Yezekiyele 15 - Mukanda wa Nzambi Dihungila Dikulukulu ne Dihungila Dihia-dihia 2003

Yelushalema Udi bu Muonshi wa Hatuhu

¹ Dî dia Yehowa diakalua kundi ne,

² Muana wa muntu, muonshi udi uhita mitshi mikuabo ya muitu kudi kunyi, ditamba adi dia muonshi didi munkatshi mua mitshi ya muitu?

³ Badi bamanye mua kuangata dibaya kudiu bua kuenza nʼadi tshintu, anyi? Badi bamanye mua kusonga tshikudikilu ne tshituha tshiau bua kukudikaku luesu, anyi?

⁴ Tangila, badi bawela mu kahia bu nkunyi; kahia kadi kosha nsongo yau ibidi, ne hankatshi hau hakuhia kabidi; badi bamanye mua kuenza nʼau mudimu kai?

⁵ Tangila, hakadiu muonshi mujima, kabakenza nʼau mudimu nansha; nunku hakuwosha kahia ne hakushilau, badi mua kuenza nʼau mudimu kai kabidi?

⁶ Yehowa udi wamba ne, Bu mudi muonshi munkatshi mua mitshi ya muitu, indi nteka mu kahia bu nkunyi, nunku nakufila badi bashikame mu Yelushalema ku lufu.

⁷ Nembahidie; bakuhatuka mu kahia, kadi kahia kakuabo nekabavingutule; nenumanye ne, Ndi Yehowa, hanabahidia.

⁸ Yehowa udi wamba ne, Nembutule buloba ebu kabutu, bualu bua bakushiha mikenji yanyi.