Yezekiyele 32 - Mukanda wa Nzambi Dihungila Dikulukulu ne Dihungila Dihia-dihia 2003

¹ Mu tshidimu tshia dikumi ne tshibidi, mu ngondo wa dikumi ne muibidi, mu dituku dia kumudilu dia ngondo, dî dia Yehowa diakalua kundi ne,

² Muana wa muntu, ashila Palô, mukelenge wa Ejipitu, muadi, umuambile ne, Wakudifuanyikisha bu muana wa nyama wa ntambue wa munkatshi mua bisamba bia bantu, kadi udi anu bu nyama munene wa mu mai manene, uhembula, uhatuisha mai mu mimpempe ya diulu diebe, uvuandulula mai a musulu ne makama ebe, unyanga tusulu tuau.

³ Mukelenge Yehowa udi wamba ne, Nenkuande bukuondo buanyi ne tshisumbu tshia bantu nebankuatshishe, nenkuhatule mu mai mu bukuondo buanyi.

⁴ Nenkushiye hanshi ha buloba, nenkuele mu mpata, nembikile nyunyu yonso ya mulu bua kuikilayi hamʼbidi hebe, nengukutshishe nyama ya ha buloba buonso ne tshitalu tshiebe.

⁵ Nendadike munyinyi webe ha mikuna, nengushe bibanda bionso ne minyinyi ya tshitalu tshiebe.

⁶ Nemboleshe buloba, tô ne ku mitu kua mikuna, ne mashi adi ahatuka munda muebe, ne bihongo nebiule tente ne minyinyi yebe.

⁷ Hanakujimisha, neabuikile diulu, nenkudimune mitoto ilue midima; nembuikile diba ne ditutu, ne ngondo kena ukenka.

⁸ Mukelenge Yehowa udi wamba ne, Nenkudimune minda yonso ya mu diulu idi ikenka bua ikale mîdima kûdi, nentume mîdima ha buloba buebe.

⁹ Nentatshishe mitshima ya bantu ba bungi hangambila ba mu bisamba bia bantu lumu lua kubutuka kuebe, hanaluambila ba mu maloba audi kuyi muanze kumanya.

¹⁰ Bulelela, nenkemeshe bantu ba bungi bua bualu buebe, ne bakelenge babo nebazakale ne buowa bukole bua bualu buebe, hanahenyesha muele wanyi wa nvita ku mpala kuabo. Nebazakale diba dionso, muntu ne muntu bua muoyo wandi, mu dituku dia kubutuka kuebe.

¹¹ Bualu bua Mukelenge Yehowa udi wamba ne, Muele wa nvita wa mukelenge wa Babulona neufike hamʼbidi hebe,

¹² nembutule bantu bangi ba mu tshisamba tshiebe ku miele ya nvita ya bena bukitu, bonso badi bahite ba mu bisamba bia bantu kubakuatshisha buowa. Nebajimishe dihetu dia Bena Ejipitu, ba mu tshisumbu tshiabo tshionso nebabutudibue.

¹³ Nembutule bimuna biabo bionso bua kabikadi hehi ne misulu ya bungi. Kakuena dikasa dia muntu diayivuandulula kabidi, kakuena mukono wa nyama yonso wayinyanga kabidi.

¹⁴ Mukelenge Yehowa udi wamba ne, Hashishe nembatamishe mai abo, nempuekeshe misulu yabo bu mudi manyi menguluke ahueka.

¹⁵ Hanamana kubutula buloba bua Ejipitu kabutu, hanabuvuisha bu buloba butuhu kabuyi ne bintu biakadibu nʼabi tente diambedi, hanashiha bonso badi bashikamemu; mu diba adi nebamanye ne, Meme ndi Yehowa.

¹⁶ Mukelenge Yehowa udi wamba ne, Eu mmuyenga udibo badila; udi bana bakashi ba mu bisamba bia bantu badila; nebaudile bua Ejipitu ne bua tshisumbu tshiabo tshionso.

¹⁷ Mu tshidimu tshia dikumi ne ibidi, mu ngondo wa kumudilu, mu dituku dia dikumi ne itanu dia ngondo, dî dia Yehowa diakalua kundi ne,

¹⁸ Muana wa muntu, ashile tshisumbu tshia ba mu Ejipitu muadi, ubahuekeshe hanshi, yeye ne bana bakashi ba mu bisamba bineme bia bantu, ubatume tô ne mu ndondo wa buloba, hohamue ne bantu aba badi bahueka mu Dina dia Bafue.

