Yeshaya 18 - Mukanda wa Nzambi Dihungila Dikulukulu ne Dihungila Dihia-dihia 2003

Malu Alualua kudi Bena Atiopa

¹ Ke, buloba budi ne tshiona tshia kuhahala kua masala a bishi, budi ku nyima kua misulu ya Atiopa,

² budi butuma miloho yabu mu nshila udi uyila ha mutu ha mai manene, yenda biayi mu matu maluka ne papyrus ha mai! Yai bienu, nuenu miloho idi yenda lubilu, kudi tshisamba tshia bantu badi bale ne badi basenene, kudi bantu badi bakuatshisha bakuabo badi ha buihi ne badi kule buowa; ntshisamba tshidi tshikole ne tshidi tshidiata banga bantu muinshi mua makasa, tshidi misulu itahulula buloba buatshi.

³ Nuenu bonso ba ha buloba bua bukua bantu, ne nuenu badi bashikame ha buloba, habandishabo dibendela ha mutu ha mukuna, tangilai! Helabo mpungi, unvuai bienu!

⁴ Bualu bua Yehowa wakungambila dî edi ne, Nentangile malu talalâ bandi mu muaba undi mushikame, bu luya ludi lubanda mu munya, lukenka bikole; bu ditutu dia dibungi mu luya lua mu tshikondo tshia kunowa.

⁵ Bualu bua diambedi tshidimu tshia kunowa katshiyi tshianji kufika, huma tshilongo, ne hakudimuka lutonga luatshi kamuma ka nvinyo kamba kuboba, yeye neahempe ntonga ne miele, neayitahe, neumushe matamba a mutshi adi matanyinyika kudiu.

⁶ Nebashiye buonso buabi kudi nyunyu ya mu mikuna itu yadia munyinyi, ne kudi nyama ya mu mpata. Nyunyu itu yadia munyinyi neyiyikile bamʼbidi habi mu tshidimu tshia luya, nyama yonso ya mu mpata neyimane hadibi mu tshidimu tshia mashika.

⁷ Mu tshikondo atshi nebalue ne diha kudi Yehowa wa misumba didi difuma kudi bantu bale ne basenene, difuma kudi bantu badi bakuatshisha badi ha buihi ne badi kule buowa; ntshisamba tshidi tshikole ne tshidi tshidiata bantu muinshi mua makasa abo, tshidi misulu itahulula buloba buatshi. Nebalue nʼadi ku muaba udi Yehowa wa misumba uteka dina diandi, ku mukuna wa Siona mene.