu lunyunguluke nsubu nseke yonso. Muntu au wakaluidikisha ne luidi luakadi mu tshianza tshiandi, bule bualu buikale coudées mile isambombo, coudée umue muikale bu coudée umue ne ntanta wa tshianza; wakidikisha mulumbu wa lumbu, wakausangana muikale luidi lumue, ne bule bualu bua mulu buakadi luidi lumue.

⁶ Hashishe yeye wakalua nʼanyi ku tshibuelelu tshidi tshitangila ku luseke lua esete; hakabandeye ku tshibandilu tshiatshi, wakidikisha mushiku watshi wa mbelu, wakaumona muikale luidi lumue mu butshiama buau; mushiku wa mbelu mukuabo mutangilangane ne tshitendelelu wakadi luidi lumue mu butshiama buau.

⁷ Nsubu yonso ya bansentedi yakadi ne bule bua luidi lumue ne butshiama bua luidi lumue, ne muaba wa hankatshi ha nsubu ne nsubu wakadi coudées itanu; ne tshibuelelu tshia ku mbalanda wa ku tshibi tshiakatangilangana ne tshitendelelu tshiakadi bule bua luidi lumue.

⁹ Wakidikisha mbalanda wa ku tshibuelelu, ne wakadi coudées muanda mukulu mu butshiama buandi, ne biluwa biandi biakadi coudées ibidi mu butshiama bua tshiluwa ne tshiluwa; ne mbalanda wa tshibuelelu wakatangilangana ne tshitendelelu.

¹⁰ Nsubu ya bansentedi ya munda mua tshibuelelu tshia ku luseke lua esete yakadi isatu ku luseke lua tshinga tshianza ne isatu ku luseke lua tshianza tshikuabo; buonso buai yakadi bunene bumue; biluwa bia ku luseke ne ku luseke biakadi bunene bumue kabidi.

¹¹ Wakidikisha butshiama bua mushiku wa mbelu wa ku tshibuelelu etshi, wakadi coudées dikumi; ne butshiama bua nshila wa munda mua tshibuelelu buakadi coudées dikumi ne isatu.

¹² Ku mpala kua nsubu ne nsubu ya bansentedi kuakadi tshididi tshiakajika munda mua tshibuelelu ku luseke ne ku luseke coudée umue, ne nsubu yonso ya bansentedi yakadi coudées isambombo ku luseke ne ku luseke.

¹³ Wakidikisha butshiama bua tshibuelelu ku nfundu kua nsubu umue wa bansentedi tô ne ku nfundu kua nsubu mukuabo wa bansentedi, buakadi coudées makumi abidi ne itanu, ku tshibi tô ne ku tshinga tshibi.

¹⁴ Wakidikisha bule bua mbalanda, buakadi coudées makumi abidi mu muaba muakadi tshiendelu tshia munda mua ntempelo tshituangana ne mbalanda eu.

¹⁵ Nunku, ku mushiku wa mbelu wa ku mpala kua tshibuelelu tô ne ku mushiku wa mbelu wakadi ku mpala kua mbalanda eu kuakadi coudées makumi atanu.

¹⁶ Madidishi mikale ne tubaya tutshiamakashe akadi mu bimanu bia nsubu ya bansentedi, mu miaba ya hankatshi ha nsubu ei, ne mu bimanu bia mbalanda, mu nseke yonso ya munda mua tshibuelelu, ne ha tshiluwa ne tshiluwa tshia tshibuelelu hakadi bifuanyikishi bia mabue a ngashi.

¹⁷ Hashishe wakalua neanyi mu tshiendelu tshia ntempelo tshia mu luhanza, ne nakamona nsubu mitangilangane ne nshila mulongolola ne mabue hanshi munyunguluke tshiendelu; nsubu makumi asatu yakadiku ne mpala yai mitangile ku nshila eu.

¹⁸ Nshila eu wakayila hehi ne bibuelelu, ne butshiama buandi buakadi muomumue ne bule bua bibuelelu; nshila eu wakadi wa mu tshibanda.

¹⁹ Ku nyima wakidikisha butshiama bua tshiendelu tshia hankatshi ha mushiku wa tshibuelelu tshia mu tshibanda tô ne ku mushiku wa tshibuelelu tshiakayila ku tshiendelu tshia munda, buakadi coudées lukama ku luseke lua esete ne ku luseke lua nôde muomumue.

²⁰ Wakalua nʼanyi ku tshibuelelu tshia mu tshiendelu tshia mu lubanza tshiakatangila ku luseke lua nôde, wakidikisha bule buatshi ne butshiama buatshi.

