Yezekiyele 30 - Mukanda wa Nzambi Dihungila Dikulukulu ne Dihungila Dihia-dihia 2003

¹ Dî dia Yehowa diakalua kundi kabidi ne,

² Muana wa muntu, amba mei a buprofete buebe, amba ne, Mukelenge Yehowa udi wamba ne, Asa muadi bua mulau ulualua dituku adi!

³ Bualu bua dituku adi didi ha buihi, dituku dia Yehowa mene didi ha buihi, nedikale dituku didi ne matutu, tshikondo tshia kubutuka kua bisamba bia bantu.

⁴ Muele wa nvita neufike kudi Ejipitu, kanyinganyinga nekikale mu Atiopa, hahona bantu bashihibue mu Ejipitu, nebaye ne tshisumbu tshia bintu biabo, ne bishimikidi biabo nebishimbuke.

⁵ Atiopa, Puta, Luda ne bonso ba mu Alaba, ne Libue, ne bisamba bikuabo bibuelakana nebahone nʼabo ku muele wa nvita.

⁶ Yehowa udi wamba ne, Bonso badi bakuatshisha Ejipitu nebahone, bukole buabo budi buvuisha dihetu mu mitshima yabo nebujimine; Mukelenge Yehowa udi wamba ne, Ku Migedola tô ne Siene nebashihibue ku muele wa nvita mu buloba ebu.

⁷ Nebabutuke kabutu munkatshi mua maloba makuabo akubutuka; ne misoko yabo neyikale bikulu munkatshi mua misoko mikuabo yakubutuka.

⁸ Nebamanye ne, Meme ndi Yehowa, hanatemesha kahia mu Ejipitu, ne halua kubutuka kudi bakuatshishi babo bonso.

⁹ Mu dituku adi nentume ba-messager, bumuka kundi, benda mu matu, bua kukuatshishabo Bena Atiopa aba badi kabayi ne ntatu buowa; ne kanyinganyinga kakole nekabakuate mu dituku dia kubutuka kua Ejipitu. Bua, monai, dilualua!

¹⁰ Mukelenge Yehowa udi wamba ne, Nenjimishe tshisumbu tshia bantu mu Ejipitu ku tshianza tshia Nebukadenesâ, mukelenge wa Babulona.

¹¹ Nemmutume ne bantu badiye nʼabo, badi bahita ba mu binga bisamba kukuatshisha bantu buowa, bua kubutulabo buloba ebu; nebahatule miele yabo ya nvita bua kuluangana ne ba mu Ejipitu, nebushe buloba ebu tente ne bitalu bia bantu badibo bashiha.

¹² Nenkamishe misulu, nensumbishe bantu babi buloba ebu; nembutuishe buloba ne bintu bionso bidimu kabutu ku bianza bia bantu ba bende. Meme, Yehowa, nakuamba dî edi.

¹³ Mukelenge Yehowa wakuamba ne, Nentshibule mpingu, nenshiheshe bintu biakasongabo bia mu musoko wa Mempi, ne kakuena kuikala mukokeshi mu buloba bua Ejipitu, nenkuatshishe ba mu buloba bua Ejipitu buowa.

¹⁴ Nembutule Patelosa, nentemeshe kahia mu Soana, nendumbuluishe No.

¹⁵ Nempongoluele Sina tshiji tshianyi, musoko wa mu Ejipitu udi ne ngumbu ya mabue, nenshihe tshisumbu tshia bantu badi mu No.

¹⁶ Nentemeshe kahia mu Ejipitu, ba mu Sina nebikale ne kanyinganyinga kakole, musoko wa No neubuludibue, nebashimbule ngumbu ya Mempi kudi bena lukuna.

¹⁷ Bansongalume ba mu Awena ne ba mu Pi-besete nebashihibue ku muele wa nvita, ba mu misoko ei nebabuele mu buhika.

¹⁸ Ku Tehafenehese dituku nedikale mîdima hanatshibula mitshi ya bikokedi idi ba mu Ejipitu bakokesha nʼai bakuabo, hashika bukole buabo budi buvuisha dihetu mu mitshimi yabo, ditutu nedibabuikile, bana bakashi ba mu Ejipitu nebabuele mu buhika.

¹⁹ Nunku nendumbuluishe ba mu Ejipitu ne malu â; bobo nebamanye ne, Meme ndi Yehowa.

²⁰ Mu tshidimu tshia dikumi ne tshimue, mu ngondo wa kumudilu, mu dituku dia muanda mutekete dia ngondo, dî dia Yehowa diakalua kundi ne,

²¹ Muana wa mundi, nakutshibula diboko dia Palô, mukelenge wa Ejipitu; ne tangila, kabena badijingila tshilulu, kabena balabahu buanga bua kudisangasha ne kabena basuikaku tshilulu, bua dikale ne bukole bukumbane bua kukuata muele wa nvita.

²² Nunku Mukelenge Yehowa udi wamba ne, Tangila, ndi ne Palô, mukelenge wa Ejipitu, tshilumbu, nentshibule maboko andi, ne diboko diandi ditshidi ne bukole buadi ne diboko diandi diakutshibuka diambedi, nemponeshe muele wa nvita udi mu tshianza tshiandi.

²³ Nentangadishe Bena Ejipitu munkatshi mua bisamba bia bantu, nembamuangalashe munkatshi mua maloba makuabo.

²⁴ Nenkoleshe maboko a mukelenge wa Babulona, nenteke muele wa nvita mu bianza biandi, kadi nentshibule maboko a Palô, ne yeye neatue mikemu ku mpala kuandi, mikemu bu ya muntu udi mutahibue mputa ya lufu.

²⁵ Nengambule maboko a mukelenge wa Babulona mulu, kadi maboko a Palô nealembelele hanshi; nebamanye ne, Meme ndi Yehowa hanateka muele wanyi wa nvita mu bianza bia mukelenge wa Babulona, ne hawololeye ha buloba bua Ejipitu.

²⁶ Nunku nentangadishe Bena Ejipitu munkatshi mua bisamba bia bantu, nembamuangalashe munkatshi mua manga maloba; nunku nebamanye ne, Meme ndi Yehowa.