Yezekiyele 39 - Mukanda wa Nzambi Dihungila Dikulukulu ne Dihungila Dihia-dihia 2003

¹ Wewe, muana wa muntu, udiule Gogo, umuambile ne, Mukelenge Yehowa udi wamba ne, Tangila, ndi nʼebe tshilumbu, wewe Gogo, mukelenge wa Losha, Mesheke ne Tubala.

² Nenkuimanyike, nenkuendeshe ku bukole; nendue nʼebe ku luseke lua kunfudilu kua nôde; nenkufikishe ha mikuna ya mu Isalele.

³ Hashishe nenkume buta buebe bua bumuke mu tshianza tshiebe tshia bakashi, nemponeshe mikete yebe idi mu tshianza tshiebe tshia balume.

⁴ Wewe neuhone ha mikuna ya mu Isalele, wewe ne bisumbu biebe bionso bia masalayi, ne bantu bonso badi nʼebe; nenkufile kudi nyunyu ya mishindu yonso idi idia munyinyi, ne kudi nyama ya mu mpata bu bia kudia biai.

⁵ Mukelenge Yehowa udi wamba ne, Neuhone hanshi mu mpata wa hatuhu; bualu bua meme nakuamba nunku.

⁶ Nentume kahia hamʼbidi ha ba mu Magoga ne hamʼbidi ha badi bashikame kabayi ne ntatu mu miaba ya ku muelelu wa mai manene; nunku bobo nebamanye ne, Meme ndi Yehowa.

⁷ Nemmueneshe tshijila tshia dina dianyi munkatshi mua bantu banyi Bena Isalele; ne tshiena ngitabusha bua dina dianyi dia tshijila dihendibue kabidi; nunku ba mu bisamba bia bantu nebamanye ne, Meme ndi Yehowa, Wa Tshijila wa mu Isalele.

⁸ Mukelenge Yehowa udi wamba ne, Monai! Bualu ebu bunakuamba nebulue, nebuenjibue; edi ndituku mene dinakanuambila.

⁹ Mu diba adi badi bashikame mu misoko ya mu Isalele nebaluhuke, nebatemeshe kahia kabo ne bielelu abi bia nvita, nebabioshe bu nkunyi yabo: ne ngabu ya ha tshiadi ne ngabu ya ku diboko, ne mata ne mikete, ne mafuma mibi ne mafuma male; nebatemeshe kahia ne bintu ebi tô ne hahita bidimu muanda mutekete.

¹⁰ Nunku kabena ne bua kudiangatshila nkunyi mu madimi abo, anyi kutaha mutshi mukuabo muitu bua kutshiaba nkunyi, bualu bua nebatemeshe kahia kabo ne bielelu abi bia nvita; nebahaule bantu aba bakabahaula, nebanyenge bintu bia bantu aba bakanyenga bintu biabo. Mukelenge Yehowa udi wamba dî edi!

¹¹ Mu dituku adi mene nempe Gogo muaba wa kujikibua mu Isalele, mu tshibanda tshia Abalima mene, ku luseke lua esete lua Dishiba dia Lufu. Bakuabo nebele nkila ku mutu kua Tshibanda tshia Abalima bua kutshijibika, ne mu muaba wawa nebajike Gogo ne tshisumbu tshiandi tshionso tshia bantu; nebaubikile ne, Tshibanda tshia Hamona-Gogo.

¹² Bena Isalele nebikale ne mudimu wa kujika bantu aba ne wa kulengesha buloba ngondo muanda mutekete.

¹³ Eyo, bantu bonso ba mu buloba ebu nebikale ne mudimu wa kubajika; Mukelenge Yehowa udi wamba ne, Muanda eu neubavuishile lumu lunene mu dituku dindi mmuenesha butumbi buanyi.

¹⁴ Nebasungule bantu badi ne bua kuenza mudimu eu ku dituku ku dituku bua bobo bendakane mu buloba, bakebekebe badi bashala hanshi ha buloba ebu kabayi banze kujikibua, bua kubulengesha. Hashika ngondo muanda mutekete nebabange kukeba bitalu bikuabo.

