Yezekiyele 21 - Mukanda wa Nzambi Dihungila Dikulukulu ne Dihungila Dihia-dihia 2003

Muele wa Yehowa Musekeshibue

¹ Dî dia Yehowa diakalua kundi ne,

² Muana wa muntu, tangisha mpata webe ku Yelushalema, ela dî diebe ku miaba ya tshijila, bela buloba bua Isalele.

³ Ambila buloba bua Isalele ne, Yehowa udi wamba ne, Ndi nkuhidia, nempatule muele wanyi wa nvita mu tshimanga tshiau, nembutule bantu ba munkatshi muenu, bakane ne babi.

⁴ Bualu bua ndi mbutula bantu bakane ne bantu babi ba munkatshi muebe, nunku muele wanyi wa nvita neuhatuke mu tshimanga tshiau bua kutaha bantu bonso ba ku luseke lua sude tô ne ku luseke lua node.

⁵ Bantu bonso nebamanye ne, Meme Yehowa nakuhatula muele wanyi wa nvita mu tshimanga tshiau; kawena uhinganamu kabidi.

⁶ Nunku, muana wa muntu, humuna muoyo, humuna muoyo ne kanyinganyinga kakole ne mutshima wa majia ku mesu kuabo.

⁷ Hakukonkabo ne, Bualu kai udi uhumuna muoyo? Wewe ubakudimune dî ne, Bualu bua lumu ludi lulua; ne halunvuabo, mitshima ya bantu bonso neyihandike, maboko onso neikale matekete, mioyo ya bantu bonso neyihange, binu bionso nebitekete-teketê bu mai. Mukelenge Yehowa udi wamba ne, Tangila, bualu ebu hudi bulua, nebuenjibue.

⁸ Dî dia Yehowa diakalua kundi kabidi ne,

⁹ Muana wa muntu, ambila bantu mei a buprofete buebe, ubambile ne, Yehowa udi wamba ne, Muele wa nvita, muele wa nvita, udi musekeshibue bimpe ne udi munonoke kabidi;

¹⁰ udi musekeshibue bua kushiha nʼau bantu, udi munonoke bua kuhenya bu muele wa nvula! Tuetu netusekeshangane, anyi? Wewe mulangala wa muanʼanyi wa balume, udi uhetula mutshi wonso.

¹¹ Badi baufila bua kûnonabo, bua baukuate mu tshianza; muele wa nvita udi musekeshibue ne munonoke bua bauteke mu tshianza tshia mushihianganyi.

¹² Muana wa muntu, asa muadi, dila biebe! Bualu bua muele udi utaha bantu banyi ne bakokeshi bonso ba Bena Isalele. Bakabateka ku mpata kua muele wa nvita, bobo ne bantu banyi hohamue. Nunku uditute ku tshibelu.

¹³ Bualu bua kuteta kudiku; Mukelenge Yehowa udi ukonka ne, Wamanya mua kuhetula mulangala wanyi nganyi?

¹⁴ Nunku, wewe, muana wa muntu, amba mei ebe, tuta tshikashi, muele wa nvita utahe tshiakabidi, utahe tshiakasatu, muele wa nvita wa bantu bashihibue, muele wa nvita mene wa bantu bashihibue udi ubalamina ku nseke yonso.

¹⁵ Nakubabishila muele wa nvita bua kubakuatshisha buowa, tô ne hahandika mitshima yabo, bua bantu ba bungi badishinde hehi ne bibi biabo bionso. Muele wa nvita udi uhenya bu muele wa nvula, udi musekeshibue bua kushiha nʼau bantu!

¹⁶ Tshunguluka, wewe, muele wa nvita, ku luseke lua tshianza tshia balume, ne ku luseke lua tshianza tshia bakashi, kuonso kudi mpata webe utangila!

¹⁷ Meme kabidi nentute bikashi, nendekele tshiji tshianyi; meme Yehowa nakuamba mei anyi.

