Yezekiyele 37 - Mukanda wa Nzambi Dihungila Dikulukulu ne Dihungila Dihia-dihia 2003

Mifuba ya Bantu mu Tshibanda

¹ Tshianza tshia Yehowa tshiakadi hamʼbidi hanyi, ne yeye wakaya nʼanyi mu Nyuma wa Yehowa, wakanshikika munkatshi mua tshibanda tshiakadi tshiule tente ne mifuba.

² Wakampitshisha hehi nʼai, nakayinyunguluka, ekumona! Yakadi ya bungi hanshi mu tshibanda, ne yakadi miume be.

³ Yeye wakankonka ne, Muana wa muntu, mifuba ei idi mua kuikala ne muoyo, anyi? Nakamuhingasha di ne, Wewe, Mukelenge Yehowa, udi mumanye.

⁴ Yeye wakangambila kabidi ne, Ela dî diebe dia buprofete kudi mifuba ei, uyambile ne, Nuenu mifuba miume, unvuai dî dia Yehowa!

⁵ Mukelenge Yehowa udi wambila mifuba ei ne, Tangilai, nengele muhuya munda muenu, nenuikale ne muoyo.

⁶ Nenteke mifungu hamʼbidi henu, nennuluatshishe misunyi, nennubuikile ne dikoba, nennuele muhuya munda muenu, ne nenuikale ne muoyo; nunku nenumanye ne, Meme ndi Yehowa.

⁷ Nunku nakamba di dianyi bu muakangambileye; ne hanakadi ngamba mei anyi, tshiona tshiakadiku, ne monai, tshiona bu tshia nvunde tshiakadiku; ne mifuba yakasangakana mufuba mukuabo wakatuangana ne mufuba mukuabo.

⁸ Nakayimona kabidi, ekumona! Mifungu yakadi hamʼbidi hai, misunyi yakamueneka, ne dikoba diakayibuikila mu miaba yonso; kadi kakuakadi muhuya munda muai.

⁹ Hashishe yeye wakangambila ne, Ela di diebe dia buprofete kudi luhehele; ela dî diebe, wewe muana wa muntu, ambila luhehele ne, Mukelenge Yehowa udi wamba ne, Lua ku mpehele inai, wewe muhuya, buela munda mua bantu aba bashihibue bua bobo bikale ne muoyo.

¹⁰ Nunku nakela dî dianyi bu muakangambileye, ne muhuya wakabuela munda muabo, bakadi ne muoyo, bakimana ne makasa, tshisumbu tshinene tshia bantu.

¹¹ Yeye wakangambila ne, Muana wa muntu, mifuba ei idi bonso ba mu tshisamba tshia Bena Isalele. Tangila, badi bamba ne, Mifuba yetu yakûma, ditekemena dietu diakujimina, tuakufila bietu.

¹² Nunku amba mei ebe a buprofete, ubambile ne, Mukelenge Yehowa udi wamba ne, Monai bienu, nembulule nkita yenu, nennuhatule mu nkita yenu, nuenu bantu banyi, nendue nʼenu mu buloba bua Isalele.

¹³ Nenumanye ne, Meme ndi Yehowa, hanabulula nkita yenu, hananuhatula mu nkita yenu, nuenu bantu banyi.

¹⁴ Yehowa udi wamba ne, Nenteke Nyuma wanyi munda muenu, nenuikale ne muoyo, nennuteke mu buloba buenu mene; nenumanye ne, Meme ndi Yehowa. Nakuamba dî edi, nendienze.

Disangisha dia Bena Yuda ne Bena Isalele

¹⁵ Dî dia Yehowa diakalua kundi kabidi ne,

¹⁶ Wewe, muana wa muntu, angata mutshi umue, ufundehu mei ne, Bualu bua Yuda ne bua Bena Isalele badi balamata kudiye. Angata mutshi mukuabo, ufundehu mei ne, Bualu bua Yosefe ne bonso ba mu tshisamba tshia Bena Isalele badi balamata kudiye.

¹⁷ Ulungakashe mutshi umue ne mukuabo bu mutshi umue, bua ilue mutshi umue mu tshianza tshiebe.

¹⁸ Ne hakukonka bana benu ne, Kuena utujinguluila bualu bûdi utufuanyikishila malu â, anyi?

¹⁹ ubambile ne, Mukelenge Yehowa udi wamba ne, Monai, nengangate mutshi wa Yosefe udi mu tshianza tshia Efelayima ne bisamba bia Bena Isalele bidi bilamatangana nʼandi, nengulungakashangane ne mutshi wa Yuda, nenyivuishe mutshi umue, nebikale mutshi umue mu tshianza tshianyi.

²⁰ Mitshi iudi mufunde ikale mu tshianza tshiebe ku mesu kuabo,

²¹ hawabambila ne, Mukelenge Yehowa udi wamba ne, Monai, nengumushe Bena Isalele munkatshi mua bisamba bia bantu muakayabo, nensangishe ba ku nseke yonso, nendue nʼabo mu buloba buabo mene.

²² Nembavuishe tshisamba tshimue mu buloba abu ha mikuna ya mu Isalele; mukelenge umuehele neikale nfumu wa buonso buabo; kabena bikala bisamba bibidi kabidi, kabena batahuluka kabidi makelenge abidi kashidi.

²³ Kabena badinyanga kabidi ne mpingu yabo ne bintu biabo bidi bibahihisha, anyi ne malu mabi abo makuabo; ne nembasungile ku matomboka abo onso akadibo bantombokela nʼau, nembalengeshe; nunku nebikale bantu banyi, ne meme nengikale Nzambi wabo.

²⁴ Muntu wanyi Davidi neikale mukelenge ku mutu kuabo; buonso buabo nebikale ne mulami wa mikoko umue; nebende mu malu andi mbambila, nebatumikile mikenji yanyi, nebayenze.

²⁵ Nebashikame mu buloba bunakahesha Yakoba, muntu wanyi, muakashikamabo kudi batatu benu; bobo ne bana bakalelabo ne bikulu babo, nebashikamemu tô ne tshiendelele; ne Davidi, muntu wanyi, neikale mukokeshi wabo kashidi.

²⁶ Bualu bukuabo, nempunge nʼabo tshihungidi tshia ditalala; netshikale tshihungidi tshia tshiendelele; nembajadike mu buloba buabo, nembakumbashe ba bungi, nenteke tshitendelelu tshianyi munkatshi muabo tshiendelele.

²⁷ Nenshikame hohamue nʼabo; nengikale Nzambi wabo, ne bobo nebikale bantu banyi.

²⁸ Nunku ba mu bisamba bia bantu nebamanye ne, Meme Yehowa ndi njidila Bena Isalele, hashala tshitendelelu tshianyi munkatshi muabo tshiendelele.