²¹ Tshiakadi ne nsubu isatu ya bansentedi ku luseke elu ne nsubu isatu ku luseke lukuabo, biluwa biatshi ne mbalanda watshi biakadi ne bunene buobumue ne bua bia tshibuelelu tshia kumudilu. Bule buatshi buakadi coudées makumi atanu ne butshiama buatshi buakadi coudées makumi abidi ne itanu.

²² Madidishi atshi, mbalanda watshi, mabue atshi a ngashi, biakadi ne luidi luolumue ne lua tshibuelelu tshia ku luseke lua esete. Bakabanda ku tshibandilu tshiakadi ne bidiatshilu muanda mutekete; ne mbalanda watshi wakatangilangana ne munda mua ntempelo.

²³ Tshiendelu tshia munda mua ntempelo tshiakadi ne tshibuelelu tshitangilangane ne tshibuelelu tshia mu lubanza, tshikuabo ku luseke lua nôde ne tshikuabo ku luseke lua esete; wakidikisha muaba wa hankatshi ha tshibuelelu tshia munda tô ne ku tshibuelelu tshia mu luhanza, wakadi coudées lukama.

²⁴ Wakandombola ku luseke lua Sude; nakamona tshibuelelu tshitangile ku luseke lua Sude. Wakidikisha biluwa biatshi ne mbalanda watshi, wakabimona hikala ne luidi luolumue ne lua bibuelelu bikuabo.

²⁵ Tshibuelelu ne mbalanda watshi biakadi ne madidishi mu nseke yatshi yonso, ne akadi muomumue ne madidishi makuabo. Bule buatshi buakadi coudées makumi atanu, butshiama buatshi buakadi coudées makumi abidi ne itanu.

²⁶ Tshiakadi ne tshibandilu tshia bidiatshilu muanda mutekete bua bantu babandilehu, ne mbalanda watshi wakatangilangana ne munda mua ntempelo. Tshiakadi ne bifuanyikishi bia mabue a ngashi ha biluwa biatshi, dibue dimue ku luseke elu ne dibue dimue ku luseke lukuabo.

²⁷ Tshiendelu tshia munda mua ntempelo tshiakadi ne tshibuelelu tshitangilangane ne tshibuelelu etshi tshia ku luseke lua sude; yeye wakidikisha muaba wa hankatshi ha tshibuelelu ne tshibuelelu, wakadi coudées lukama.

²⁸ Hashishe yeye wakalua nʼanyi ku tshiendelu tshia munda mua ntempelo, uyilamu ku tshibuelelu tshia ku luseke lua sude. Wakidikisha tshibuelelu atshi ne luidi luakidikishileye nʼalu bikuabo,

²⁹ nsubu yatshi ya bansentedi, biluwa biatshi, ne mbalanda watshi; ne wakabisangisha bikale ne bunene buobumue ne bua bikuabo. Tshibuelelu ne mbalanda watshi biakadi ne madidishi ku nseke yabi yonso; bule buatshi buakadi coudées makumi atanu, ne butshiama buatshi buakadi coudées makumi abidi ne itanu.

³⁰ Mbalanda watshi wakadi ne bule bua coudées makumi abidi ne butshiama bua coudées itanu;

³¹ ne mbalanda wakatangilangana ne tshiendelu tshia mu lubanza. Bifuanyikishi bia mabue a ngashi biakadi ha biluwa biatshi, ne tshibandilu tshiatshi tshiakadi ne bidiatshilu muanda mukulu.

³² Hashishe wakalua nʼanyi mu tshiendelu tshia munda ku luseke lua ku esete; wakidikisha tshibuelelu tshia munda bu muakidikisheye bikuabo,

³³ ne nsubu yatshi ya bansentedi ne biluwa biatshi ne mbalanda watshi, wakabimona bikale ne bunene buobumue ne bua bikuabo. Tshibuelelu ne mbalanda watshi biakadi ne madidishi nseke yonso, ne tshibuelelu tshiakadi ne coudées makumi atanu mu bule buatshi ne coudées makumi abidi ne itanu mu butshiama buatshi.

³⁴ Mbalanda watshi wakatangilangana ne tshiendelu tshia ntempelo tshia mu lubanza; bifuanyikishi bia mabue a ngashi biakadi ha biluwa biatshi ku luseke elu ne ku luseke lukuabo, ne tshibandilu tshiatshi tshiakadi ne bidiatshilu muanda mukulu.