¹⁸ Dî dia Yehowa diakalua kundi kabidi ne,

¹⁹ Wewe kabidi, muana wa muntu, usungule nshila ibidi idi muele wa nvita wa mukelenge wa Babulona mua kuyilamu, bubidi buai mihatuke mu buloba bumue; teka tshimanyinu mu nshila, utshiteke ku disanga dia nshila udi mutangile ku musoko.

²⁰ Sungula biebe nshila bua muele wa nvita uyilemu bua kufika ku Laba, musoko wa Bena Amona, ne nshila wa ku Yelushalema, musoko wa mu Yuda, udi munyunguluke ne ngumbu.

²¹ Bualu bua mukelenge wa Babulona udi wimana ku masangu a nshila, kundekelu kua nshila ei ibidi, bua kutempesha lubuku; udi unyungisha mikete, udi webesha telafima, udi utangila mu mutshima wa nyama.

²² Bintu bia kutempa nʼabi bia mu tshianza tshiandi tshia balume biakamulesha bua Yelushalema bantu kushikamamu, mua kuela mbila ya nvita, mua kujadika mitshi minene ku mpala kua bibi bua kubishimbula, mua kuela mishiki ya buloba ne kuasa bibumba bia kutshintshimika nʼabi musoko.

²³ Ku mesu kua ba mu Yelushalema kutempa eku kua mbuku nekuikale bu kutempa kudi kubadinga, bualu bua badi bela meji ne, Tshikondo netshilehe tô ne ku mbingu ya bungi; kadi Yehowa udi uvuluka bubi buabo, bua bobo bakuatshibue.

²⁴ Nunku Mukelenge Yehowa udi wamba ne, Bualu bua nuakunvuluisha bua mibi yenu, bua malu mabi enu akusokolodibua, ne mibi yenu idi imueneka mu bienzedi bienu bionso; bualu bua badi banuvuluka ku malu â nebunukuate ku bukole.

²⁵ Ne wewe, muntu mubi udi mutaha ne mputa wa lufu, mukokeshi wa Bena Isalele, muena dituku dia dikenga didi ha buihi, mu tshikondo tshia dikenga dia kunshikidilu,

²⁶ Mukelenge Yehowa udi ukuambila ne, Umusha tshitambala, utule tshifulu tshiebe tshia bunfumu; malu onso neandamuke! Bandisha bahuekele, huekesha babandile.

²⁷ Nembutule, nembutule, nembubutule kabutu; kabuena buikalaku kabidi tô ne halua udi muakanangane nʼabu, ne nemuhebu.

Dihisha dia Bena Amona

²⁸ Wewe kabidi, muana wa muntu, amba mei a buprofete buebe, ubambile ne, Mukelenge Yehowa udi wamba bualu bua Bena Amona, bua bihendu bidibo bahenda nʼabi Bena Isalele, ne, Muele wa nvita, muele wa nvita, udi muhatula bua kushiha nʼau bantu, udi munonoke bua kuhenya bu muele wa nvula;

²⁹ bualu bua bakukulesha bikena kumona bidi bikudinga, bakukutempela mbuku ya mashimi, bakukuelela mukenji bua wewe kuteka muele eu ha nshingu ya bantu babi badi batahibue mputa ya lufu, bena dituku diakumana kufika mu tshikondo tshia dikenga dia kunshikidilu.

³⁰ Uhingashe mu tshimama tshiau! Bualu bua mu muaba wakakufukabo, mu buloba buwakaledibua, nenkulumbuluishe.

³¹ Nenkukoleshe tshiji tshianyi, nenkuelele kahia ka tshiji tshianyi; nenkufile mu bianza bia bantu badi bu nyama mene, badi ne lungenyi lule lua kubutula nʼalu bakuabo.

³² Newikale bu lukunyi mu kahia; mashi ebe neamate mu buloba; kabena bakuvuluka kabidi; bualu bua meme, Yehowa, nakuamba nunku.