Yezekiyele 22 - Mukanda wa Nzambi Dihungila Dikulukulu ne Dihungila Dihia-dihia 2003

Mibi ya Bena Yelushalema

¹ Dî dia Yehowa diakalua kundi kabidi ne,

² Wewe, muana wa muntu, neulumbuluishe, neulumbuluishe musoko eu wa bamatshishi ba mashi hanshi, anyi? Nunku ubamanyishe bua malu abo onso a tshinyangu.

³ Amba biebe ne, Mukelenge Yehowa udi wamba ne, Wewe musoko udi umatshisha mashi hanshi munkatshi muau, bua tshikondo tshia kubutuka kuau tshifike kudiu, udi udisongela mpingu bua wowo unyanguke!

⁴ Wewe wakuhila bua mashi awakumatshisha hanshi, wakunyanguka bua mpingu yebe iwakusonga; wakusemesha dituku dia kubutuka kuebe ha buihi, wakukumbasha bidimu bia meme kukubadila malu mabi ebe; nunku nakukuvuisha tshintu tshidibo bahenda kudi bisamba bia bantu, ne tshidibo baseka kudi ba mu maloba mikuabo onso.

⁵ Badi ha buihi nʼebe ne badi kule nebakuseke, wewe umena lumu lubi, mûle tente ne diyoyo.

⁶ Tangila, baminyampala ba Betu Isalele, bakumatshisha mashi a be munkatshi muenu hanshi, muntu ne muntu bu muakadi bukole buandi.

⁷ Ba munkatshi muenu bakuhetula batatu ne bamamu; ba munkatshi muenu bakukengesha muntu wa bende; ba munkatshi muenu bakuenzela bana ba nshiya ne bakashi ba na lufuila bibi.

⁸ Wakuhetula bintu bianyi bia tshijila, wakunyanga mataku anyi a mbingu.

⁹ Ba munkatshi muenu bakusonguelangana bua kumatshishabo mashi a bakuabo hanshi; munkatshi muenu muakadi bantu bakadia bintu bielela mpingu ha mikuna; munkatshi muenu muakadi bantu bakulonda malu a masandi.

¹⁰ Bakuabo ba munkatshi muenu bakuhia tshibindi ne bakashi ba batatu babo; ba munkatshi muebe bakufuisha bakashi bundu hakadibo mu tshikondo tshia tshijila tshiabo.

¹¹ Mukuabo wakuenza bualu bua bundu ne mukashi wa muena mutumba nʼandi; munga wakunyanga mukashi wa muanʼandi mulume ne wakuhia tshibindi; mukuabo wa munkatshi muenu wakufuisha muanʼabo mukashi bundu, muana wa tatuʼandi mumuledi mene.

¹² Mukelenge Yehowa udi wamba ne, Bakuabo ba munkatshi muenu bakuitabusha mbueshilu bua kumatshisha mashi a bakuabo hanshi; wewe wakulomba bia kasombela ne bia makasa, wakunyenga bintu kudi bena mutumba nʼebe ku bukole; wakumpua muoyo.

¹³ Tangila, bua malu â nakukatshila bua bintu biwakunyenga ku mashimi ebe, ne bua mashi awakumatshisha munkatshi muenu.

¹⁴ Mutshima webe udi mua kushindama ne bianza biebe bidi mua kushala bikole mu dituku dindi nkubikila ku tshilumbu, anyi? Meme, Yehowa, nakuamba dî edi, nendijadike kabidi.

¹⁵ Nenkutangadishe munkatshi mua bisamba bia bantu, nenkumuangalashe munkatshi mua maloba makuabo; nengumushe bukoya budi munda muebe.

¹⁶ Nebakufuishe bundu ku mesu kua bisamba bia bantu; neumanye ne, Meme ndi Yehowa.

¹⁷ Dî dia Yehowa diakalua kundi ne,

¹⁸ Muana wa muntu, ba mu tshisamba tshia Bena Isalele bakulua bu bikanganya kundi; buonso buabo bakadi bu tshiamu tshia mitaku, bu tshiamu tshia étain, bu tshiamu tshifike ne bu tshiamu tshia lutende mu ditanda, bakulua bu bikanganya bia tshiamu tshia argent.

¹⁹ Nunku Mukelenge Yehowa udi wamba ne, Bualu bua buonso buenu nuakulua bu bikanganya, nunku tangilai, nennusangishe hohamue munkatshi mua Yelushalema.

²⁰ Bu mudi muntu usangisha tshiamu tshia argent, tshiamu tshia mitaku, tshiamu tshifike, tshiamu tshia lutende ne tshiamu tshia êtain mu ditanda, bua kuimba mubanze ne kubiela kahia bua kubiengulula, nunku nennusangisheku mu tshiji tshianyi ne mu tshiji tshianyi tshikole, nennuelemu, nennuengulule.

²¹ Eyo, nennusangishe hohamue, nennuele muhuya ne kahia ka tshifikʼa munda, nenuenguluke mu musoko eu.

²² Bu mudi tshiamu tshia argent tshienguluka mu ditanda, nunku nuenu nenuenguluke mu musoko. Nunku nenumanye ne, Meme, Yehowa, nakunuhongoluela tshiji tshianyi tshikole.

²³ Dî dia Yehowa diakalua kundi kabidi ne,

²⁴ Muana wa muntu, ambila Yelushalema ne, Wewe udi buloba budi kabuyi bulengeshibue, budi nvula kayi mulokelehu mu dituku dia tshiji tshikole.

²⁵ Baprofete bandi badi bu nyama wa ntambue udi wasa muadi hatshidiye udia nyama wakukuateye; bakujimisha mioyo ya bantu, badi banyenga bintu bia mu tshibutshilu ne bintu bia mushinga mukole, bakuvuisha bakashi ba mu lufuila ba bungi munkatshi muabo.

²⁶ Bakuidi bandi bakushiha mikenji yanyi, bakunyanga bintu bianyi bia tshijila; kabakusungulula bintu bia tshijila ne bintu bia hatuhu, kabakuyisha bantu mua kujingululabo ditahuluka didi hankatshi ha bintu bibiha ne bidi kabiyi bibiha; bakusokoka mesu abo ku kunyanga kua matuku anyi a mbingu, ne meme ndi muhendibue munkatshi muabo.

²⁷ Bakokeshi bandi badi bu nyama ya nkashama idi idia nyama yakukuatayi, badi bamatshisha mashi a bakuabo hanshi, badi bajimisha mioyo ya bantu bua kuheta luhetu ku buibi buabo.

²⁸ Baprofete bandi badi balaba luhemba ku bimanu bia nsubu yabo, badi baula bikena kumona bidi bibadinga, badi babadinga ne ditempa dia mbuku ya mashimi, bamba ne, Mukelenge Yehowa udi wamba nunku, Yehowa kayi muanze kuamba dî nansha.

²⁹ Bena buloba bakukengeshangana hatuhu, bakunyenga bintu bia bakuabo; bakutatshisha bahele ne bakengi, bakukengesha muntu wa bende wakadi kayi ne bualu.

³⁰ Nakakeba muntu munkatshi muabo wakamanya mua kuibaka lumbu kabidi, ne bua kuimaneye ku mpala kuanyi mu muaba wakashimbuka bua kukuatshisha ba mu buloba ebu, bua meme tshibubutudi; kadi tshiakasangana muntu.

³¹ Mukelenge Yehowa udi wamba ne, Nunku nakubahongoluela tshiji tshianyi tshikole; nakubabutula ne kahia ka tshifikʼa munda; nakubatumina dikenga bualu bua bienzedi biabo.