Yeshaya 36 - Mukanda wa Nzambi Dihungila Dikulukulu ne Dihungila Dihia-dihia 2003

Saneheliba Udi Ubuela mu Buloba bua Yuda

¹ Mu tshidimu tshia dikumi ne tshinai tshia bukokeshi bua mukelenge Hezikiya, Saneheliba, mukelenge wa Ashû, wakalua, wakaluangana ne bena misoko yonso ya ngumbu ya mu Yuda, wakayinyenga.

² Mukelenge wa Ashû wakatuma Labashake ne masalayi a bungi bua kubika ku Lakisha ne kuya ku Yelushalema kudi Hezikiya. Yeye wakimana ha buihi ne mutubu wa mai udi uyila ku kashiba ka mai kadi ku mutu kua mukuna mu nshila wa budimi bua muvuwi wa bilulu.

³ Hashishe Eleyakima, muana wa Hilekiya, wakadi ha mutu ha bena mudimu ba mu nsubu wa mukelenge, Shebena wakadi secrétaire, ne Yoa, muana wa Asafa, wakadi mufundi, bakaluhuka mu nsubu bua kuya kudiye.

⁴ Labashake wakabambila ne, Nuambile Hezikiya ne, Mukelenge munene, mukelenge wa Ashû mene, udi ukuebesha ne, Etshi ntshieyemenu kai tshiudi weyemena?

⁵ Ndi ngamba ne, Lungenyi ludibo bakulesha ne bukole buebe bua kuluangana nʼabu nvita bidi anu mei a hatuhu. Udi weyemena nganyi mpindiu hawakuntombokela?

⁶ Mona, wewe udi weyemena disele ditshibuke, Ejipitu mene; biadieyemena muntu, netubuele mu tshianza tshiandi, neditshisompoke. Palô, mukelenge wa Ejipitu, udi nunku kudi bonso badi bamueyemena.

⁷ Kadi biwangambila ne, Tudi tueyemena Yehowa Nzambi wetu, eu kanyeye mene udi Hezikiya mumushile bitendelelu biandi ku mikuna ne bioshelu biandi, muambile ba mu Yuda ne ba mu Yelushalema ne, Bunudi nʼabu mbua kutendelela ku mpala kua tshioshelu etshi, anyi?

⁸ Nunku ndi nkusengelela ne, Udie luhiku ne mukelenge wanyi, mukelenge wa Ashû: nenkuhe tubalu binunu bibidi, biwamanya biebe mua kushikika bahandi ha nyima hatu.

⁹ Munyi mudi mumanye mua kusesuishe kapitene kamue ka munkatshi mua bantu ba mukelenge wanyi batambe kuhuekela, haweyemena Bena Ejipitu bua kuheta makalu a nvita ne bena tubalu?

¹⁰ Nakudiluila mpindiu bua kubutula muaba eu Yehowa kayi nʼanyi, anyi? Yehowa mene wakungambila ne, Ya uluishe bena buloba ebu, ubabutule.

¹¹ Hashishe Eleyakima ne Shebena ne Yoa bakambila Labashake ne, Tudi tukusengelela ne, Wakule ne bantu bebe mu muaku wa Bena Sulia, bualu bua tuetu tudi tûjingulula; kuakudi nʼetu mu muaku wa Bena Yuda mu matshu a bantu badi ha mutu ha lumbu.

¹² Kadi Labashake wakabambila ne, Mukelenge wanyi wakuntuma kudi mukelenge webe ne kunudi kabidi bua kuamba mei â, anyi? Yeye kakuntuma kudi bantu badi bashikama ha mutu ha lumbu, bua bobo badie tunvi tuabo, banue menyi abo diatshimue nʼenu, anyi?

¹³ Hashishe Labashake wakimana, wakela dî dikole mu muaku wa Bena Yuda, wakamba ne, Unvuai dî dia mukelenge munene, mukelenge wa Bena Ashû mene.

¹⁴ Mukelenge udi wamba ne, Hezikiya kanudingi, bualu bua yeye kena mumanye mua kunusungila mu tshianza tshiandi.

¹⁵ Kanuitabushi bua Hezikiya abueshe ditekemena dia Yehowa mu mitshima yenu hambeye ne, Yehowa neatusungile bulelela; kabena bafila musoko eu mu bianza bia mukelenge wa Ashû.

¹⁶ Kanunvu dî dia Hezikiya nansha; bualu bua mukelenge wa Ashû udi wamba ne, Nudilengeshe nʼanyi, nuluhuke kundi; nunku muntu yonso adie tumuma tua ku muonshi wandi wa nvinyo ne mamuma a ku mutshi wandi wa nfigi, ne muntu yonso anue biandi mai a ku dina diandi dia mai;

¹⁷ tô ne hanalua bua kuya nʼenu ku buloha budi bufuana buloba buenu, buloba bua maminu ne bua nvinyo muhia-muhia, buloba bua bia kudia ne bua mionshi ya tumuma tua nvinyo.

¹⁸ Nudimuke bua Hezikiya kanuitabushishi dî diandi hambeye ne, Yehowa neatusungile. Munga nzambi wa mu bisamba bia bantu wakusungila buloba buandi mu bianza bia mukelenge wa Ashû, anyi?

¹⁹ Nzambi ya Hamata ne ya Âpada, idi kudi kunyi? Nzambi ya mu Sefawayima idi kudi kunyi? Yakasungila musoko wa Samalea mu tshianza tshianyi, anyi?

²⁰ Yakadi binganyi munkatshi mua nzambi yonso ya bisamba ebi yakasungila buloba buai mu tshianza tshianyi, bua Yehowa asungile Yelushalema mu tshianza tshianyi?

²¹ Kadi bantu bakahuwa talalâ, kabakamukudimuna dî; bualu hua mukelenge wakadi wela mukenji ne, Kanumukudimunyi dî.

²² Hashishe Eleyakima, muana wa Hilekiya, wakadi ha mutu ha bena mudimu ba mu nsubu wa mukelenge, ne Shebena secrétaire, ne Yoa, muana wa Asafa, mufundi wa malu a bukelenge, bakalua kudi Hezikiya ne bilulu biabo bihanda, bakamuambila mei a Labashake.