Yezekiyele 17 - Mukanda wa Nzambi Dihungila Dikulukulu ne Dihungila Dihia-dihia 2003

Lusumuinu lua Nyunyu ya Mikanku ne Muonshi

¹ Dî dia Yehowa diakalua kundi ne,

² Muana wa muntu, ubele dijimbu ne welele Bena Isalele lusumuinu elu;

³ ubambile ne, Mukelenge Yehowa udi wamba ne, Nyunyu munene wa mukanku, wakadi ne mahuahua manene, mahuahua male mene, muase masala a bungi akadi ne mibidi ya mishindu mishilangane, wakalua ku Lebanona; wakangata ditamba dia ku lusongo lua mutshi wa cêdre;

⁴ wakahia ditamba diau diakatamba mulu, wakaya nʼadi ku buloba bua bungendʼa mushinga, wakadishimika mu musoko wa bahanyi ba bintu.

⁵ Wakangata kabidi diminu dia mu buloba ebu, waka dikuna mu budimi buakadi ne buloba buimpe; wakaditeka hehi ne mai a bungi, wakadikuma bu mutshi wa saule,

⁶ diakatoloka, ne diakalua muonshi udi ulamba kauyi mutambe bule, matamba a muonshi atangilangana nʼandi, ne miji yau iya muinshi muakadiye. Nunku wowo wakalua muonshi, wakasampila ntonga, wakasa matamba.

⁷ Munga nyunyu mimene wa mukanku wakalua kabidi, wakadi ne mahuahua manene ne masala a bungi; monai! Muonshi eu wakadi mutangishe miji yau kudiye, ne ku muaba kuakadibo baukuna. Wakatuma matamba au kudiye, bua yeye aumiamine mai.

⁸ Wakakunyibua mu buloba buimpe, hehi ne mai a bungi, bua wowo wase matamba ne ukuame biau mamuma ne ulue muonshi mulengele.

⁹ Amba biebe ne, Mukelenge Yehowa udi ukonka ne, Neumanye mua kudiunda, anyi? Yeye kena ujula miji yau, kena uhuola mamuma au, anyi? Bua mabeshi au matekete onso afubidile anyi kûjula tô ne ku miji yau bidi bikengela kuikala ne diboko dikole ne bantu ba bungi.

¹⁰ Bulelela, wakakunyibua, kadi udi mua kudiunda, anyi? Kawena mua kufubidila tshiendelele, haututa luhehele lua ku esete, anyi? E, neufubidile mu buloba buakadiundilau.

¹¹ Hashishe dî dia Yehowa diakalua kundi ne,

¹² Ambila ba mu diku dia bantombokedi ne, Kanuena njingulula malu â, anyi? Ubambile ne, Monai, mukelenge wa Babulona wakalua ku Yelushalema, wakakuata mukelenge ne baminyampala bakuabo bakadimu, wakaya nʼabo ku Babulona.

¹³ Wakangata muana mukuabo wa mu diku dia mukelenge, wakahunga nʼandi tshihungidi, wakamutshihisha mutshihu ku bukole. Wakaya ne bantu baneme ba mu buloba ebu,

¹⁴ bua bukelenge buikale buhuekele, bua kabudibandishi kabidi, kadi bumanye mua kujalama ku kutumikila kua tshihungidi.

¹⁵ Kadi muntu wakasunguleye wakatombokela mukelenge, hakatumeye miloho yandi mu Ejipitu, bua bamuhe tubalu ne masalayi a bungi. Neikale ne diakalengele, anyi? Udi wenza malu bu nunku neahanduke, anyi? Neahanduke hashiheye tshihungidi tshiakahungeye, anyi?

¹⁶ Mukelenge Yehowa udi wamba ne, Bu mundi meme ne muoyo, bulelela, yeye neafue mu muaba udi mukelenge wakamubuesha mu bunfumu mushikame, muena mutshihu udiye muhetule, muena tshihungidi tshidiye mushihe, mu Babulona mene.

¹⁷ Palô ne tshisumbu tshiandi tshinene tshia masalayi ne tshia bena nvita ba bungi kabena mua kumukuatshisha mu dituku dia nvita, haluabo kukungisha mishiki ya buloba ne kuela mabula manene a kutshintshimika nʼau musoko, bua kushihabo bantu ba bungi.

¹⁸ Bualu bua yeye wakahetula mutshihu wandi hakashiheye tshihungidi; wakakuatangana bianza ne mukelenge bua kuditshiha kudiye, kadi wakenza malu â onso; kena mua kuhanduka.

¹⁹ Nunku Mukelenge Yehowa udi wamba ne, Bu mundi meme ne muoyo, bua mutshihu wanyi wakahetuleye ne tshihungidi tshianyi tshiakashiheye, nemmukengeshe.

²⁰ Nemmuande bukuondo buanyi, neakuatshibue mu buteyi buanyi; nendue nʼandi ku Babulona, nemmulumbuluishileku bua ditomboka diandi diakantombokeleye.

²¹ Bonso ba mu bisumbu biandi bia masalayi badi banyema nebashihibue ku muele wa nvita, ne badi bashala nebamuangalashibue ku mpehele yonso; nunku nenumanye ne, Meme Yehowa nguakuamba dî.

²² Mukelenge Yehowa udi wamba ne, Meme kabidi nengangate lusongo lua mutshi wa cèdre, nendushimike hanshi; nengahule ditamba ditekete didi ku mutu kualu, nendikune ha mutu ha mukuna mule munangahale.

²³ Nendikune ha mutu ha mukuna mule wa Isalele; nediase matamba, nedikuame mamuma, nedilue mutshi wa cêdre muakane; muinshi muau nemuikale nyunyu ya mishindu yonso, mu dileshi dia matamba au neyase masua ai.

²⁴ Mitshi yonso ya mu mpata neyimanye ne, Meme Yehowa nakuhuekesha mutshi mule, nakubandisha mutshi muhuekele, nakûmisha mutshi mubishi, nakuelesha mutshi mume ntonga; meme Yehowa nakuamba dî edi ne nakudienza.