³⁵ Hashishe wakalua nʼanyi ku tshibuelelu tshia ku tshiendelu tshia munda mua ntempelo ku luseke lua ku nôde; wakatshidikisha bu muakidikisheye bikuabo,

³⁶ nsubu yatshi ya bansentedi, biluwa biatshi, ne mbalanda watshi. Tshiakadi ne madidishi nseke yonso ya munda muatshi. Bule buatshi buakadi coudées makumi atanu, ne butshiama buatshi buakadi coudées makumi abidi ne itanu.

³⁷ Mbalanda watshi wakatangilangana ne tshiendelu tshia mu lubanza; bifuanyikishi bia mabue a ngashi biakadi ha biluwa biatshi, ku luseke elu ne ku luseke lukuabo; ne tshibandilu tshiatshi tshiakadi ne bidiatshilu muanda mukulu.

³⁸ Nsubu mukuabo wakadiku ne mushiku wandi wa mbelu mutangilangane ne mbalanda wa tshibuelelu etshi, ne bakuvuwamu milambu ya kuosha.

³⁹ Ha mbalanda wa tshibuelelu etshi hakadi mesa abidi ku luseke elu ne mesa abidi ku luseke lukuabo, bua kushihelahu mulambu wa kuosha, mulambu wa kubuikidila nʼau mibi ne mulambu wa kumusha dihila dia bubi.

⁴⁰ Ku luseke lukuabo lua mu lubanza lua mbalanda, luayila muntu habandeye ku mbelu kua tshibuelelu tshia ku luseke lua nôde, kuakadi mesa abidi ku luseke elu ne mesa abidi ku luseke lukuabo;

⁴¹ mbu kuamba ne, Mesa anai munda mua tshibuelelu, ne mesa anai mu luhanza luatshi, mesa muanda mukulu mene akadibo bashihelahu milambu.

⁴² Mesa anai akasongabo ku mabue akadiku, mesa ne mesa mikale ne bule bua coudée umue ne tshituha, ne butshiama bua coudée umue ne tshituha, ne bule bua mulu coudée umue, kuakatekelabo tuele ne biamu bia kushiha nʼabi milambu ya kuosha ne milambu mikuabo.

⁴³ Akadi ne mibangu bule bua ntanta wa tshianza mikuate ku nseke yau yonso inai; ne bakateka minyinyi ya milambu ha mesa.

⁴⁴ Wakalua nʼanyi mu tshiendelu tshia munda mua ntempelo, ne nakamona nsubu ibidi mu tshiendelu tshia munda, mukuabo ku luseke lua tshibuelelu tshia ku luseke lua node, mushiku wandi wa mbelu mutangilangane ne luseke lua sude; mukuabo ku luseke lua tshibuelelu tshia ku luseke lua sude, mushiku wandi wa mbelu mutangilangane ne luseke lua nôde.

⁴⁵ Yeye wakangambila ne, Nsubu eu udi mutangile ku luseke lua sude udi wa bakuidi badi balami ba nsubu wa tshitendelelu;

⁴⁶ ne nsubu eu mukuabo udi mutangile ku luseke lua nôde udi wa bakuidi badi bakuata mudimu wa tshioshelu; aba mbana balume ba Sadoka, ne anu bobo nkayabo ba munkatshi mua bana ba Lewi badi mua kulua hehi ne Yehowa bua kumukuatshila mudimu.

⁴⁷ Wakidikisha tshiendelu tshia munda, bule buatshi coudées lukama, butshiama buatshi coudées lukama, nseke yatshi yonso yakadi luidi lumue; ne tshioshelu tshia milambu tshiakadi ku mpala kua nsubu wa tshitendelelu.

⁴⁸ Hashishe wakalua nʼanyi ku mbalanda wa nsubu wa tshitendelelu, wakidikisha biluwa bia mbalanda, biakadi ne butshiama bua coudées itanu ku luseke ne ku luseke. Butshiama bua mushiku wa mbelu buakadi coudées dikumi ne inai, ne tshibi tshia ku luseke ne ku luseke lua mushiku tshiakadi coudées isatu mu butshiama buatshi.

⁴⁹ Bule bua mbalanda buakadi coudées makumi abidi, butshiama buandi buakadi coudées dikumi ne ibidi. Bakabanda ku tshibandilu tshiakadi ne bidiatshilu dikumi. Makunshi akadi hehi ne biluwa bia mbalanda, dikuabo ku luseke elu ne dikuabo ku luseke lukuabo.