Yeshaya 20 - Mukanda wa Nzambi Dihungila Dikulukulu ne Dihungila Dihia-dihia 2003

Bena Ashû Nebatambe Bena Ejipitu ne Bena Atiopa Bukole

¹ Mu tshidimu tshiakulua Tâtana ku Ashedodo, mutumibue kudi Sâgona, mukelenge wa Ashû, wakaluangana ne bena musoko wa Ashedodo ne wakabahita bukole.

² Mu tshikondo atshi Yehowa wakambila Yeshaya, muana wa Amoza, ne, Ya usulule bilulu bikayabala bidi mu tshimono tshiebe, umushe bisabata biebe ku makasa ebe. Yeye Wakenza nunku, wenda butaka ne kayi ne bisabata.

³ Hashishe Yehowa wakamba ne, Bu muakuenda muntu wanyi Yeshaya butaka ne kayi ne bisabata bidimu ebi bisatu, bu tshimanyinu ne bu bualu bua dikema kudi ba mu Ejipitu ne kudi ba mu Atiopa,

⁴ nunku mukelenge wa Ashû neaye kuabo ne bantu badiye mukuate mu Ejipitu ne badiye mumushe mu Atiopa bua kubalela kule, bana ne bakulumpe diatshimue, bikale butaka ne kabayi ne hisabata, kabayi ne bilulu bia kubuikila ku mataku abo, bua kufuisheye ba mu Ejipitu bundu.

⁵ Bena Yuda nebakuatshike buowa, nebikale babuandakanangane, bualu bua Atiopa wakadi ditekemena diabo ne bua Ejipitu wakadi butumbi buabo.

⁶ Ne badi bashikame mu buloba ebu budi ku muelelu wa mai manene nebambe mu dituku adi ne, Monai, ebu mbualu buakukuata batuakutekemena, batuakunyemena bua batukuatshishe bua tuetu kuhanduka mu bianza bia mukelenge wa Ashû! Ne tuetu hetu netuhanduke munyi?