Yezekiyele 26 - Mukanda wa Nzambi Dihungila Dikulukulu ne Dihungila Dihia-dihia 2003

Dilumbuluisha dia Tulo

¹ Mu tshidimu tshia dikumi ne tshimue, mu dituku dia kumudilu dia ngondo, dî dia Yehowa diakalua kundi ne,

² Muana wa muntu, bualu bua Tulo wakuamba dî dibi bualu bua Yelushalema ne, Kia! Musoko wakadi tshibuelelu tshia bantu ba bende wakuhuka, wakunzuluka kundi, nengikale ne bintu tente, bualu bua wowo wakubutuka;

³ nunku Mukelenge Yehowa udi wamba ne, Mona, ndi nʼebe tshilumbu, wewe musoko wa Tulo, nentume bisamba bia bungi kûdi bua kuluishabi bana benu, bu mudi mai manene alua ne mambuanka.

⁴ Nebashimbule ngumbu ya Tulo, nebabumbule bibumba biandi. Nenkuhule luhuishi luandi, nemmuvuishe bu dibue didi hatuhu.

⁵ Newikale muaba wa kuadishaku tuhamba munkatshi mua mai manene; Mukelenge Yehowa udi wamba ne, Bualu bua nakuamba dî edi, yeye neikale bu tshintu tshidibo banyenga kudi ba mu bisamba bia bantu.

⁶ Bana bandi, misoko idi mu mpata hehi ne mai manene, nebashihibue ku muele wa nvita; nunku nebamanye ne, Meme ndi Yehowa.

⁷ Bualu bua Mukelenge Yehowa udi wamba ne, Tangilai, nentumine Bena Tulo Nebukadenesâ, mukelenge wa Babulona, mukelenge wa bakelenge, mufume biandi ku luseke lua nôde, muikale ne tubalu ne makalu a nvita ne babandi ba ha nyima ha tubalu ne tshisumbu tshinene tshia bantu bakuabo.

⁸ Yeye neashihe bana bebe, misoko idi mu mpata, ku muele wa nvita; nele mabula a kukutshintshimika nʼau, nele mishiki ya buloba bua kubandahu bua kuluisha bana benu. Neajadike ngabu munene ku mpala kuebe.

⁹ Neajadike ntshinyi andi a kushimbula nʼau ngumbu ku mpala kua ngumbu yebe, neashimbule bibumba ku bisui biandi.

¹⁰ Bualu bua bungi bua tubalu tuandi, luhuishi luditu tubisha nelukubuikile. Bualu bua tshiona tshia bena tubalu ne tshia makalu a hatuhu ne tshia makalu a nvita, ngumbu yebe neyikanke habueleye mu bibi biebe, bu mudi muntu ubuela mu musoko hashimbuka tshituha tshia lumbu.

¹¹ Yeye neadiate misesu yebe yonso ne bikono bia tubalu tuandi, neashihe bana benu ku muele wa nvita, neatulule makunshi ebe makole hanshi.

¹² Nebanyenge biuma biebe bionso, nebahaule luhetu luebe; nebashimbule ngumbu yebe, nebasasule nsubu yebe idi isankisha bantu; nebele mabue ebe ne mabaya ebe ne luhuishi luebe munkatshi mua mai manene.

¹³ Nempuwishe dî dia misambu yebe, kabena bunvua muadi wa bisanji biebe kabidi.

¹⁴ Nenkuvuishe bu dibue didi hatuhu, newikale bu muaba wa kuadishilaku tuhamba, kabena bakuibaka kabidi; bualu bua meme Yehowa nakuamba dî edi: edi ndi dia Mukelenge Yehowa.

¹⁵ Mukelenge Yehowa udi wambila Bena Tulo ne, Ba mu maloba adi ku muelelu wa mai manene kabena bazakala, hunvuabo bua kubutuka kuebe, hatua batahibue mikemu, ne hashihabo bantu bangi munkatshi muenu, anyi?

¹⁶ Mu diba adi bakokeshi ba ku muelelu wa mai manene nebatuluke mu nkuasa yabo ya bukelenge, nebavule bilulu biabo, nebakohole bivualu biabo bidi ne malenda; nebashale ne dizakala; nebashikame hanshi ha buloba, nebazakale diba dionso, nebakuatshike buowa bualu buenu.

¹⁷ Nebanuashile madilu, nebanuambile ne, Mona muwakulua, wewe musoko wakadibo bashikame kudi bendakanyi ba ha mai manene, musoko wakadi ne lumu lunene, wakadi ne bukole ha mai manene, wowo ne bantu bakadi bashikamemu, wakakuatshisha bonso bakadi bendahu buowa!

¹⁸ Mpindiu ba mu maloba a ku muelelu wa mai manene nebazakale mu dituku dia kubutuka kuebe; ba mu bisenga bia mu mai manene nebakuatshike buowa bualu bua kujimina kuebe.

¹⁹ Bualu bua Mukelenge Yehowa udi wamba ne, Hanakuvuisha tshikulu, bu mudi misoko idi kayiyi ne bantu, hanahongolola mai male ha mutu hebe, ne halua mai manene kukubuikila;

²⁰ hashishe nenkuhuekeshe hanshi hohamue ne badi bahueka mu Dina dia Bafue, kudi bantu ba tshikondo tshia kale, nenkushikamishe mu miaba idi mu ndondo wa mu buloba, mu miaba yakadi mituhu ku kale tô ne mpindiu, ushikame hebe ne badi bahueka mu Dina, bua wewe ushale mu muaba mudi kamuyi bantu, ne bua wewe kushadi mu buloba bua badi ne muoyo.

²¹ Mukelenge Yehowa udi wamba ne, Nenkubutule kabutu, ne kuena wikala ne muoyo kabidi; nansha biakebabo, kabena bakusangana kabidi.