Yeshaya 62 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bua bualu bua Siona tshiena mpuwa talalâ, ne bua bualu bua Yelushalema tshiena ngikala hola, tô ne haluhuka kubingishibua kuandi bu dinkenke, ne luhandu luandi bu tshimunyi tshidi tshitema.

² Ba mu bisamba bia bantu nebamone kubingishibua kuebe, ne banfumu bonso nebamone butumbi buebe; nebakubikile ku dina dihia-dihia didi mukana mua Yehowa mukuinyike.

³ Newikale tshifulu tshia bulengele mu tshianza tshia Yehowa, ne tshifulu tshia bukelenge mu tshianza tshia Nzambi webe.

⁴ Kabena bakubikila kabidi ne, Mushiya hatuhu; kabena babikila buloba buebe kabidi ne, Bubutuke; kadi nebakubikile ne, Disanka-dianyi-didi-kudiye, nebabikile buloba buebe ne, Mubakibue; bualu bua Yehowa udi nʼebe disanka, ne buloba buebe nebuikale bu mukashi mubakibue kudi mulume.

⁵ Bu mudi nsongalume ubaka mukashi utshidi kamama, muibaki webe neikale bayebe, ne bu mudi mubaki wa mukashi usanka bua mukashi udiye ubaka, nunku Nzambi webe neasanke bua bualu buebe.

⁶ Nakuteka batentekedi ha mutu ha ngumbu yebe, Yelushalema; kabena bahuwa talalâ munya anyi butuku. Nuenu badi bavuluki ba Yehowa mu mitshima yenu, kanuikadi ne dikisha,

⁷ kanumuki yeye dikisha kabidi tô ne hajadikeye Yelushalema, ne hamuvuisheye musoko udi ne butumbi ha buloba.

⁸ Yehowa wakuditshiha ku tshianza tshiandi tshia balume, ne ku diboko diandi dikole ne, Bulelela, tshiena nfila maminu ebe kabidi bu bia kudia kudi badi nʼebe lukuna; ne bantu ba bende kabena banua nyinyo webe muhia-muhia uwakukuatshila mudimu.

⁹ Kadi badi babihuola nebabidie ne nebatumbishe Yehowa; badi basangisha tumuma nebanue nvinyo yatu mu biendelu bia tshitendelelu tshianyi.

¹⁰ Hitai, hitai mu bibuelelu, longoluelai bantu nshila; elai, elai mabula mu tshibebe, umushaimu mabuo, bandishilai bantu dibendela.

¹¹ Monai, Yehowa wakuela mukenji tô ne kunfudilu kua buloba ne, Ambilai muana mukashi wa Siona ne, Tangila, luhandu luebe ludi lulua; tangila, yeye udi ulua ne bukenji buandi, ne udi utuma difutu diandi ku mpala kuandi.

¹² Nebababikile ne, Bantu ba tshijila, Bahikudibue kudi Yehowa; nebakubikile ne, Musoko mukebibue, musoko udi kauyi mushiya hatuhu.