¹⁵ Hahita bakuabo mu buloba, ne hamona mukuabo mufuba wa muntu mufue, budiye nʼabu mbua kuteka tshimanyinu hehi nʼau, tshishaleku tô ne halua bajiki kûjika mu Tshibanda tshia Hamona-Gogo.

¹⁶ (Musoko wa Hamona udiku kabidi) Nunku nebalengeshe buloba.

¹⁷ Mukelenge Yehowa udi ukuambila wewe, muana wa muntu, ne, Ambila nyunyu ya mishindu yonso ne nyama yonso ya mu mpata ne, Nudisangishe hohamue, nulue; nufume ku nseke yonso, nudikunguishe ku muaba udi minyinyi yanyi indi nnushihela, milambu mene indi nnulongoluela ha mikuna ya mu Isalele, bua nuenu nudie munyinyi ne nunue mashi.

¹⁸ Nenudie munyinyi wa bena bukitu, nentume mashi a bakokeshi ba ha buloba, bimpanga, bana ba mikoko, mpumbu ya mbushi, balume ba ngombe, bionso nnyama ya manyi ya ku Bashana.

¹⁹ Nenudie mafuta tô ne hula mafu enu tente, nentume mashi tô ne hanuâkuatshika, ku minyinyi ya milambu inakunushihela.

²⁰ Mukelenge Yehowa udi wamba ne, Nenukute ku mesa anyi ne munyinyi wa tubalu ne wa nyama idi bantu babanda ha nyima hai, wa bena bukitu ne wa bena nvita ba mishindu yonso.

²¹ Nenjadike butumbi buanyi munkatshi mua bisamba bia bantu; ne ba mu bisamba bionso nebamone munakushikisha kulumbulula kuanyi kunakubalumbuluisha, ne tshianza tshianyi tshinakuteka hamʼbidi habo.

²² Nunku mu dituku adi tô ne tshiendelele Bena Isalele nebamanye ne, Meme ndi Yehowa Nzambi wabo.

²³ Ba mu bisamba bia bantu nebamanye ne, Bena Isalele bakabuela mu buhika bualu bua bubi buabo; bualu bua bakantombokela, nakabasokoka mpala wanyi, nakabafila mu bianza bia bena lukuna babo ne buonso buabo bakashihibua ku muele wa nvita.

²⁴ Bu muakadi bukoya buabo ne bu muakadi kuntombokela kuabo mbu munakabenzela; nunku nakabasokoka mpala wanyi.

²⁵ Bua malu â Mukelenge Yehowa udi wamba ne, Mpindiu nengumushe Yakoba mu buhika bua kumuha diakalengele, nenfuile bonso ba mu tshisamba tshia Bena Isalele luse; ne nengikale ne lukunukunu lua dina dianyi dia tshijila.

²⁶ Nebahue muoyo bua bundu buabo ne bua ditomboka diabo diakantombokelabo, haluabo kushikama mu buloba buabo kabayi ne bualu budi bubahumbisha, ne kakuyi muntu umue wa kubatshinyisha,

²⁷ hanabumusha munkatshi mua bantu ba bende bua kubahingasha, hanabasangisha bua kubumusha mu maloba a bena lukuna babo, ne hanamuenesha tshijila tshianyi mu malu andi mbenzela ku mesu kua ba mu bisamba bia bungi bia bantu.

²⁸ Bobo nebamanye ne, Ndi Yehowa Nzambi wabo mu mianda ei ne, Nakabatuma mu buhika munkatshi mua bisamba bia bantu, hashishe nakubasangisha mu buloba buabo mene; ne tshiena nshiya umue wabo munkatshi mua bisamba bia bantu kabidi.

²⁹ Tshiena mbasokoka mpala wanyi kabidi; bualu bua nakuhumuina Bena Isalele Nyuma wanyi. Mukelenge Yehowa udi wamba dî edi.