Yezekiyele 4 - Mukanda wa Nzambi Dihungila Dikulukulu ne Dihungila Dihia-dihia 2003

Muprofete Udi Utangila Ditshintshimika dia Yelushalema Dilualua

¹ Wewe kabidi, muana wa muntu, angata dimpana, uditeke ku mpala kuebe, fundahu tshifundu tshia musoko, Yelushalema mene.

² Utshintshimike, asaku mabula manene a kutshintshimika, unguishe mishiki ya buloba bua bena nvita babandehu bua kûluisha, asaku bitudilu bia bena nvita binyunguluka musoko, ne longololaku mitshi minene ya kushimbula nʼai ngumbu.

³ Udiangatshile mpanu wa tshiamu tshifike, umuteke bu lumbu lua tshiamu tshifike hankatshi hebe ne musoko; tangisha mpala webe kudiu, ûvuishe bu musoko udibo batshintshimika, ne wewe ûtshintshimike. Etshi netshikale tshimanyinu kudi Bena Isalele.

⁴ Nunku lala biebe ku luseke lua ku tshianza tshiebe tshia bakashi, nenteke mibi ya Bena Isalele hamʼbidi hebe. Bu mudi bungi bua matuku awalala, mbu mudi bungi bua matuku awatuala mibi yabo.

⁵ Bualu bua nakujadika ne bungi bua bidimu binabakengesha bua bubi buabo nebuikale kûdi bu bungi bua matuku nkama isatu ne makumi tshitema mene, ne mu matuku au onso neutuale bubi bua ba mu tshiota tshia Bena Isalele.

⁶ Hawamana matuku au, ulale kabidi ku luseke lua ku tshianza tshiebe tshia balume, utuale mibi ya ba mu tshisamba tshia Bena Yuda; ndi nkulekela matuku makumi anai, dituku dimue dikale bu tshidimu tshijima.

⁷ Tangisha mpala webe ku kutshintshimika kua Yelushalema, olola diboko diebe kadiyi ne tshilulu, ne amba mei a kuhisha nʼau badimu.

⁸ Tangila biebe, nenkusuike ne mionshi hamʼbidi hebe, bua wewe kuandamuki ku luseke ne ku luseke anu hakumbana matuku audi utshintshimika musoko.

⁹ Angata blé, orge, nkunde minene, nkunde ya kambula, mponda, ne êpeautre; ubiele mu luesu lumue, enza nʼabi bia kudia; ne mu matuku au onso audi ulala ku luseke luebe, matuku nkama isatu ne makumi tshitema, neubidie.

¹⁰ Nunku bia kudia biebe biudi udia bilonde tshihiminu tshiabi, nshekele makumi abidi, musangu umue ku dituku ku dituku.

¹¹ Unue mai a kunua bu mudi tshihiminu tshiau, litre umue dituku dimue, wanua diba diodiumue ku dituku ku dituku.

¹² Bidia biebe nebikale mushindu wa mikata ya orge, ne wewe ubilambe ku mpala kua bantu ne tunvi tua bantu bu nkunyi.

¹³ Yehowa wakamba ne, Bena Isalele nebadie bia kudia biabo ne bukoya bua nunku munkatshi mua bisamba bia kundi mbatuma.

¹⁴ Hashishe nakamba ne, Aka, Mukelenge Yehowa! Mona, mutshima wanyi kawena muanze kunyanguka nunku; bualu bua ku bunsongalume buanyi tô ne mpindiu tshiena muanze kudia munyinyi wa nyama mudibi! e anyi wakatuanyabo kudi nyama mukuabo; ne munyinyi munyanguke kawena muanze kubuela mukana muanyi.

¹⁵ Nunku yeye wakangambila ne, Tangila, nakakuha tunvi tua ngombe bu nkunyi mu muaba wa tunvi tua muntu, bua wewe ulambehu bia kudia biebe.

¹⁶ Yeye wakangambila dî dikuabo kabidi ne, Muana wa muntu, tangila, nentshibule tshintu tshidibo beyemena mu Yelushalema bua kuangata bia kudia biabo, ne bobo nebikale ne bua kudia bidia biabo bilonda tshihiminu ne bakuatshika buowa; nebanue mai malonda tshihiminu kabidi ne mu dikuatshika dia buowa,

¹⁷ tô ne haluabo kukengela bia kudia ne mai a kunua, ne bua muanda eu nebatangilangane bafue mikemu, nebatekete-teketê bua kukengeshibua kuabo.