Yezekiyele 19 - Mukanda wa Nzambi Dihungila Dikulukulu ne Dihungila Dihia-dihia 2003

Badi Badila bua Baminyampala ba Bena Isalele

¹ Nunku wewe washile baminyampala ba mu Isalele madilu,

² wamba ne, Mamu webe wakadi nganyi? Wakadi nyama wa ntambue mukashi munkatshi mua nyama ya ntambue mikuabo; wakalala munkatshi mua bana ba nyama ya ntambue, wakakolesha bana bandi.

³ Wakakolesha muanʼandi mukuabo, tô ne hakatantamaneye, ne wakayila mua kukuata nyama ya kudieye; wakadia bantu.

⁴ Ba mu bisamba bia bantu bakunvua lumu luandi, bakamukuata mu dijimba diabo; bakaya nʼandi musuika nkanu tô ne mu buloba bua Ejipitu.

⁵ Hakatangila mamuʼandi ne, Nakumuindila ne ditekemena dianyi didi dijimina, yeye wakangata muanʼandi mukuabo, wakamulekesha tô ne hakatantamaneye.

⁶ Yeye wakendakana munkatshi mua ntambue mikuabo, wakalua biandi nyama mukole; wakayila mua kukuata nyama ya kudieye; wakadia bantu.

⁷ Wakanyanga nsubu yabo minene, wakabutula misoko yabo; buloba buakanyanguka ne bintu biabu bionso, bualu bua mukungulu wa muadi wandi.

⁸ Hashishe ba mu bisamba bia bantu bakamunyunguluka ne mateyi, bakamuanda bukuondo, bakamukuata mu dijimba diabo.

⁹ Bakamuteka mu tshikumbi, bamuela nkanu, bakaya nʼandi kudi mukelenge wa Babulona; bakamuteka mu miaba mikole, bua dî diandi kadiunvuiki ha mikuna ya Bena Isalele.

¹⁰ Mamu webe wakadi bu muonshi, mufuanangane nʼebe, mukuna hehi ne mai. Wakakuama mamuma a bungi, wakadi ne matamba a bungi, bualu bua bungi bua mai.

¹¹ Wakasa matamba makole, akalua bu makombo a bakokeshi, munkatshi mua matamba au mangi, wowo wakaleha mulu; akamueneka bua bule buau ne bua bungi bua matamba au.

¹² Kadi bakajula muonshi au ne tshifikʼa munda, bakawela hanshi ha buloba; luhehele lua ku esete luakafubisha mamuma au; matamba au makole akufubidila, ne kahia kakawosha.

¹³ Mpindiu bakamana kûkuna mu tshihela, mu buloba bûme budi kabuyi ne mai.

¹⁴ Kahia kakahatuka mu matamba au, kakosha matamba ne mamuma au; nunku kamuakushala ditamba dikole bu dikombo dia kukokesha nʼadi. Eu udi musambu wa muadi, newikaleku bu kasala ka madilu.