Yezekiyele 31 - Mukanda wa Nzambi Dihungila Dikulukulu ne Dihungila Dihia-dihia 2003

¹ Mu tshidimu tshia dikumi ne tshimue, mu ngondo muisatu, mu dituku dia kumudilu dia ngondo, dî dia Yehowa diakalua kundi ne,

² Muana wa muntu, ambila Palô, mukelenge wa Ejipitu, ne tshisumbu tshia bantu bandi ne, Wewe udi bu nganyi bua bunene buebe?

³ Mbu mutshi munene wa cèdre mu Lebanona, udi ne matamba manene malengele, ne dileshi diau didi bu dia mutshi wa muitu, bule buau budi buya mulu mule, katongabela kau kabidi kadi kafika mu matutu.

⁴ Mai a mu misulu akaukolesha, dilembue dia musulu diakaudiundisha, diakahongolola mai a tusulu tuadi mu nseke yonso ya muaba muakadiundau, diakatuma tusulu tuadi tua mai ku mitshi yonso ya muitu.

⁵ Nunku katongabela ka mutshi eu kakaya mulu ha mutu ha mitshi yonso ya muitu; matamba au manene akavulangana, matamba au makese akalua male, bualu bua mai a bungi akadi mu tusulu akaumiamina.

⁶ Nyunyu yonso ya mulu yakibaka masua ai munkatshi mua matamba au manene, muinshi mua matamba au makese nyama yonso ya mu mpata yakalela bana bai, ne mu dileshi diau muakashikama ba mu bisamba binene bionso.

⁷ Nunku wakadi mulengele bua bunene buau, ne bua bule bua matamba au; bualu bua miji yau yakadi hehi ne mai a bungi.

⁸ Mitshi ya cèdres ya mu budimi bua Nzambi kayakamanya mua kuelekeshibua nʼau, mitshi ya cyprès kayakamanya mua kuelekeshibua ne matamba au manene; mitshi ya platane kayakamanya mua kuelekeshibua ne matamba au makese; kakuakadi mutshi umue wa mu budimi bua Nzambi wakamanya mua kuelekeshibua nʼau ku bulengele buau.

⁹ Nakaulengesha ku bungi bua matamba au, nunku mitshi yonso ya mu Edene, mu budimi bua Nzambi mene, yakadi nʼau mukau.

¹⁰ Bua malu â Mukelenge Yehowa udi wamba ne, Bualu bua wakaleha tô ne mulu, wakatuma katongabela kau tô ne mu matutu, ne mutshima wau wakadibandisha bua bule buau;

¹¹ nengufile mu bianza bia mukokeshi munene wa bisamba bia bantu, ne yeye neawenzele bu mudi bukole bua bubi buau. Nakawihata.

¹² Bantu ba bende, ba mu bisamba bia bantu badi batamba kukuatshisha bakuabo buowa, nebautahe, nebaushiye. Ha mitu ha mikuna ne mu bibanda bionso matamba au neahone hanshi, ne matamba au manene nealale matshibuke mu bihonga bionso bia ha buloba. Bantu bonso ba ha buloba nebumuke mu dileshi diau bua kunyemabo.

¹³ Nyunyu yonso ya mulu neyikile ha mutshi eu udi muhone hanshi, ne nyama yonso ya mu mpata neyilue ku nsanzu yau,

¹⁴ bua mitshi mikuabo idi hehi ne mai kayimanyi mua kudibandisha mulu, anyi kutuma tutongabela tuai mu matutu, ne bua mitshi idi mua mai kayimanyi mua kutamba mikuabo bule. Bualu bua bakahisha buonso buai bua kuluayi, bua kuhuekayimu ndondo wa buloba, munkatshi mua bukua bantu, hohamue ne badi bahueka mu Dina dia Bafue.

¹⁵ Mukelenge Yehowa udi wamba ne, Mu dituku didiu uhueka mu Muaba wa Bafue nengashishe dilembue dia musulu muadi bualu buau, nenkande misulu yadi, misulu minene neyilekele kuenda; nengashishe Lebanona muadi bualu buau, ne mitshi yonso ya mu mpata neyitekete ne kanyinganyinga bualu buau.

¹⁶ Nenzakashe ba mu bisamba bia bantu ku tshiona tshia kuhona kuau, hanawela mu Muaba wa Bafue hohamue ne badi bahueka mu Dina dia Bafue; ne mitshi yonso ya mu Edene, mitshi yonso ya mu Lebanona idi mihite buimpe, mitshi yonso idi ikoleshibua ne mai, neyisambibue mu ndondo wa buloba.

¹⁷ Ba mu bisamba bia bantu nebahueke nʼau mu Muaba wa Bafue, kudi bantu badi bashihibue ku muele wa nvita; bantu aba bakadi bakuatshishi bau kabidi, bakadi bashikame mu dileshi diau munkatshi mua bisamba bikuabo, nebahuekemu kabidi.

¹⁸ Wewe udi bu nganyi mu butumbi ne bunene buebe munkatshi mua mitshi ya mu Edene? Kadi neuhuekeshibue diatshimue ne mitshi ya mu Edene tô ne mu ndondo wa buloba. Neulale munkatshi mua badi kabayi batengudibue ne badi bashihibue ku muele wa nvita. Ebu mbualu budi bukuata Palô ne tshisumbu tshia bantu bandi. Mukelenge Yehowa udi wamba nunku.