¹⁹ Wewe udi uhita nganyi bulengele? Hueka biebe, bakuladike munkatshi mua badi kabayi batengudibue.

²⁰ Hona hanshi ne lala biebe munkatshi mua badi bashihibue ku muele wa nvita, wewe ne tshisumbu tshiebe tshia bantu bavule!

²¹ Bantu bakole ba munkatshi mua bena bukitu nebamuele dî diabo mu Muaba wa Bafue, bamuambila ne badi bamukuatshisha ne, Bakuhueka munemu, badi balala hohamue ne badi kabayi batengudibue, munkatshi mua bakushihibua ku muele wa nvita.

²² Ashû udiku ne bantu bandi bonso, nkita yabo idi minyunguluke lukita luandi, buonso buabo badi bashihibue, bashihibue ku muele wa nvita.

²³ Nkita yabo idi mu miaba misokoma ya mu Dina dia Bafue, ne tshisumbu tshia bantu bandi tshidi tshinyunguluka lukita luandi; buonso buabo badi bashihibue, bashihibue ku muele wa nvita, bakadi bakuatshisha ba ha buloba bakadi ne muoyo buowa.

²⁴ Elama udiku ne tshisumbu tshionso tshia bantu bandi bavule tshinyunguluka lukita luandi; buonso buabo bashihibue, bashihibue ku muele wa nvita, bahueke mu ndondo wa buloba kabayi banze kutengudibua, bakadi bakuatshisha ba ha buloba bakadi ne muoyo buowa; badi badituadila bundu buabo diatshimue ne bantu badi bahueka mu Dina dia Bafue.

²⁵ Bakumulongoluela bulalu munkatshi mua badi bashihibue, hohamue ne tshisumbu tshiandi tshionso tshia bantu bavule tshinyunguluke lukita luandi, buonso buabo bakadi kabayi batengudibue, bashihibue ku muele wa nvita; bualu bua bakakuatshisha buowa kudi bakadi ne muoyo ha buloba. Badi badituadila bundu buabo hohamue ne bantu badi bahueka mu Dina dia Bafue. Bobo badi batekibue munkatshi mua bantu badi bashihibue.

²⁶ Mesheke udiku ne Tubala ne tshisumbu tshiabo tshionso tshia bantu bavule tshinyunguluke nkita yabo, buonso buabo bakadi kabayi banze kutengudibua, bashihibue ku muele wa nvita, bualu bua bakakuatshisha buowa kudi bakadi ne muoyo ha buloba.

²⁷ Kabena balala hohamue ne bena bukitu ba kale, bakuhueka mu Muaba wa Bafue ne bielelu biabo bia nvita mu bianza biabo, bakinama mitu yabo ha miele yabo ya nvita, ne ngabu yabo idi ha mutu ha mifuba yabo, bualu bua ditshina dikole dia bukole buabo diakakuata bantu bakadi ne muoyo ha buloba.

²⁸ Nunku wewe Palô nebakutshibule munkatshi mua badi kabayi batengudibue, neulale hohamue ne badi bashihibue ku muele wa nvita.

²⁹ Edome udiku, ne bakelenge bandi ne bakokeshi bandi badiku, bobo bakadi ne bukole buabo buonso, kadi badi bajadikibua ne bantu badi bashihibue ku muele wa nvita; badi balala ne badi kabayi batengudibue, ne badi bahueka mu Dina dia Bafue.

³⁰ Bakokeshi ba ku luseke lua nôde badiku, buonso buabo, ne Bena Sidona bonso, bakuhueka ne bantu badi bashihibue; bobo bakadi batshinyisha banga bantu bua bukole buabo, kadi badi bafuishibue bundu ne badi balala, bobo bine kabayi banze kutengudibua, hohamue ne badi bashihibue ku muele wa nvita; badi badituadila bundu buabo hohamue ne badi bahueka mu Dina dia Bafue.

³¹ Mukelenge Yehowa udi wamba ne, Palô neabamone, neasambibue bua tshisumbu tshiandi tshia bantu bavule badi bashihibue ku muele wa nvita, Palô muine ne masalayi andi onso.

³² Mukelenge Yehowa udi wamba ne, Bualu bua yeye wakakuatshisha buowa kudi bakadi ne muoyo ha buloba, nebamuladike munkatshi mua badi kabayi batengudibue hohamue ne badi bashihibue ku muele wa nvita, Palô muine ne tshisumbu tshiandi tshionso tshia bantu bavule.